Avropa Şurası Venesiya Komissiyasının üzvləri Milli Məclisdə olmuşlar

Aprelin 11-də Milli Məclisin Hüquq siyasəti və dövlət quruculuğu komitəsinin sədri Əli Hüseynli və İnsan hüquqları komitəsinin sədri Rəbiyyət Aslanova Azərbaycanda səfərdə olan Avropa Şurası Venesiya Komissiyasının üzvləri ilə görüşmüşlər.

AzərTAc xəbər verir ki, Əli Hüseynli Azərbaycan parlamenti ilə Venesiya Komissiyası arasındakı əməkdaşlıqdan danışmışdır. Qeyd olunmuşdur ki, Azərbaycan Avropa Şurasına tam hüquqlu üzv olarkən götürdüyü öhdəlikləri layiqincə yerinə yetirir. Komitə sədri parlamentin qanun yaradıcılığı prosesi, milli qanunvericiliyin Avropa standartlarına uyğunlaşdırılması sahəsində görülən işlərdən, əldə olunan nailiyyətlərdən söhbət açmışdır.

Rəbiyyət Aslanova Venesiya Komissiyası ilə Milli Məclis arasında mövcud olan ənənəvi dostluq münasibətlərinin yüksək qiymətləndirildiyini vurğulamışdır. Nəzərə çatdırılmışdır ki, Azərbaycan parlamenti qanunvericilik prosesində beynəlxalq hüququn norma və prinsiplərinə hörmətlə yanaşır, Venesiya Komissiyasının qanun yaradıcılığı sahəsində məsləhət və tövsiyələrini nəzərə alır. Ölkəmizdə insan hüquq və azadlıqlarının daha təkmil şəkildə qorunması istiqamətində bütün zəruri addımlar atılır.

Avropa Şurası Venesiya Komissiyasının üzvü Herdis Torgeirsdottir səmimi görüş üçün təşəkkürünü bildirmiş, Bakıda səmərəli görüşlər keçirdiklərini demişdir. Görüşdə qarşılıqlı maraq doğuran bir sıra məsələlər barəsində də fikir mübadiləsi aparılmışdır.

Azərbaycan.- 2013.- 12 aprel.- S. 2.