«Azərbaycanda media mühiti: mövcud durum və yeni çağırışlar» mövzusunda beynəlxalq konfrans keçirilir

Sentyabrın 25-də Beynəlxalq Mətbuat Mərkəzində Avropa İttifaqının (Aİ) Bakıdakı nümayəndəliyinin dəstəyi ilə "Azərbaycanda media mühiti: mövcud durum və yeni çağırışlar" mövzusunda beynəlxalq konfrans işə başlamışdır.

AzərTAc xəbər verir ki, "Etik jurnalistika təşəbbüsləri -Azərbaycan" layihəsi çərçivəsində təşkil olunan tədbirdə ölkəmizdə medianın mövcud vəziyyəti və problemləri barədə müzakirələr aparılmışdır.

Aİ-nin Azərbaycandakı nümayəndəliyinin rəhbəri, səfir Roland Kobia konfransda çıxış edərək, cəmiyyət və medianın qarşılıqlı münasibətlərindən danışmışdır. O bildirmişdir ki, inkişaf etmək istəyən cəmiyyət mütləq media ilə sıx ünsiyyətdə olmalı, onun imkanlarından faydalanmalıdır.

Aİ-nin fəaliyyətində prioritet istiqamətlərdən birinin media azadlığının məhdudlaşdırılmasına qarşı mübarizə olduğunu qeyd edən R.Kobia Azərbaycanda bu sahədə ciddi problemlərin olmadığını diqqətə çatdırmışdır. Son 20 ildə Azərbaycanın çox böyük uğurlara imza atdığını bildirən səfir qazanılan nailiyyətlərin, ölkədə bütün sahələrdə görülən işlərin mətbuatda geniş işıqlandırıldığını vurğulamış, bunu təqdirəlayiq hal kimi dəyərləndirmişdir.

R.Kobia demişdir ki, bu ilin noyabrında Azərbaycan internetin idarə olunması ilə bağlı beynəlxalq foruma ev sahibliyi edəcəkdir. Dünyanın nüfuzlu media qurumlarının, bir sıra beynəlxalq təşkilatların, o cümlədən Aİ-nin nümayəndələrinin iştirak edəcəkləri tədbirdə Azərbaycan dünya mediasının diqqət mərkəzində olacaqdır. Bu, ölkədə bir çox sahələrdə qazanılmış uğurların nümayiş etdirilməsi istiqamətində gözəl fürsət deməkdir. Jurnalistlərin həmin forumda fəal iştirak edəcəklərinə inamını bildirən R.Kobia media təmsilçilərinə işlərində müvəffəqiyyətlər arzulamışdır.

Prezident Administrasiyası ictimai-siyasi məsələlər şöbəsinin sektor müdiri Vüqar Əliyev bildirmişdir ki, Azərbaycan müstəqilliyini bərpa etdikdən sonra demokratiya, vətəndaş cəmiyyəti quruculuğu yolu ilə inkişafı özünün əsas hədəfi seçmiş, media azadlığının təməl prinsiplərinin bərqərar olunması üçün əlverişli mühitin yaradılması istiqamətində çox işlər görmüşdür.

Vüqar Əliyev demişdir ki, Azərbaycan Respublikasının 1995-ci ildə qəbul olunmuş Konstitusiyasında söz və məlumat azadlığı, jurnalist, media sərbəstliyi, fikir plüralizmi kimi fundamental prinsiplər əksini tapmışdır. 1998-ci ildə ölkəmizdə mətbuatın üzərində dövlət nəzarəti funksiyasını həyata keçirən təsisatın - senzuranın fəaliyyətinə xitam verilmişdir. Bununla yanaşı, jurnalistlərin, cəmiyyətin hökumətin əlində olan informasiyalara sərbəst çıxışını təmin etmək üçün mühüm bir qanun qəbul edilmişdir.

"Etik jurnalistika təşəbbüsləri - Azərbaycan" layihəsinin başlanması ilə əlaqədar Bakıya ilk dəfə 18 ay əvvəl gəldiyini qeyd edən Beynəlxalq Jurnalistlər Federasiyası baş katibinin müavini Oliver Money-Kyrle Azərbaycanda bu müddətdə böyük dəyişikliklərin baş verdiyini və bunları görməkdən məmnunluğunu bildirmişdir. O, layihənin son tədbiri olan konfransın uğurla başa çatacağına, öz məqsədlərinə nail olacağına əminliyini vurğulamışdır.

Azərbaycan Mətbuat Şurasının sədri Əflatun Amaşov, Kütləvi İnformasiya Vasitələrinə Dövlət Dəstəyi Fondunun rəhbəri Vüqar Səfərli, ATƏT-in Bakı ofisinin təmsilçisi Vüsal Behbudov ölkəmizdə medianın inkişafı istiqamətində görülən işlərdən danışmış, konfransın bu sahədə əhəmiyyətini qeyd etmişlər.

Sonra konfrans işini "Azərbaycanda media azadlığı: mövcud durum və yeni çağırışlar", "Etik jurnalistika standartlarının yaradılması" mövzularında bölmə iclaslarında davam etdirmişdir.

İclasda Ə.Amaşovun "Azərbaycanda media azadlığı və təhlükəsizliyi: mövcud durum və yeni çağırışlar", Böyük Britaniya Milli Jurnalistlər Birliyinin eksperti Arjuman Vajidin "Levensondan öyrənilmiş dərslər" mövzularında məruzələri dinlənilərək müzakirə edilmişdir.

Konfrans sentyabrın 26-da işini davam etdirəcəkdir.

Azərbaycan.-2012.- 26 sentyabr.- S.4.