Beynəlxalq Avrasiya Mətbuat Fondunun nümayəndə heyəti BMT-nin Avropa İqtisadi Komissiyasının 65-ci sessiyasında iştirak etmişdir

Beynəlxalq Avrasiya Mətbuat Fondunun (BAMF) sədri Umud Rəhimoğlu, qurumun proqramlar və xarici əlaqələr departamentinin rəhbəri Nick Nvolisa BMT Avropa İqtisadi Komissiyasının (BMT AİK) 65-ci sessiyasında iştirak etmişlər.

BAMF-nin informasiya departamentindən AzərTAc-a bildirmişlər ki, tədbirdə BMT AİK-nın 2015-ci ildən sonrakı strategiyasının prioritetlərinin müəyyənləşdirilməsi və davamlı inkişaf məqsədləri müzakirə olunmuşdur. Müzakirələrdə davamlı yaşıl iqtisadiyyat, səmərəli sosial inkişaf və onun təmin edilməsinə ədalətli effektiv siyasi iradənin istifadəsi, davamlı inkişafa münasibətdə innovativ elm və texnologiyaların rolu, sosial və ətraf mühit amilləri kimi məsələlərə toxunulmuşdur.

Nümayəndə heyəti 2015-ci ildən sonrakı prosesi, eləcə də davamlı inkişafın balanslaşdırılmış iqtisadi, sosial və ətraf mühit inteqrasiyasının təmin edilməsinin müxtəlif aspektləri ilə bağlı müzakirələri diqqətlə izləmişdir. Artıq BMT regional ofislərinin təşəbbüsü ilə başlayan müxtəlif dialoqlar və BAMF-nin də fəal iştirak edəcəyi bir neçə milli fəaliyyət sahələri müəyyən edilmişdir.

BAMF-nin təmsilçiləri sessiya çərçivəsində Davamlı İnkişaf Uğrunda Şimal Alyansının (ANPED) icraçı direktoru xanım Leyda Riynxut, BMT Ətraf Mühit Proqramı ofisinin regional əlaqələndiricisi Vudvosen Asnaken və Beynəlxalq Sülh Bürosunun icraçı katibi ilə görüşlər keçirmiş, "Cmedia" təşkilatının ofisində olmuşlar.

Görüşlərdə 2015-ci ildən sonrakı prosesə və Davamlı İnkişaf Məqsədləri ilə bağlı müzakirələrə daha çox vətəndaş cəmiyyəti təşkilatının cəlb edilməsinin vacibliyi vurğulanmışdır. Həmçinin ANPED-nin Bakıda regionlardan olan QHT-lər üçün seminar təşkil etməsi qərara alınmış, BAMF ilə "Cmedia"nın əməkdaşlıq məsələləri, Bakıda sülh və enerji mövzusunda keçiriləcək konfransın detalları barədə müzakirələr aparılmışdır.

BAMF BMT-nin İqtisadi və Sosial Şurasının (ECOSOC) xüsusi məşvərətçi statusla üzvü olan qeyri-hökumət təşkilatıdır. Bu, fonda BMT-nin əksər iclaslarında, sessiyalarında və dialoqlarında iştirak etmək, müəyyən hallarda isə proqram bəyanatı ilə çıxış etmək hüququ verir. BAMF medianın inkişafı, qaçqınlar və məcburi köçkünlərlə iş, icmaların inkişafı, sülh quruculuğu və münaqişələrin həlli istiqamətlərində fəaliyyət göstərir.

Azərbaycan.- 2013.- 11 aprel.- S. 7.