Professor Cahangir Məmmədlinin anadan olmasının 70 illiyi qeyd edilmişdir

Bakı Dövlət Universitetinin (BDU) kafedra müdiri, filologiya elmləri doktoru, İctimai Televiziya və Radio Yayımları Şirkəti Yayım Şurasının sədri, professor Cahangir Məmmədlinin anadan olmasının 70, elmi-pedaqoji fəaliyyətinin 45 illiyi qeyd edilmişdir.

Bakı Dövlət Universitetinin Mətbuat və informasiya şöbəsindən AzərTAc-a bildirmişlər ki, yubiley mərasimində BDU-nun rektoru, Milli Məclisin deputatı, akademik Abel Məhərrəmov professor C.Məmmədlinin elmi-pedaqoji fəaliyyətindən, jurnalistika təhsilinə verdiyi dəyərli töhfələrdən, yüksək ixtisaslı kadrların hazırlanmasındakı xidmətlərindən danışmışdır.

Rektor mətbuat tarixi, jurnalistikanın nəzəriyyəsi və təcrübəsi problemləri ilə məşğul olan alimin tədqiqat əsərlərinin əhəmiyyətini vurğulamışdır.

BDU-nun Jurnalistika fakültəsinin dekanı, professor Yalçın Əlizadə və digər alimlər də professor Cahangir Məmmədlinin jurnalistika təhsilinin inkişafındakı səmərəli rolundan, qazandığı elmi nailiyyətlərdən bəhs etmiş, ona yeni uğurlar arzulamışlar.

Professor C.Məmmədli ona göstərilən diqqətə görə təşəkkürünü bildirmişdir.

Azərbaycan.- 2012.- 26 yanvar.- S. 7.