Rüstəm İbrahimbəyovun mövqeyi düşmən münasibətinin göstəricisidir

Rüstəm İbrahimbəyovun Rusiyanın "Rosbalt" agentliyinə verdiyi müsahibə ilə tanış olduqdan sonra onunla Əkrəm Naibovun arasında heç bir fərqin olmadığı aydın sezilir. Əksinə doğmalıqlar qabarır. Azərbaycanın ədəbi mühitindən didərgin düşən bu iki "ziyalı" ideal axtarışlarında öz simalarını itirdilər.

Onlar vətən, millət sevgisi ilə pərdələndikcə, cildlərini dəyişdikcə əsl mahiyyətləri bütün çılpağı ilə üzə çıxdı. Rüstəm İbrahimbəyov bilməlidir ki, bəşəri sevgi bir dövlətdə oturub başqa bir dövlətin maraqları naminə Vətənə barmaq silkələmək deyil. İlk növbədə doğulduğun torpağa, aid olduğun xalqa, onun tarixinə və yaşadığı iztirablara rəğbətlə yanaşmalısan. Bütün sevgilər doğulduğun torpağa sədaqətdən boy verib ucalır. Rüstəm İbrahimbəyov millət sevgisini Azərbaycanda qan tökən erməni millətçilərinin Bakı nisgili ilə ölçür. Amma düşünmür ki, ədib ağlı, istedadı və bir də doğulduğu torpağa sevgisi, sədaqəti ilə ucalır. Bu sədaqəti əsassız nifrətə, iddialara, ittihamlara çevirənlər oturduğu budağı baltalayanlara bənzəyirlər.

Təəssüf ki, son zamanlar bəzi "ziyalılar"ın antiazərbaycançı şəbəkəyə "köç" etmələri və burada "döyüşmələri" açıq-aydın görünür. Öz ambisiyalarında ifrata varan bu "ədiblər" nə qədər gülünc görünsələr də, müəmmalı iddialarında israrlıdırlar. Bumudur bəşəri sevgi? Bəşəri sevgi özündən, vətənindən və genetik yaddaşına hopan min ilin vərdişlərindən imtina edib vətəni ittiham etmək deyil.

"Daş yuxular"ı dərc edən Rusiya niyə Rüstəm İbrahimbəyovun "Rosbalt" agentliyinə verdiyi müsahibəni də mətbuata çıxarmasın!? Geninə-boluna şimal qonşumuzun mətbuatını bəzəyən həmin yazıda nə yazıq ki, Azərbaycan sevgisi yoxdur. Azərbaycanlı "ziyalı"nın müsahibəsindən öyrəndik ki, Dağlıq Qarabağ vilayəti Azərbaycandan daha çox Ermənistana aid imiş. Məgər erməni millətçiləri yüz ildir ki, bunu demirlər? Bir az da irəli gedərək erməniləri bu münaqişənin günahsız qurbanları hesab edən R.İbrahimbəyov onlarla dostuq və mehribanlıqdan ağızdolusu danışır. Bizi ermənilərlə tələsik dostluğa çağıran Rüstəm görəsən hansı xalqın, hansı dövlətin maraqlarını qorumağa can atır.

Bu müsahibə yadımıza bir neçə il öncə Rüstəm İbrahimbəyovun ermənilərin Bakını tərk etməsindən necə təəssüfləndiyi ilə bağlı verdiyi müsahibəsini salır. Həmin yazıda vurğulanırdı ki, ermənilər Bakını tərk etdikdən sonra paytaxtın intellektual potensialı xeyli aşağı düşüb. Kinorejissorun Əkrəm Naibovun xəyanətinə münasibətdə erməni millətçilərinə mələk qiyafəsi geyindirən yazıçını dəstəklədiyini bəyan etməsi də onunla bir mövqedə olmasını göstərir. Pasportunda Azərbaycan vətəndaşı yazılan insanların, "ziyalı"ların mənsub olduqları xalqa qarşı belə laqeyd və amansız mövqedə dayanmaları milyondan çox qaçqın və məcburi köçkünün, vətən uğrunda savaşda sağlamlığını itirmiş insanların, şəhidlərimizin ruhuna hörmətsizlikdir.

Tarix boyu qaraca daşlarımızın altında yatan sarıca ilanlar bizi dostluq mahnılarıyla, şüarlarıyla ovsunlayıb çalmağa can atıblar. Müsahibəsində də xalqlar dostluğundan qalxan tutan Rüstəm İbrahimbəyova görə bu münaqişədə ermənilər azərbaycanlılar qədər əziyyət çəkib. 25 ildən çox işğal altında qalan Azərbaycan torpaqları haqqında, şəhid olmuş 30 minə yaxın insan haqqında bir kəlmə kəsmədən özünü Azərbaycan xalqının ziyalısı kimi təqdim edir. Hər cümləsinin başında bu vətəndaşın Azərbaycana aid olduğu deyil, Ermənistana sevgisi olduğu anlaşılır. Deyir ki, ittifaq altında yaşadığımız zamanlarda xalqlar arasında torpaq iddiası olmamışdır. Görünür, Rüstəm müəllim ya tarixi bilmir, ya da şimaldan cənubda gedən torpaqlar görünmür.

Elə isə onun nəzərinə çatdırmaq yerinə düşər ki, ittifaq dövrü ermənilərin azərbaycanlılar üzərinə güclü şəkildə qalxmağa hazırlaşdığı ən təhlükəli dövr olub. Sadəcə bunu biz bilməmiş, görməmişik. Ermənistana aid ASALA və bir neçə qanlı terror təşkilatları məhz SSRİ-nin "çiçəkləndiyi" zamanda yaradılıb. İçlərindəki Azərbaycana olan düşmən hissini, torpaq iddiasını ortaya qoymaq üçün fürsət gözləyirdilər ki, o da ittifaqın dağılması idi. Hələ bir bayraq altında yaşadığımız illərdə dəfələrlə Ermənistanda yaşayan soydaşlarımız öldürülüb. Məgər toy günü gəlinlə bəyin başı kəsildiyi tarix yadınızda deyilmi, Rüstəm müəllim?

Rüstəm İbrahimbəyovun müsahibəsində nümayiş etdirdiyi ermənipərəst mövqe Azərbaycan vətəndaşları, eləcə də vətəndaş cəmiyyətlərinin nümayəndələri tərəfindən etirazla qarşılanıb. Vətəndaşlar özünü azərbaycanlı adlandıran bir insanın milləti haqqında bu şəkildə danışmasına təəssüf bildirirlər. Bu münasibət xalqına olan sevginin deyil, düşmən münasibətin göstəricisidir, milli maraqlarımıza ziddir. Bu gün özünü ziyalı adlandıran insanların vətən haqqında bu şəkildə danışmaları təəccüb və hiddət doğurur. Onlar daha çox milli dəyərləri heçə endirən və düşmən əlində oyuncağa çevrilən aldanmış kəvakibləri xatırladırlar.

Rəsmiyyə RZALI.

Azərbaycan.- 2013.- 11 aprel.- S. 8.