Azərbaycanın tolerantlıq mühiti yüksək qiymətləndirilmişdir

Azərbaycanda səfərdə olan Kanada parlamenti İcmalar Palatası sədrinin müavini, Kanada-Azərbaycan dostluq qrupunun sədri Barri Devolinin başçılıq etdiyi nümayəndə heyəti aprelin 5-də Dini Qurumlarla İş üzrə Dövlət Komitəsinin (DQİDK) sədri Elşad İskəndərov ilə görüşmüşdür.

AzərTAc xəbər verir ki, görüşdə Azərbaycanda mövcud tolerantlıq mühiti, dinlərarası münasibətlər ətrafında fikir mübadiləsi aparılmışdır.

Dini Qurumlarla İş üzrə Dövlət Komitəsinin sədri Elşad İskəndərov Kanada ilə Azərbaycan arasında mövcud olan dostluq münasibətlərinin hazırkı durumundan məmnunluğunu ifadə etmişdir. E.İskəndərov Kanadanın beynəlxalq platformada Azərbaycanın haqlı mövqeyinə, ölkəmizin ərazi bütövlüyünə verdiyi dəstəyə görə təşəkkürünü bildirmişdir.

Daha sonra E.İskəndərov Azərbaycanda dövlət-din münasibətləri, DQİDK-nın son vaxtlar gördüyü işlər, dini maarifləndirmə sahəsində yeni təşəbbüslər, dövlətimizin milli-mənəvi və dini-tarixi dəyərlərin qorunması, inkişaf etdirilməsi istiqamətində dəstəyi barədə ətraflı məlumat vermişdir.

Öz növbəsində, qonaqlar Azərbaycana səfərdən məmnunluqlarını ifadə etmişlər.

Kanada parlamenti İcmalar Palatası sədrinin müavini, Kanada-Azərbaycan dostluq qrupunun sədri Barri Devolin Azərbaycandakı mövcud tolerantlıq mühiti barədə məlumatlı olduğunu bildirmiş və bunu yüksək qiymətləndirmişdir.

Azərbaycan.- 2013.- 6 aprel.- S. 11.