Kənd təsərrüfatı naziri Salyanda aran bölgəsində yaşayan vətəndaşlar ilə görüşmüşdür

Aprelin 5-də kənd təsərrüfatı naziri İsmət Abasov Salyan rayon ərazi kənd təsərrüfat idarəsində Salyan, Sabirabad, Hacıqabul, Saatlı, Biləsuvar, Neftçala, Cəbrayıl rayonlarının vətəndaşları ilə görüşmüşdür.

AzərTAc xəbər verir ki, qəbulda bölgənin 100-dən çox sakini iştirak etmişdir.

Qəbulda iştirak edən sakinlər əsasən kənd təsərrüfatı məhsulları istehsalının ayrı-ayrı sahələrində qarşıya çıxan problem və çətinliklərin həlli ilə bağlı kömək istəmiş, səmərəli təkliflər irəli sürmüşlər.

Müraciət edən vətəndaşlar texniki peşə xidmətlərinin xidmət tarif dərəcələrinin 15-20 faiz aşağı salınması, subsidiyaların birləşdirilərək ildə bir dəfə verilməsi, mineral gübrələrin qiymətlərinin 30-40 faiz aşağı salınması, rayonlarda müasir avadanlıqlarla təmin edilmiş aqrokimya laboratoriyaların yaradılması, məhsul tədarükü məntəqəsi və bazalarının yaradılması, kənd təsərrüfatı məhsulları istehsalçılarını kreditləşdirən kredit bankının yaradılması və digər məsələlərlə bağlı kömək istəmişlər.

Qəbul zamanı vətəndaşları narahat edən məsələlərin bir neçəsi yerindəcə həll olunmuş, digər müraciətlər isə müvafiq qurumlara çatdırılmaq üçün qeydə alınmışdır.

Azərbaycan.- 2013.- 6 aprel.- S. 6.