Sankt-Peterburqda Azərbaycanlıların Soyqırımı Gününə həsr edilmiş elmi-praktik konfrans keçirilmişdir

Martın 31-də Sankt-Peterburqda Azərbaycanlıların Soyqırımı Gününə həsr edilmiş elmi-praktik konfrans keçirilmişdir. AzərTAc xəbər verir ki, tədbir Azərbaycanın Sankt-Peterburqdakı Baş konsulluğu və "Vətən" ictimai təşkilatı tərəfindən təşkil edilmişdir.

Baş konsul Qudsi Osmanov tədbirdə çıxış etmişdir. O, XX əsrin əvvəlində baş vermiş faciəli hadisələrə toxunmuş, dünyanın bütün ölkələrində yaşayan azərbaycanlılar tərəfindən ölkə reallıqlarının dünyaya çatdırılması üçün aparılan təbliğat işinin əhəmiyyətini vurğulamışdır. Baş konsul Heydər Əliyev Fondunun vitse-prezidenti Leyla Əliyevanın təşəbbüsü ilə keçirilən "Xocalıya ədalət" kampaniyasının uğurlarını xüsusi qeyd etmişdir.

"Vətən" ictimai təşkilatının rəhbəri Məzahir Həsənov bu gün erməni işğalı altında olan qədim Azərbaycan əraziləri haqqında söhbət açaraq qeyd etmişdir ki, azərbaycanlıların gənc nəsli harada yaşamasından asılı olmayaraq öz tarixini bilməlidir.

Digər natiqlər işğal edilmiş ərazilərdə ermənilərin özbaşınalıqlarından söhbət açaraq, gəncləri Azərbaycan tarixini daha fəal öyrənməyə çağırmışlar.

Azərbaycan diasporunun və gənclərin fəal nümayəndələri belə tədbirlərin keçirilməsinin əhəmiyyətini vurğulamışlar.

Sonda "Ermənilərin Azərbaycan ərazilərinə köçürülməsi. Azərbaycanlıların soyqırımı" adlı sənədli film nümayiş etdirilmişdir. Tədbir çərçivəsində Azərbaycanın tarixinə həsr edilmiş fotosərgi təşkil edilmişdir.

Azərbaycan.-2013.- 2 aprel.- S.4.