Aleksey Kudryavtsev: “Biz zəngin təcrübəmizi Azərbaycanda da tətbiq edə biləcəyimizə ümid bəsləyirik”

"Biz zəngin təcrübəmizi Azərbaycanda da tətbiq edə biləcəyimizə ümid bəsləyirik".

Bu sözləri "AİTF-2013" XII Azərbaycan Beynəlxalq turizm və səyahətlər, "HOREX Caucasus 2013" VII Qafqaz Beynəlxalq mehmanxana, restoran və supermarketlər üçün avadanlıq və ləvazimatlar sərgilərinin iştirakçısı, "WANZL" şirkətinin Rusiya Federasiyasındakı nümayəndəliyinin rəhbəri Aleksey Kudryavtsev AzərTAc-a müsahibəsində demişdir

Qonaq qeyd etmişdir ki, "WANZL" şirkəti alış-veriş arabalarının istehsalı üzrə dünya lideridir. Biz Almaniya, Fransa, Çexiya, Çin və ABŞ-da il ərzində 2,5 milyondan çox araba istehsal edirik. Bu gün bizim stendimizdə istehsal etdiyimiz məhsulların nümunələrini, eləcə də mehmanxana avadanlıqlarını görə bilərsiniz.

Məhsullarımız arasında yüklər, mehmanxana xidmətçiləri, camaşırların toplanması və s. üçün səyyar servis səbətlərinin tam çeşidi mövcuddur. Metal, taxta və plastik materialların emalı üzrə üsullarımız sayəsində şirkətimiz universal sistemlər təklif etməklə yanaşı, həmçinin müştərilərin fərdi tələblərini yerinə yetirmək üçün ən yeni ideyaları da yerinə yetirir.

Müştərilər yüksək keyfiyyətə, eksklüziv dizayna və məşhur istehsalçı brendlərin zəmanətinə malik məhsullar əldə etmək arzusundadırlar. Biz mağazaların avadanlıqlarla təchiz edilməsi sahəsində ticarət zonasının dizaynının işçi konsepsiyasından tutmuş layihənin tam şəkildə həyata keçirilməsinə qədər kompleks həll variantları təklif edirik.

Azərbaycan paytaxtında ilk dəfə olduqlarını deyən A.Kudryavtsev bildirmişdir ki, "Bakı Ekspo" sərgi və toplantı mərkəzi bizim çox xoşumuza gəlir. Burada infrastruktur çox münasibdir və təşkilatçılıq yüksək səviyyədədir. Stendlərdə heç bir problemlə qarşılaşmırıq və buna görə də əminliklə ilk müştərilərimizi gözləyirik. Həmçinin biz yerli sahibkarlarla əməkdaşlığın perspektivlərinə əminik. Çünki biz burada yaxşı potensialın olduğunu görürük. Ölkəniz dinamik şəkildə inkişaf edir və insanların rifah səviyyəsi getdikcə yüksəlir. Məhz buna görə də yerli bazarla qarşılıqlı səmərəli əlaqələr üçün ümid yaranır.

Azərbaycan.- 2013.- 9 aprel.- S. 9.