Həştərxan Azərbaycan-Rusiya dostluğunu tərənnüm edən mərkəzə çevrilib

Azərbaycan dövlətinin və Heydər Əliyev Fondunun təşəbbüsü ilə Həştərxanda həyata keçirilən layihələr iki ölkə arasındakı əlaqələrə böyük töhfələr verir

Xarici ölkələrdə yaşayan azərbaycanlıların sıx təşkilatlanması, onların vasitəsilə ölkəmizlə bağlı həqiqətlərin dünya ictimaiyyətinə çatdırılması, habelə soydaşlarımızın problem və qayğılarının həlli Azərbaycan Respublikasının diaspor siyasətinin prioritet istiqamətləridir. Ulu öndər Heydər Əliyevin müəyyən etdiyi bu siyasətin Prezident İlham Əliyev tərəfindən uğurla davam etdirilməsinin nəticəsi olaraq, son illərdə diaspor quruculuğu işinin təkmilləşdirilməsi sahəsində görülən işlərin miqyası davamlı şəkildə genişləndirilmişdir.

Diaspor təşkilatlarımızın fəallığının artması, azərbaycanlıların həmrəyliyi siyasətinin geniş miqyas alması Prezident İlham Əliyevin diqqət mərkəzində saxladığı mühüm məsələlərdir. Xarici ölkələrə rəsmi səfərləri çərçivəsində həmişə Azərbaycan diasporu ilə görüşlərə böyük yer ayıran, onlarla söhbətlər aparan dövlət başçısı dəfələrlə bəyan etmişdir ki, Azərbaycan dövlətinin güclü olması dünyada yaşayan azərbaycanlıların da mövqeyini möhkəmləndirir. Bunun konkret təzahürünü Rusiyada fəaliyyət göstərən Azərbaycan diasporunun timsalında görmək mümkündür. Hazırda Rusiyada ən güclü diaspora malik olan, bu ölkədə ictimai rəyin formalaşmasına təsir göstərə biləcək qüvvələrdən biri məhz azərbaycanlılar tərəfindən yaradılan müxtəlif ictimai təşkilatlardır. Rusiya ictimaiyyətinə uğurla inteqrasiya edən soydaşlarımız Azərbaycan barədə əsl reallıqların, onun mövcud inkişaf səviyyəsinin bu ölkədə mühüm təbliğat və təşviqatçısına çevrilmişlər.

Hazırda Rusiya və Azərbaycan arasında qarşılıqlı əlaqələrin inkişafında mühüm rol oynayan subyektlər qismində həm də ölkələrimizin müxtəlif rayon və şəhərləri çıxış edir. Onlar ümumi tərəqqiyə xidmət edən siyasətin vacib elementlərinə çevrilirlər, bir-biri ilə qurduğu münasibətlərlə əməkdaşlığa özünəməxsus töhfələr verirlər. Bu xüsusda Rusiya Federasiyasının Həştərxan şəhəri və burada artıq aparıcı qüvvələrdən birinə çevrilmiş Azərbaycan diasporunun fəaliyyəti xüsusi qeyd olunmalıdır. Ümumiyyətlə, Rusiyanın Həştərxan vilayəti, onunla eyni adı daşıyan şəhəri ilə Azərbaycanın tarix boyu mühüm əlaqələri olub və bunu şərtləndirən əsas səbəblərdən biri Xəzər dənizində olan sərhəd qonşuluğudur. Həştərxan şəhərində bu gün 25 mindən çox azərbaycanlı yaşayır və orada soydaşlarımızın formalaşdırdığı diaspor qüvvələri kifayət qədər fəallıq nümayiş etdirir, Azərbaycan reallıqlarının, buradakı dinamik inkişafın həm Rusiya, həm də dünya ictimaiyyətinə çatdırılmasında vacib rol oynayır.

Azərbaycan diasporu Həştərxanın vilayət rəhbərliyi və ictimaiyyəti tərəfindən ən etibarlı tərəfdaş və yaşanan inkişafa mühüm töhfələr verən zümrə kimi qəbul olunur. Bu mənada Azərbaycan barəsində yüksək fikirdə olan Həştərxan ictimaiyyətinin azərbaycanlılara və bütövlükdə ölkəmizə olan ehtiramının ən bariz nümunəsi bu şəhərdə ümummilli lider Heydər Əliyevin abidəsinin ucaldılmasıdır. 2010-cu il oktyabrın 27-də keçirilən abidənin açılış mərasimində iştirak edən Azərbaycan Respublikasının Prezidenti İlham Əliyev deyib: "Bu gün şəhərlərimizin, ölkələrimizin tarixində əbədi qalacaqdır. Əminəm ki, Rusiya ilə Azərbaycanı daha da yaxınlaşdırmaq üçün əlindən gələni etmiş Heydər Əliyevin obrazı ölkələrimiz və xalqlarımız arasında fəal əməkdaşlıq işində çox mühüm rol oynayacaqdır".

Qeyd edək ki, təkcə Azərbaycanda deyil, bütün postsovet məkanında böyük siyasi xadim kimi qəbul olunan Heydər Əliyevin abidəsinin Həştərxan vilayətində ucaldılması təsadüfi deyil. Çünki ulu öndər istər sovetlər, istərsə də postsovet dövründə Rusiya, eləcə də onun vilayətləri, o cümlədən Həştərxanla Azərbaycanın, onun ayrı-ayrı inzibati ərazi strukturlarının, xalqlarımızın qarşılıqlı münasibətlərinin inkişafına böyük töhfələr vermişdir. Odur ki, Heydər Əliyevin xatirəsi həştərxanlılar tərəfindən daim yüksək ehtiramla anılır. Ulu öndərin abidəsi isə dostluğun rəmzi kimi qiymətləndirilir.

Prezident İlham Əliyevin söylədiyi fikirlər çox qısa müddətdə real həyatda öz təsdiqini tapmağa başladı. 2011-ci il mayın 19-da "Rusiya və Azərbaycan: regionlararası əməkdaşlığın yeni üfüqlərinə doğru" mövzusunda keçirilən forum çərçivəsində Həştərxanın mərkəzində, Naberejnaya Privoljskovo Zatona küçəsində Heydər Əliyev adına parkın təntənəli açılışı olmuşdur. Parkın açılışı Azərbaycan və Rusiya dövlətləri, həmçinin onların xalqları arasında münasibətlərin, regionlararası əməkdaşlığın tarixində daha bir parlaq səhifədir. Bu, Rusiya-Azərbaycan dostluğunun xoş nişanəsidir. 3,5 hektar ərazidə salınmış istirahət parkında geniş abadlıq və yaşıllaşdırma işləri aparılmış, mindən artıq ağac əkilmişdir. Parkda müasir işıqlandırma sistemi quraşdırılmış, gözəl fəvvarə yaradılmış, oturacaqlar qoyulmuşdur. Azərbaycan hökumətinin təşəbbüsü ilə parkda həyata keçirilən yenidənqurma tədbirləri, görülən digər işlər Həştərxan şəhərinin simasına böyük yenilik gətirmiş, onu daha da gözəlləşdirmişdir. Elə həmin gün Rusiya və Azərbaycan Dostluq körpüsünün təməli qoyulmuşdur. Bu işlərin həyata keçməsində Bakı şəhəri Nərimanov rayonunun da böyük dəstəyi olmuşdur.

Heç şübhəsiz ki, Azərbaycan hökumətinin vəsaiti hesabına yaradılan bu park Həştərxan vilayəti üçün böyük töhfədir. Lakin Həştərxanda Azərbaycan tərəfinin təşəbbüs və iştirakı ilə görülən işlərin miqyası daha genişdir. Azərbaycan dövlətinin həyata keçirdiyi bu işlərə Heydər Əliyev Fondunun verdiyi hərtərəfli dəstək bütövlükdə Həştərxan ictimaiyyəti və burada yaşayan azərbaycanlılar tərəfindən böyük razılıqla qarşılanır. Həştərxanda Heydər Əliyevin adını daşıyan 11 nömrəli məktəbin yenidənqurulması bunun bariz nümunələrindən biridir. Ötən ilin oktyabrında yenidənqurma işlərindən sonra məktəbin təntənəli açılış mərasimi olmuşdur. Bu məktəbə Heydər Əliyevin adının verilməsi təklifi Azərbaycan dövlətinə hörməti və Heydər Əliyevin xatirəsinə ehtiram əlaməti olaraq, habelə ölkələrimiz arasındakı münasibətlərin dəstəklənməsi üçün həştərxanlılar tərəfindən irəli sürülmüşdür. Məktəbə Heydər Əliyevin adının verilməsi bu təhsil ocağının şagirdlərinin üzərinə həmişə və hər yerdə birinci olmaq kimi şərəfli və böyük məsuliyyət qoyur. Heydər Əliyev Fondunun təşəbbüsü ilə məktəb üzərində götürülmüş hamiliyin növbəti addımı kimi şagird və müəllimlərə xüsusi təqaüd və mükafatlar ayrılmışdır.

Həştərxan sakinləri, o cümlədən şəhər rəhbərliyi Azərbaycan dövlətinin, Prezident İlham Əliyevin və Heydər Əliyev Fondunun təşəbbüsü əsasında burada görülən işləri yüksək qiymətləndirir. Məhz bunun nəticəsidir ki, Həştərxan Şəhər Duması əsası ulu öndər Heydər Əliyev tərəfindən qoyulan Rusiya-Azərbaycan dostluğunun və strateji tərəfdaşlığın inkişafı və möhkəmlənməsində xidmətlərinə, Həştərxanda iri sosial-mədəni və iqtisadi layihələrlə bağlı təşəbbüslərinə, bu layihələri və Rusiyadakı Azərbaycan diasporunun fəaliyyətini dəstəkləməsinə görə Prezident İlham Əliyevi "Həştərxan şəhərinin fəxri vətəndaşı" adına layiq görmüşdür. Ötən il noyabrın 30-da ölkəmizdə səfərdə olan Həştərxan şəhərinin meri Sergey Bojenov "Həştərxan şəhərinin fəxri vətəndaşı" diplomunu və medalını Prezident İlham Əliyevə təqdim etmişdir.

Bu günlərdə isə biz Azərbaycan Respublikasının Həştərxan vilayəti ilə əməkdaşlığının dərinləşməsi və bütövlükdə Azərbaycan-Rusiya dostluğunun möhkəmlənməsi üçün daha bir tarixi əhəmiyyət daşıyan bir sıra hadisələrin şahidləri və bilavasitə iştirakçıları olduq. Sentyabrın 12-də Həştərxanda Heydər Əliyev Fondunun dəstəyi ilə inşa olunmuş Azərbaycan və Rusiya Dostluq körpüsünün və Heydər Əliyev parkında yaradılmış "Arzu" uşaq əyləncə şəhərciyinin açılışı, həmçinin Heydər Əliyev Fondunun növbəti layihələrindən biri olan Müqəddəs Knyaz Vladimirin məbədi önündə knyaz Vladimirin abidəsinin təməlqoyma mərasimləri keçirilmişdir. Mərasimlərdə Heydər Əliyev Fondunun vitse-prezidenti, Rusiyanın Azərbaycanlı Gənclər Təşkilatının (RAGT) sədri Leyla Əliyeva iştirak etmişdir. Həştərxan vilayətinin qubernatoru Aleksandr Jilkin körpünün açılmasını Həştərxan üçün mühüm tarixi hadisə kimi dəyərləndirərək bu humanitar layihənin reallaşdırılmasına görə Heydər Əliyev Fonduna və onun vitse-prezidenti Leyla Əliyevaya təşəkkürünü bildirmişdir.

Mərasimdə çıxış edən Heydər Əliyev Fondunun vitse-prezidenti Leyla Əliyeva fondun fəaliyyətindən söz açmış və Rusiya Federasiyasında həyata keçirilən layihələri yüksək qiymətləndirmişdir. Azərbaycanla Rusiya arasında əlaqələrin qarşılıqlı hörmətə, etimad və aşkarlığa əsaslandığını deyən Leyla Əliyeva münasibətlərin bundan sonra da inkişaf edəcəyinə və möhkəmlənəcəyinə əminliyini ifadə etmişdir.

Çıxışı zamanı Leyla Əliyeva Heydər Əliyev Fondunun geniş və çoxşaxəli fəaliyyəti barədə ətraflı məlumat verdi. Qeyd etdi ki, Heydər Əliyev Fondu uğurlu fəaliyyəti ilə Azərbaycan əhalisinin bütün təbəqələrinin dəstəyini və etimadını qazanmışdır. Heydər Əliyev Fondunun dünya mədəniyyətinə və tarixinə böyük hörmətlə yanaşdığını vurğulayan vitse-prezident bildirmişdir ki, fond dünyanın müxtəlif ölkələrində memarlıq abidələrini, tarixi binaları və muzeyləri, məktəbləri və s. bərpa edir. Məlum olduğu kimi, Heydər Əliyev Fondunun fəaliyyətinin mühüm istiqamətlərindən biri də ətraf mühitin mühafizəsidir. Bu barədə məlumat verən Leyla Əliyeva demişdir ki, fond bir il əvvəl "IDEA" adlı yeni beynəlxalq hərəkat yaratmışdır. Hərəkatın məqsədi planetimizi mühafizə etmək və gənclərə ekoloji problemlər barədə məlumat verməkdir. Bir il ərzində "IDEA" ağac əkilməsi, quş yuvalarının qurulması, konfransların və fotosərgilərin təşkili kimi bir sıra maraqlı və uğurlu layihələr həyata keçirmişdir. Leyla Əliyevanın bu barədə verdiyi məlumatlar mərasim iştirakçıları tərəfindən diqqətlə dinlənilmiş və alqışlarla qarşılanmışdır.

Dostluq körpüsü Heydər Əliyev parkını I Pyotr meydanı ilə birləşdirir. Körpünün sürahisinin ornamentlərində Bakının və Həştərxanın rəmzləri - Qız qalası və Həştərxan Kremli əks olunmuşdur. Knyaz Vladimirin abidəsi isə Azərbaycan və Rusiya xalqları arasında dostluğun növbəti rəmzinə çevriləcək. Abidənin inşası Heydər Əliyev Fondunun dəstəyi ilə həyata keçiriləcək. Heydər Əliyev parkında "Arzu" uşaq əyləncə şəhərciyi də Heydər Əliyev Fondunun dəstəyi ilə tikilmişdir. Burada 7 böyük və bir neçə kiçik attraksion quraşdırılmış, uşaqların istirahəti və təhlükəsizliyi üçün hər bir şərait yaradılmışdır.

Həştərxanda Heydər Əliyev Fondunun vitse-prezidenti Leyla xanım Əliyevaya "Həştərxan vilayəti qarşısında xidmətlərinə görə" ordeni medalının təqdim edilməsi mərasimi də olmuşdur. Bu mükafat Heydər Əliyev Fondunun Həştərxanda həyata keçirdiyi layihələrə verilən böyük dəyərin göstəricisidir.

Bu gün Azərbaycan diasporunu təmsil edən müxtəlif təşkilatlarla yanaşı, Rusiyanın Azərbaycanlı Gənclər Təşkilatının 350 nəfər gənci birləşdirən Həştərxan bölməsi də bu vilayətin ictimai-siyasi həyatında fəal iştirak edir. İndiyədək RAGT tərəfindən Həştərxanda çoxsaylı, o cümlədən təhsil sahəsində layihələr həyata keçirilmişdir. Həştərxan Vilayət Administrasiyası 2010-2011-ci illərin yekunlarına görə şəhərin gənclər təşkilatları arasında ən yüksək qiyməti məhz RAGT-nin regional bölməsinə vermişdir.

Həştərxana səfəri zamanı RAGT-nin Həştərxan bölməsinin üzvləri ilə görüşən Leyla Əliyeva bölmənin fəaliyyətini yüksək qiymətləndirmiş, dəyərli tövsiyələrini vermiş, RAGT-nin üzvlərinin suallarını cavablandırmışdır.

Bu gün Azərbaycanla Rusiya arasında münasibətlərin inkişafı öz növbəsində xalqlararası tarixi bağlılıq və dostluğu daha da dərinləşdirir. Sevindirici haldır ki, iki dövlətin dostluq əlaqələrindən irəli gələrək Həştərxan vilayəti ilə Bakının Nərimanov rayonu arasında da iqtisadi-siyasi və mədəni sahədə sıx əlaqələr var. Bununla yanaşı, Həştərxan şəhər təsərrüfatının və infrastrukturun yenidən qurulmasında, təhsil sahəsinin inkişaf etdirilməsində Azərbaycandan olan iş adamlarının iştirakı davamlı surətdə artır. Bütün bunlar isə ölkələrimiz və şəhərlərimiz arasında əlaqələrin daha da yaxşılaşması işinə xidmət edən əsas amillər sırasında yer alır.

Elvin HÜSEYNOV,

RAGT Həştərxan regional bölməsinin sədri

Azərbaycan.-2012.- 26 sentyabr.- S.3.