Ermənistan-Azərbaycan münaqişəsinin ədalətli həlli məsələsində Minsk qrupuna daxil olan ölkələr fəaliyyətlərini gücləndirməlidirlər

Sentyabrın 26-da Azərbaycan Respublikasının müdafiə naziri, general-polkovnik Səfər Əbiyev Amerika Birləşmiş Ştatlarının Azərbaycandakı səfiri Riçard Morninqstar ilə görüşmüşdür.

Müdafiə Nazirliyinin mətbuat xidmətindən AzərTAc-a bildirmişlər ki, nazir R.Morninqstarı səfir təyin olunması münasibətilə təbrik etmiş, ona diplomatik fəaliyyətində uğurlar arzulamışdır.

Görüşdə ABŞ ilə Azərbaycan arasındakı strateji əməkdaşlıq əlaqələrinin verdiyi yüksək nəticələr, eyni zamanda, hərbi sahədə əldə edilən nailiyyətlər barədə geniş fikir mübadiləsi aparılmışdır.

Regionda mövcud hərbi-siyasi vəziyyətə və Ermənistan-Azərbaycan münaqişəsinin yaratdığı çətinliklərə toxunan nazir Səfər Əbiyev problemin sülh yolu ilə, ədalətli həlli məsələsində Minsk qrupuna daxil olan ölkələrin fəaliyyətlərini gücləndirmələrinin zəruriliyini qeyd etmişdir. Nazir demişdir ki, işğal faktı aradan qaldırılmayacağı təqdirdə bütövlükdə Cənubi Qafqazda vəziyyətin daha təhlükəli xarakter alacağı qaçılmaz olacaqdır.

Azərbaycan.-2012.- 27 sentyabr.- S.3.