Daşkənddə Azərbaycan şair və yazıçılarının bu il özbək dilində nəşr edilən kitablarının təqdimatı keçirilmişdir

Daşkənddəki Heydər Əliyev adına Azərbaycan Mədəniyyət Mərkəzində 2012-ci ildə paytaxtda özbək dilində çap edilən böyük Azərbaycan şairi İmadəddin Nəsiminin "Mən bu cahana sığmazam", Anarın "Qırmızı limuzin" kitabları, Elçinin "Cahan ədəbiyyatı" jurnalında verilən "Baladadaşın povestləri" əsərlərinin təqdimatı keçirilmişdir.

Təqdim olunan kitablar arasında hazırda Daşkənddə yaşayan şairə Səmayə Hüseynoğlunun Bakıda nəşr edilmiş "Bir topa buludam yağmamış" şeirlər toplusu da olmuşdur.

Mədəniyyət Mərkəzinin foyesində təqdimatı keçirilən əsərlərin sərgisi də açılmışdır.

"Cahan ədəbiyyatı" jurnalı baş redaktorunun müavini, yazıçı Mirpolat Mirzə Azərbaycan ədəbiyyatının dünya ədəbiyyatına verdiyi töhfələrdən danışmış, şair və yazıçılarımızın əsərlərinin özbək dilinə tərcüməsi haqqında məlumat vermişdir. Bildirilmişdir ki, Özbəkistanda Azərbaycan yazıçı və şairlərinin əsərlərinə həmişə böyük maraq olmuşdur.

Azərbaycan klassik poeziyasının gözəl bilicisi, alim və tərcüməçi İmadəddin Nəsiminin təqdimatı keçirilən "Mən bu cahana sığmazam" kitabını özbək dilinə çevirən Erqaş Oçilov bildirmişdir ki, özbəklər İmadəddin Nəsimini, Nizami Gəncəvini və Məhəmməd Füzulini heç də azərbaycanlılardan az sevmirlər. Sonra o, Nəsiminin şeirlərinin dünyəvi əhəmiyyəti haqqında danışmış, klassik Azərbaycan şairlərinin əsərlərinin Özbəkistanda öyrənilməsi və təbliği barədə məlumat vermişdir.

Jurnalist və tərcüməçi Rüstəm Cabbarov xalq yazıçısı Anarın "Qırmızı limuzin" kitabına daxil edilmiş hekayələri haqqında söhbət açmış, görkəmli ədibin Azərbaycan ədəbiyyatında yeri və rolunu şərh etmişdir.

Səmayə Hüseynoğlu "Bir topa buludam yağmamış" kitabına daxil edilmiş şeirlər, onların yazılma tarixi haqqında məlumat vermiş, topluya daxil olan şeirlərdən parçalar söyləmişdir.

Sonra tərcüməçilər - Usman Kuçkar, Rüstəm Cabbarov, Erqaş Oçilov və Erkin Usmanova, həmçinin təqdimatı keçirilən kitabları çap edən nəşriyyatın nümayəndələrinə səfirlik adından təşəkkür məktubları və hədiyyələr verilmişdir.

Tədbirin bədii hissəsində Daşkənd Mədəniyyət Kollecinin tələbələri Məhəmməd Füzulinin qəzəllərinə bəstələnmiş mahnılar, "Azərbaycan qızları" rəqs ansamblının üzvləri milli rəqslərimizi ifa etmişlər.

Qulu KƏNGƏRLİ,

AzərTAc-ın xüsusi müxbiri

Azərbaycan.-2012.- 30 sentyabr.- S.7.