Azərbaycanla Kanada parlamentləri arasında əlaqələr genişlənir

Dünən Azərbaycanda səfərdə olan Kanada parlamentinin hakim Mühafizəkarlar Partiyasının üzvlərindən ibarət nümayəndə heyəti Milli Məclisdə görüşlər keçirib.

Siyasi partiyaların rəhbərləri ilə keçirilən görüşdə Yeni Azərbaycan Partiyasının icra katibinin müavini Mübariz Qurbanlı qonaqlara ətraflı məlumat verib. M.Qurbanlı bildirib ki, Azərbaycan parlamentində 11 siyasi partiya təmsil olunur. Ölkəmizin Kanada ilə mövcud olan əlaqələrə böyük önəm verdiyini deyən deputat vurğulayıb ki, hazırda iki dövlət arasında bir çox sahələrdə əməkdaşlıq davam edir. Bu səfər isə ikitərəfli əlaqələrin daha da möhkəmlənməsinə böyük töhfə olacaq.

Kanada nümayəndə heyətinə başçılıq edən parlamentin İcmalar Palatası sədrinin müavini, Kanada-Azərbaycan parlamentlərarası dostluq qrupunun sədri Barri Devolin isə qeyd edib ki, bir həftəlik səfər müddətində onlar çox mühüm görüşlər keçirməyi planlaşdırırlar. Azərbaycandakı sürətli iqtisadi inkişaf onlarda məmnunluq hissi yaradıb. Kanada parlamentinin strukturu barədə danışan B.Devolin bildirib ki, parlament 2 palata - yuxarı və aşağı palatalardan ibarətdir. Ölkədə çoxlu sayda siyasi partiya olsa da, parlamentdə təmsil olunmaq çətindir. Çünki hər hansısa bir partiya parlamentdə rəsmən tanınmaq üçün ən azı 12 yerə sahib çıxmalıdır. Hazırda parlamentdə 5 siyasi partiya təmsil olunsa da, onlardan 3-ü rəsmən tanınır. Hakimiyyətdə olan partiya Mühafizəkarlar Partiyasıdır. Yeni Demokratlar Partiyası isə ana müxalifət hesab olunur. Digər özəllik isə parlament sədri və müavinlərinin müstəqil olmasıdır. Yəni sədr və müavinlər neytral mövqedə dayanmalıdırlar.

2011-ci ilin noyabrından dostluq qrupunun sədri kimi fəaliyyət göstərən Barri Devolin onu da bildirib ki, səfərin əsas məqsədi iki ölkənin parlamentləri arasında əlaqələrin genişləndirilməsi, Yeni Azərbaycan Partiyası ilə təmasların möhkəmləndirilməsi, ölkə və regiondakı vəziyyətlə tanışlıq və ümumən ikitərəfli əlaqələrin inkişaf perspektivlərinin müzakirəsidir.

Sonra çıxış edən İcmalar Palatasının üzvü Vladislav Lizon, senatorlar Yona Martin və Salma Atullahcan bu səfərin əhəmiyyətindan danışaraq bu əlaqələrin hər iki ölkəni bir-birinə daha da yaxınlaşdıracağını vurğulayıblar.

Görüşdə çıxış edən dostluq qrupunun üzvləri, Milli Məclisin deputatları Fərəc Quliyev, Asim Mollazadə, İlyas İsmayılov qonaqlara Azərbaycan həqiqətləri, Ermənistan-Azərbaycan, Dağlıq Qarabağ münaqişəsi, Xocalı soyqırımı ilə bağlı ətraflı məlumat veriblər.

Rəşad BAXŞƏLİYEV

Azərbaycan.-2013.- 5 aprel.- S.3.