Bakıda 18-ci Azərbaycan beynəlxalq səhiyyə sərgisi açılmışdır

Sentyabrın 27-də Səhiyyə Nazirliyinin dəstəyi ilə "İteca Caspian" şirkəti tərəfindən Bakı Ekspo Mərkəzində təşkil edilmiş 18-ci Azərbaycan beynəlxalq səhiyyə sərgisinin ("BİHE-2012") rəsmi açılışı olmuşdur.

AzərTAc xəbər verir ki, sərgiyə, həmçinin Azərbaycan Stomatoloji Assosiasiyası, Azərbaycan Respublikası Sahibkarlar (İşəgötürənlər) Təşkilatları Milli Konfederasiyası, Azərbaycanda İxracın və İnvestisiyaların Təşviqi Fondu (AZPROMO) da təşkilati dəstək göstərir.

Açılış mərasimində səhiyyə nazirinin müavini Elsevər Ağayev, Azərbaycan Stomatoloji Assosiasiyasının prezidenti Rəna Əliyeva, "İteca Caspian" şirkətinin prezidenti Fərid Məmmədov çıxış edərək, ölkəmizdə dövlət tərəfindən səhiyyəyə böyük diqqət və qayğı göstərildiyini bildirmiş, sərginin əhəmiyyətindən danışmışlar.

Vurğulanmışdır ki, bu sərgidə iştirak edən ölkələrin sayının ildən-ilə artması Azərbaycanda səhiyyə sahəsində sürətli inkişafın, o cümlədən ictimai-siyasi sabitliyin əyani sübutudur.

Bildirilmişdir ki, son illərdə Azərbaycanda 450-dən çox səhiyyə ocağı əsaslı təmir olunaraq, yaxud yenidən tikilərək istifadəyə verilmişdir. İlin sonunadək isə daha 15 tibb müəssisəsinin açılması gözlənilir.

Qeyd olunmuşdur ki, bu sərgi çərçivəsində dövlət qurumlarının nümayəndələri, tibbi avadanlıq və məhsulların istehsalçıları, həkimlər və tibb sənayesi mütəxəssisləri artıq 18-ci dəfədir bir məkana toplaşırlar. "BIHE-2012" sərgisi dünyanın 16 ölkəsindən 107 şirkəti bir araya gətirmişdir. İki gün ərzində Azərbaycan ilə yanaşı, Belçika, Belarus, Rusiya, İran və Türkiyə şirkətləri sərgidə müasir səhiyyə sahəsi üçün zəruri və tələb olunan ən yeni texnologiyaları nümayiş etdirəcəklər.

Məlumat verilmişdir ki, "BIHE-2012" sərgisi ilə eyni vaxtda daha iki tədbir - 7-ci Azərbaycan Beynəlxalq Stomatologiya sərgisi ("Stomatologiya Azerbaijan-2012") və 6-cı Azərbaycan Beynəlxalq Gözəllik və estetik tibb sərgisi ("Beauty Azerbaijan-2012") də keçiriləcəkdir.

Açılış mərasimindən sonra Qafqazın ən böyük səhiyyə sərgisi qapılarını iştirakçıların üzünə açmışdır.

Bu il sərgidə təqdim olunan məhsulların çeşidi xeyli genişləndirilmişdir. Sərgidə tibbi və laboratoriya avadanlıqları, əczaçılıq preparatları, dezinfeksiya vasitələri, ortopedik məhsullar, klinikalar üçün proqram təminatı və tibbi geyimlər təqdim olunur. Əczaçılıq bölməsində isə Rusiya Federasiyası, İran, Belarus, Suriya və Banqladeşin şirkətləri rəqabət aparırlar.

Sərgidə klinikaların ekspozisiyalarına daha geniş yer ayrılmışdır. Bu bölmədə Türkiyənin 5 müalicə və diaqnostika müəssisəsi iştirak edir. Bundan əlavə, sərginin tarixində ilk dəfə əksər Türkiyə klinikalarının üzv olduqları Türkiyənin Xarici İqtisadi Əlaqələr Komitəsi ayrıca stendlə iştirak edir.

"Beauty Azerbaijan-2012" sərgisində Azərbaycan ilə yanaşı, Belçika, İtaliya, Latviya və Rusiyanın qabaqcıl şirkətləri gözəllik salonları, fitnes-klublar, SPA mərkəzləri və bərbərxanaların işində tətbiq olunan məhsul və texnologiyaları təqdim edirlər.

"Stomatologiya Azerbaijan-2012" sərgisində isə implantologiya və dişlərin ağardılması sahəsində ən yeni texnologiyalar nümayiş etdirilir.

Azərbaycan.-2012.- 28 sentyabr.- S. 3.