Azərbaycanda keçirilən «Türkiyə həftəsi»nin əsas məqsədi ölkələrimizin münasibətlərinin inkişafına dəstək verməkdir

Azərbaycan Respublikasının Prezidenti yanında Strateji Araşdırmalar Mərkəzinin (SAM) təşkilatçılığı ilə ölkəmizdə "Türkiyə həftəsi" çərçivəsində tədbirlərin yekunu ilə bağlı mətbuat konfransı keçirilmişdir.

AzərTAc xəbər verir ki, SAM-ın direktoru Fərhad Məmmədov "Türkiyə həftəsi" çərçivəsində Gəncə, Lənkəran və Ağdamda keçirilən tədbirlər barədə məlumat vermişdir. Bildirilmişdir ki, bu tədbirlərin keçirilməsinin əsas məqsədi Türkiyə-Azərbaycan münasibətlərinin inkişafına dəstək vermək, qarşılıqlı olaraq Azərbaycan və Türkiyə ictimaiyyətini bu istiqamətdə məlumatlandırmaqdır. Vurğulanmışdır ki, qonaqlar Ağdamda məcburi köçkünlərlə görüşmüş, onları narahat edən məsələlərlə maraqlanmışlar.

Qeyd edilmişdir ki, tədbirlərdə Türkiyə dövlət xadimlərinin, ekspertlərin Ermənistan-Azərbaycan münaqişəsi ilə bağlı fikirləri bizim üçün böyük əhəmiyyət daşıyır. Bu görüşlərdə Türkiyə-Ermənistan sərhədlərinin açılması ilə bağlı müxtəlif təşkilatların apardığı fəaliyyətlər də təhlil olunmuşdur.

F.Məmmədov qeyd etmişdir ki, SAM iki il əvvəl Türkiyə Xarici İşlər Nazirliyi yanında Strateji Araşdırmalar Mərkəzi (TXİN SAM) ilə əməkdaşlıq memorandumu imzalamış və ötən ilin oktyabrında Türkiyənin beş şəhərində "Azərbaycan həftəsi" keçirilmişdir.

Rəhbərlik etdiyi qurumun gələcək fəaliyyətinə toxunan F.Məmmədov cari ildə TXİN SAM ilə birgə bir sıra tədbirlərin keçiriləcəyini, SAM-ın bu sahədə yeni layihələr planlaşdırdığını da vurğulamışdır.

TXİN SAM-ın direktoru Bülənt Aras qardaş ölkələrimiz arasındakı əlaqələrin inkişafından danışmışdır. O demişdir ki, son dövrdə əlaqələrimiz bir-birinə sürətlə inteqrasiya edir. Beynəlxalq siyasətdə bu, özünü daha çox göstərir. Siyasi və iqtisadi əlaqələr daha da güclənir.

B.Aras demişdir ki, Türkiyədə "Azərbaycan həftəsi", Azərbaycanda isə "Türkiyə həftəsi" çərçivəsində keçirilən tədbirlərdən müsbət nəticələr əldə edilmişdir. Gələcəkdə hər iki qurumun birgə təşkilatçılığı ilə mütəmadi tədbirlər keçiriləcəkdir.

Ermənistan-Azərbaycan münaqişəsinin dünya ictimaiyyətinə çatdırılması istiqamətində təmsil etdiyi qurumun gördüyü işlərdən danışan B.Aras qeyd etmişdir ki, TXİN SAM bu sahədə bir sıra tədbirlər həyata keçirir.

Türkiyə Böyük Millət Məclisinin deputatı Tülay Salamoğlu bildirmişdir ki, bu il ölkəsində Xocalı soyqırımı ilə bağlı həyata keçirilən maarifləndirmə xarakterli aksiyada ictimaiyyət bu barədə geniş məlumatlandırılmışdır. Xocalı faciəsi insanlığa qarşı cinayətdir və bunu dünyaya bəyan edəcəyik. Sonda jurnalistlərin sualları cavablandırılmışdır.

Azərbaycan.-2012.- 27 sentyabr.- S.4.