Azərbaycan ilə Türkiyə arasında enerji sahəsində əməkdaşlıq yüksələn xətlə inkişaf edir

Azərbaycan Respublikası Dövlət Neft Şirkətinin (ARDNŞ) Türkiyədə həyata keçirdiyi iqtisadi layihələr iki qardaş ölkənin inkişafı üçün böyük əhəmiyyət daşıyır.

AzərTAc xəbər verir ki, bu fikirlər Bakıda keçirilən "Cənubi Qafqazın və Mərkəzi Asiyanın gələcəyi ilə bağlı strateji dialoq" mövzusunda Dünya İqtisadi Forumunda iştirak edən Türkiyənin energetika və təbii ehtiyatlar naziri Taner Yıldız ilə ARDNŞ-in prezidenti Rövnəq Abdullayevin görüşündə səslənmişdir.

ARDNŞ-in Türkiyədə həyata keçirdiyi layihələr üzrə işlərin gedişi haqqında qonağa ətraflı məlumat verilmişdir.

Yenidən Bakıda olmasından məmnunluğunu ifadə edən Taner Yıldız İqtisadi Forumun yüksək səviyyədə təşkil olunduğunu qeyd etmiş, qonaqpərvərliyi üçün Azərbaycan dövlətinə minnətdarlığını bildirmişdir. O, ARDNŞ-in Azərbaycan ilə Türkiyə arasında enerji sahəsində əməkdaşlığın inkişaf etməsində rolunu yüksək qiymətləndirmiş, şirkətin Türkiyədə gerçəkləşdirdiyi layihələrin iki qardaş ölkənin iqtisadi yüksəlişi üçün əhəmiyyətini vurğulamışdır.

Azərbaycan.- 2013.- 9 aprel.- S. 8.