Sumqayıtda «Şəhər günü» bayramı

Bütün bayramları bir-birindən maraqlı töhfələrlə qarşılamaq, onlara yeni çalarlar qatmaq Sumqayıtda artıq adət şəklini alıb. Sentyabrın 20-dən Sumqayıtda musiqi sədaları eşidilir, milli geyimli oğlan və qızlar şəhərin müxtəlif yerlərində qurulmuş meydanlarda rəqs edir, şənlənirlər. Sumqayıtda "Şəhər günü" bayramına bir neçə gün idi ki, hazırlıq gedirdi. Yaşı 60-ı keçən şəhərin sakinləri, dövlət və özəl müəssisələrin təmsilçiləri bu əlamətdar tədbirin maraqlı keçməsi üçün əllərindən gələni əsirgəmədilər.

Sentyabrın 26-ı səhər saatlarında ümummilli lider Heydər Əliyevin abidəsinin ucaldığı eyniadlı prospektdən "Şəhər günü" bayramına start verildi. Sumqayıt Şəhər İcra Hakimiyyətinin başçısı Eldar Əzizov və tədbirə dəvətli qonaqlar ulu öndərin abidəsi önünə çiçəklər düzdülər.

Tədbir daha sonra şəhərin Corat kəndində davam etdirildi. Qeyd edək ki, son dövrdə bu qəsəbədə xeyli abadlıq işləri aparılmış, yol infrastrukturu yeniləşmiş, sosial sahədə mühüm işlər görülmüşdür. Qəsəbənin girəcəyində ucaldılan qala divarları üzərinə düzülən toplar, keçmişi xatırladan bazar yeri, dəvə karvanı, şaqraq mahnılar tədbir iştirakçılarına tariximizi vərəqləməyə imkan verdi. Milli adət-ənənələrimizi əks etdirən sərgilər, onlarca eksponat tamaşaçıları gözəlliyi və qədimliyi ilə heyran qoydu.

Süvarilərin düzülüşü və dəvələrin keçidi elə nizamlanmışdı ki, sanki bu zəmanədən qopub 2000 il geriyə atılaraq, özün də hiss etmədən böyük bir təntənəli izdihamın iştirakçısına çevrilirdin. Mərasimə "dəvətli" məşhur Roma sərkərdəsi Pampeyin Corata səfəri aktyorlar tərəfindən elə gözəl oynanılırdı ki, tədbirə toplaşanlar heyranlıqlarını gizlədə bilmirdilər. Milli ordu əsgərlərinin nümayiş etdirdikləri qladiatorların döyüşləri və başqa səhnələr alqışlarla qarşılandı.

Müxtəlif nazirliklərin, respublikamızda olan xarici ölkələrin səfirliklərinin təmsilçilərinin, Milli Məclisin deputatlarının, qonşu rayonların icra başçılarının və ictimai təşkilatların nümayəndələrinin iştirak etdiyi "Şəhər günü" bayramı təzəcə istifadəyə verilmiş Bayraq meydanında davam etdirildi. Hərbçilərin keçidi ilə başlayan parad respublikamızın digər şəhər və rayonlarından tədbirə gələn qonaqların onlara qoşulması ilə davam etdi. İdmançılar, motosikletçilər, kartinqçilər, Rusiyanın "Barabançı qızlar"ı respublikamızın müxtəlif bölgələrinin musiqi kollektivləri bənzərsiz çıxışları ilə bayram iştirakçılarını valeh etdilər. Rusiyanın motosikletçilərdən ibarət qrupu tamaşaçılar qarşısında maraqlı nömrələrlə çıxış etdilər.

Şəhər sakinləri Sumqayıtda baş verən son dəyişiklikləri və bütün yenilikləri ürəkdən alqışladıqlarını, abadlıq-quruculuq işlərindən razı qaldıqlarını bildirdilər.

Ümummilli lider Heydər Əliyev tərəfindən "Kiçik Azərbaycan" adlandırılan Sumqayıt ulu öndərin ideyalarını reallaşdıran nümunə kimi intibah dövrünü yaşamaqdadır. Şəhər gənc olsa da, tarixə malikdir və böyük iqtisadi uğurlar qazanmışdır. Hazırda bu proses davam etməkdədir. Ulu öndərin Azərbaycana rəhbərlik etdiyi dövrdə Sumqayıt sosial-iqtisadi sahədə daha sürətlə inkişaf etmiş, qarşıda duran vəzifələrin uğurla yerinə yetirilməsində bütün imkanlarını səfərbərliyə almışdır.

Tədbir iştirakçıları ölkə başçısının tövsiyə və tapşırıqlarına həmişə dəstək verəcəklərini, bundan sonra da ön sırada olacaqlarını əminliklə vurğuladılar.

"Şəhər günü" xüsusi proqramla hazırlanmış möhtəşəm bayram konserti və atəşfəşanlıqla başa çatdı.

Akif ƏLİYEV

Azərbaycan.-2012.- 27 sentyabr.- S. 6.