Veteran güləşçilərimiz vətənə 2 medalla qayıtdılar

Sentyabrın 18-dən 22-dək Macarıstanın paytaxtı Budapeşt şəhərində veteranlar arasında yunan-Roma güləşi üzrə növbəti dünya çempionatı keçirilib. Azərbaycanın veteran güləşçilərinin də qatıldığı yarışda 38 dövlətin idmançıları mübarizə aparıb.

Ölkəmizi dünya çempionatında veteran idmançılarımızdan Tariel Məmmədov (58 kq), Əlisahib Əliabbasov (76 kq) və Rövşən İsmayılxanlı (97 kq) təmsil edib. Bu turnirdə Azərbaycan güləşçiləri vətənə 2 medalla qayıdıblar. 58 kq çəkidə mübarizə aparan Tariel Məmmədov gümüş medal qazaıb. 76 kq çəkidə isə tatami üzərinə çıxan Əlisahib Əliabbasov həmişəki kimi uğurlu nəticə göstərərək 6-cı dəfə bürünc medala sahib çıxıb.

Xüsusi olaraq qeyd edək ki, gümüş medal qazanan Tariel Məmmədovun rəqibləri sırasında Ermənistan güləşçisi də olub. Veteranlar arasında on qat dünya çempionu olan Jora Hovannesyan bu dəfə Tariel Məmmədovun qarşısında aciz qalıb. T.Məmmədov yalnız sonuncu görüşündə məğlub olaraq gümüş medala sahib çıxıb.

Bir çox yarışların mükafatçısı olan Əlisahib Əliabbasov isə ilk görüşündə rusiyalı idmançıya qalib gəlsə də, ikinci görüşdə estoniyalı güləşçiyə uduzub. Lakin təsəlliverici görüşdə idmançımız macar güləşçiyə qalib gələrək növbəti dəfə vətənə medalla qayıdıb.

Kürdəmir Peşə Liseyində uzun illər müəllim işləyən və gənc nəslin sağlam ruhda yetişdirilməsində böyük əməyi olan 57 yaşlı Əlisahib Əliabbasov idmançılarımız üçün örnək sayıla bilər.

Dünya çempionatında növbəti dəfə medallar qazanmış veteran güləşçilərimiz yarış qabağı onların hazırlığı üçün yaradılmış şəraitə görə "Ruslan-93" İdman Sağlamlıq Mərkəzinin rəhbərliyinə və MOİK-in məşqçilərinə minnətdarlıqlarını bildirirlər.

Azərbaycan.-2012.- 26 sentyabr.- S.8.