Bütün gələcək
həyatımı müəyyən edən həlledici
bünövrə
Müasir Azərbaycan
Respublikasının ictimai, siyasi, mədəni həyatındakı
bütün həlledici qələbələri bilavasitə
ölkə tarixinə parlaq səhifələr
yazmış qüdrətli dövlət xadimi, ümummilli
lider Heydər Əliyevin adı ilə, onun otuz beş il
müddətində davam edən səmərəli
dövlətçilik fəaliyyəti ilə bağlı
olduğu inkaredilməz həqiqətdir. Bu
böyük Azərbaycan oğlu titanik zəhməti, tükənməz
enerjisi və işıqlı zəkası ilə
bütün ömrünü vətənə, dövlətə
həsr etmiş, zamanın ən çətin
sınaqlarında, həyatın ən mürəkkəb
anlarında fitri xilaskarlıq missiyası ilə xalqının
köməyinə gəlmişdir.
"Rəhbərlik etmək, yəni,
adamları öyrətmək və tərbiyələndirmək
üçün gərək mənəvi haqqın olsun."
Heydər Əliyev
Belə
bir görkəmli şəxsiyyət haqqında yeni söz demək,
qələm götürüb nəsə yazmaq heç də
asan məsələ deyil. Çünki daim qürur hissi ilə
- "Mən həmişə fəxr etmişəm, bu gün
də fəxr edirəm ki, mən - azərbaycanlıyam!" -
deyərək bütün taleyini xalqla bağlayan ən
böyük azərbaycanlı Heydər Əliyev fenomeni
haqqında ürək sözlərini söyləmək nə
qədər şərəfli olsa da, bir o qədər çətin
və məsuliyyətlidir.
O
böyük insan hansı sahədə
çalışırsa-çalışsın, öz
bacarığı, biliyi, fitri istedadı sayəsində həmişə
diqqət mərkəzində olub. İlk dəfə 1969-cu ildə
Azərbaycanın rəhbəri seçiləndən sonra
geridə qalmış İttifaq subyektini qısa vaxt ərzində
gur inkişaf yoluna çıxarıb, respublikanın həyatında
ciddi dönüş yaradan, Azərbaycanı xammal
istehsalçısından müasir texnika ilə təchiz
olunmuş qabaqcıl sənaye bazasına çevirə bilən,
iki dəfə Sosialist Əməyi Qəhrəmanı
adına layiq görülən, Sov.İKP MK Siyasi Bürosuna
üzv seçilən Heydər Əliyevin
işgüzarlıq keyfiyyətlərinə
həmişə mərkəzi hakimiyyət tərəfindən
yüksək qiymət verilib. Vaxtilə Sov.İKP MK-nın
Baş Katibi Yuri Andropov Heydər Əliyevə "Sən daha
böyük miqyaslarda işləməyə
qadirsən və layiqsən!" - deyərək onu Moskvaya dəvət
etməsi, SSRİ Nazirlər Soveti Sədrinin birinci müavini
kimi çox yüksək vəzifə həvalə etməsi, yaxud uzun illər
SSRİ-nin xarici işlər naziri olmuş görkəmli
dövlət xadimi Andrey Qromıkonun Heydər Əliyev barəsində
" O hətta SSRİ-yə rəhbərlik edə biləcək
böyük potensiala malik güclü şəxsiyyətdir"
- fikrini deməsi heç də təsadüfi deyldi. Bunlar Heydər
Əliyev dühasının miqyasını göstərən
faktlardır.
Güclü
lider xarizmasına malik Heydər Əliyevi həqiqətən,
çoxları üçün nümunə idi. Onun qeyri-adi
yaddaşı, iti zəkası, dəmir məntiqi, gərgin
situasiyalardan özünəməxsus ustalıqla qalib
çıxmaq bacarığı, mürəkkəb siyasi məqamlarda
düzgün qərarlar vermək qabiliyyəti, uzaqgörənliyi,
qətiyyətli iradəsi, prinsipial, eyni zamanda,
qayğıkeş idarəçilik metodları əsl örnək
olaraq hələ bundan sonra çox öyrəniləcək,
dərindən tədqiq ediləcəkdir.
Heydər
Əliyev fenomenini təhlil edərkən, özünü
qabarıq büruzə verən ən xarakterik xüsusiyyətlərdən
biri də onun şəxsiyyətinin bütövlüyü,
sadə dillə desək, müdrikliyidir. Bu müdrik
insanın illər boyu gərgin zəhmət hesabına təməlini
qoyduğu böyük ideyalar zaman-zaman gerçəkləşdikcə
gələcək nəsillər hələ çox yeniliklərin
şahidi olacaqlar. Onun zəngin ideyaları vaxtı
çatanda bir-bir reallaşdıqca insanlar görəcəklər
ki, ümummilli lider Azərbaycanın uzaq perspektivinə
hesablanmış inkişaf proqramlarını necə məharətlə,
dəqiqliklə, mərhələ-mərhələ işləyib
hazırlamışdır. Xalqımız hər dəfə bu
uzaqgörənliyin, müdrikliyin, vətənə sonsuz məhəbbətin,
unikal idarəçilik nümunəsinin şahidi olduqca həm
yaxşı mənada heyrətlənəcək, həm də
öz böyük oğlu ilə fəxr edəcəkdir.
"Xalq dövlət
üçün yox, dövlət xalq üçün
olmalıdır."
Heydər Əliyev
Mən
dahi şəxsiyyətin ölçüyəgəlməz dərəcədə
geniş, çoxşaxəli fəaliyyətinin bir
mühüm istiqaməti barədə danışmaq istəyirəm.
Dövlət idarəçiliyində böyük strateq olan Heydər Əliyevin
əsasını qoyduğu özünəməxsus idarəetmə
prinsiplərinin üstün cəhətlərindən biri
kadrların seçilib yerləşdirilməsi idi. O, əsasən
yüksək mənəvi-əxlaqi keyfiyyətləri,
intellekti, mədəni səviyyəsi və dövlətə
sədaqəti ilə fərqlənən kadrlara
üstünlük verirdi.
Heydər
Əliyevin respublikamıza rəhbərliyi dövründə
yaranan demokratik, şəffaf idarəçilik sayəsində
öz arzusuna çatmış yüzlərlə sadə azərbaycanlı
övladı ulu öndərin
qayğısını həmişə ehtiramla
xatırlayacaqdır. Ötən əsrin 70-80-ci illərində
minlərlə gəncin respublikamızın
hüdudlarından kənarda ali təhsil almasına,
ixtisaslı kadr kimi yetişməsinə hər cür
qayğı və kömək göstərməsi ulu öndərin
vətən, xalq sevgisinin ifadəsi idi. Həm də o, gələcəkdə
Azərbaycanın bir sıra yeni sahələrdə -
informasiya texnologiyaları, beynəlxalq hüquq, beynəlxalq
münasibətlər, aviasiya və s. mütəxəssislərə
ehtiyacı olacağını nəzərə alıb azərbaycanlı
gənclərin Moskva, Kiyev, Minsk və başqa şəhərlərdəki
nüfuzlu universitetlərdə məhz bu profillər üzrə
təhsil almasına nail olurdu. Yeri gəlmişkən, bu
günlərdə "AzərSpace" ilk Azərbaycan
telekommunikasiya peykinin kosmosa buraxılmasında əməyi
olan insanlar arasında həm də o dövrdə oxumuş
yüksək ixtisaslı mütəxəssislərin də
iştirakı dediklərimizə əyani sübutdur. O, hər
il 800 tələbəni dövlət hesabına Azərbaycandan
kənara oxumağa göndərirdi. Bu gün müstəqil
respublikamızın xalq təsərrüfatında,
iqtisadi-siyasi, sosial-mədəni həyatında öz yerini
tapan və uğurla çalışan kadrların çoxu məhz
o zaman ulu öndərin uzaqgörənliklə qayğı
göstərdiyi gənc azərbaycanlı mütəxəssislərdir.
Mən
də ilk gənclik illərindən Heydər Əliyevin
böyük diqqət və qayğısını bilavasitə
öz üzərimdə hiss etmiş, dəfələrlə
onun tam təmənnasız atalıq qayğısının
şahidi olmuşam. İlk dəfə 1971-ci ildə, ulu
öndər Azərbaycan KP MK-nın birinci katibi seçiləndən
iki il sonra onunla görüşmək mənə nəsib
oldu. Həmin görüş mənim
bütün taleyimi dəyişdi. Gənc bir tələbə
kimi o vaxt Heydər Əliyevin dəvəti ilə səhər
tezdən böyük həyəcan içində MK-nın
binasına görüşə tələsəndə təsəvvürümə
belə gətirə bilməzdim ki, bir zaman gələcək
mən hər gün səhərlər o tarixi binaya - ulu
öndərin etimad göstərdiyi yüksək dövlət
vəzifəsini icra etməyə gedəcəyəm...
Heydər
Əliyev təbiət etibarilə yaradıcı şəxs
idi və işlədiyi bütün sahələrdə öz
yaradıcı təxəyyülü, hadisələrə
hamıdan fərqli, novatorcasına yanaşması ilə
seçilirdi. Məlumdur ki, keçmiş SSRİ-də Ali
Sovetə deputat seçkiləri müəyyən kvotalar əsasında
aparılırdı və namizədlər ictimaiyyətin
müxtəlif təbəqələri arasından
seçilirdi. Məsələn, fəhlə, kəndli,
qulluqçu, hərbçi, ziyalı və s. Ancaq Heydər Əliyevin
yaradıcı idrakı bu məsələdə də yenilik
etmişdi. O fərqli bir üsula
əl ataraq təklif etmişdi ki, deputat seçkisində
cəmiyyətin digər təbəqələri ilə
yanaşı tələbə gənclərin də nümayəndəsinə
yer ayrılsın. Bu, əlbəttə, ulu öndərin
ölkənin gələcəyini düşünərək
kadr potensialını mütəmadi yeniləşdirmək və
yetişdirmək məqsədilə atdığı
uzaqgörən addımlardan biri idi.
Mən
o vaxt ordudan qayıtdıqdan sonra Azərbaycan Politexnik
İnstitutunda təhsilimi davam
etdirir, həm də inşaat fakültəsinin komsomol komitəsinin
katibi, eyni zamanda, institut komsomol komitəsi katibinin müavini
kimi ictimai işlərdə fəal iştirak edirdim. Bizim
instituta da təklif olunmuşdu ki,
Heydər Əliyevin qarşıya qoyduğu beş əsas
şərt nəzərə alınmaqla (namizəd əlaçı
olmalı, hərbi xidmətini bitirməli, fəhlə ailəsinə
mənsub olmalı, komsomolun üzvü və ictimai işlərdə
fəal iştirak etməliydi), tələbələrin
sırasından deputat seçkisi üçün layiqli namizədləri
müəyyənləşdirib təqdim edək. Bu, rəhbərin
ümumxalq məsələlərinə nə qədər
ciddi yanaşmasının və obyektivliyinin göstəricisi
idi. Çünki, açığı, o istəsəydi,
şəxsi iradəsi ilə arzuladığı hər
hansı bir tanış, yaxın, doğma adamını
qeyd-şərtsiz namizəd kimi irəli sürə bilərdi.
Ancaq Heydər Əliyev demokratik ruhlu və xalqına
bağlı insan - əsl böyük azərbaycanlı
olduğuna görə bu məsələni ictimaiyyətin öhdəsinə
buraxmışdı.
İlkin
mərhələdə ümumən respublika üzrə təklif
olunan 184 tələbə namizədin 11 nəfəri bizim
Politexnik İnstitutundan idi. Ancaq irəli sürülən
namizədlərin şəxsi işləri ilə
tanışlıqdan sonra Mərkəzi
Komitə yenə bütün institutlarda ən layiqli namizəd
axtarışını davam etdirməyi məsləhət
görmüşdü. Odur ki, bizim institutun fəalları da
rektoratda toplaşaraq daha yeni namizədlər
axtarışını müzakirə edən zaman
institutumuzun partiya təşkilatının katibi bildirdi ki,
bizdə deyilən tələblərə cavab verən namizəd
yoxdur. Yalnız yeganə bir nəfər uyğun gəlir,
ancaq o da partiyanın üzvüdür. Rektor kimi nəzərdə
tutduğunu soruşduqda partkom məni göstərib dedi:
"Respublika rəhbərinin tələblərinə
yalnız Yaqub Eyyubovun göstəriciləri uyğun gəlir:
əlaçı tələbədir, hərbi xidmətini
başa vurub, fəhlə ailəsinə mənsubdur, fəal
ictimaiyyətçidir, fakültə komsomol komitəsinin
katibi, institut komsomol komitəsi katibinin müavini kimi kollektivdə
böyük nüfuza malikdir..." Rektor təcili mənim sənədlərimi
hazırlamağı tapşırdı. Artıq axşam saat
8-9 radələri idi. Mən
şəxsi işimi hazırlayıb rektora təhvil verdim və
evə getdim. Gecə saat 3-ün yarısı Mərkəzi
Komitədən xəbər gəldi: Y.Eyyubov səhər tezdən
Azərbaycan KP MK-nın birinci katibi Heydər Əliyevin qəbulunda
olmalıdır.
Təbii,
çox böyük həyəcan keçirdim. O gecəni demək
olar ki gözümə yuxu getmədi. Sübh tezdən mən
artıq MK-nın binasında idim. Bir qədər sonra Heydər
Əliyev məni qəbul etdi. Əzəmətli görkəmi
ilə ulu öndərin zəhmi həyəcanımı daha
da artırmışdı. O isə söhbəti çox sadə,
səmimi, mehriban aparırdı. Elə bil çoxdanın
tanışları idik. Əslində, o, artıq mənim
şəxsi işimə baxıb həyat yolumla ətraflı
tanış olmuşdu.
Söhbət
zamanı tələbələrin təhsili ilə
maraqlandı, müasir gəncliyin həyatı, düşüncələri, maraq
dairələri, yaşayışları barədə
danışmağımı istədi. Dedi, gənclər bizim
gələcəyimizdir, onların nəylə nəfəs
aldıqlarını bilməyimiz vacibdir. Mən
özümü toplayaraq sıxıla-sıxıla
danışdım. Arada o, daha bir neçə müxtəlif
suallar verdi və mən mümkün qədər ətraflı,
dolğun cavablar verməyə çalışdım. Nəhayət,
söhbətin sonunda mənə uğurlar arzulayıb
sağollaşdı. Ancaq namizədliyimin qəbul edilib-edilmədiyi
barədə heç bir söz demədi.
Mən
respublika rəhbərinin yanından çıxıb institut rəhbərinin yanına tələsdim.
Fikrim Heydər Əliyevlə görüş barədə
rektora məlumat vermək idi. İnstituta çatanda akt
zalında iclasa hazırlıq getdiyini gördüm.
İnstitutun tələbə, müəllim, professor heyəti
burada idi. Digər ali məktəblərin rektorları,
respublikanın bir neçə yüksək səviyyəli
partiya-sovet fəalları da gəlmişdilər. Mən məlumat
üçün rektora yaxınlaşanda o: "Səninlə
sonra görüşüb danışarıq, hələliksə
kömək elə, təcili iclas keçirməliyik", -
deyib məni də hazırlıq işlərinə qoşdu.
Az sonra tədbir başlandı. İclası giriş sözü ilə açan Bakı Şəhər Partiya Komitəsinin birinci katibi Əli Kərimov toplantının məqsədi barədə qısa məlumat verərək, bildirdi ki, indi bütün respublika üzrə hər bir idarə, təşkilat və müəssisə zəhmətkeşləri Ali Sovetə növbəti seçkilər üçün özlərinin ən layiqli namizədlərini irəli sürürlər. Eyni zamanda, bütün ali məktəblər də öz namizədlərini təklif etmişlər. Lakin biz bugünkü yekun iclasında ali məktəblərin tələbə, müəllim və professor heyətini Ali Sovetdə layiqincə təmsil edə biləcək bir nəfərin namizədliyini müəyyənləşdirməliyik.
Sonra
çıxış üçün söz Azərbaycan KP
MK-nın ideoloji məsələlər üzrə katibi Danil
Quliyevə verildi. Tribunaya qalxan D.Quliyev bunları dedi:
"Yoldaşlar, bu gün bu zalda Azərbaycanın
bütün institutlarının tələbə və müəllim
heyətinin nümayəndələri, rektorları, digər vəzifəli
şəxsləri həqiqətən, çox əlamətdar
bir hadisə münasibətilə toplaşmışlar.
İnstitut kollektivlərini Ali Sovetdə təmsil edəcək
bir nəfər ən layiqli namizədi müəyyənləşdirmək
əlbəttə, asan məsələ deyil. Lakin müzakirələrə
başlamazdan əvvəl mən Azərbaycan KP MK-nın bu məsələyə
dair mövqeyini sizə çatdırmaq istərdim. Mərkəzi
Komitə qarşıdakı seçkilərdə Azərbaycan
Politexnik İnstitutunun əlaçı tələbəsi,
Lenin təqaüdçüsü, hərbi xidmətini
başa vurmuş, fəhlə ailəsinə mənsub, fəal
ictimaiyyətçi, fakültə komsomol komitəsinin katibi və
institut komsomol komitəsi katibinin müavini Eyyubov Yaqub Abdulla
oğlunun deputatlığa namizədliyi məsələsini sizin müzakirənizə
çıxarmağı tövsüyə edir."
Mən heyrət içində donub
qalmışdım. Nə edəcəyimi bilmirdim. Səhnədən
eşitdiklərim - cəmi bir saat öncə ulu öndərlə
keçən ilk görüşümüzün əks-sədası
idi. Tribunadan deyilənlər həm də böyük Heydər
Əliyevin Azərbaycan gəncliyinə verdiyi yüksək
qiymətin, inamın, etimadın və əlbəttə,
qayğının təzahürü idi!
Zalda
hamı tələbə namizədi görmək arzusunda idi. Bu
zaman iclasın sədri məni rəyasət heyətinə dəvət
etdi. Gur alqış sədaları altında səhnəyə
çıxıb öz yerimi tutdum. Deputatlığa namizədin
tərcümeyi-halı ilə iclas
iştirakçılarını daha ətraflı
tanış etmək üçün söz institutumuzun
rektoruna verildi. Rektor öz tələbəsi haqqında
çox fərəhlə, ürəkdən xoş sözlər
söylədi...
Beləliklə,
mən ölkədə ilk tələbə-deputat oldum. Doğrudur,
sonralar bu ənənə davam etdi və deputat seçkilərində
tələbələr də iştirak etməyə
başladılar. Ancaq fəxr
edirəm ki, məhz ulu öndərin xeyir-duası ilə Azərbaycan
tarixində ilk tələbə deputat mən olmuşam. Tərcümeyi-halımın
ən qürurverici məqamlarından olan bu hadisə
bütün gələcək həyatımı müəyyən
edən həlledici bünövrə oldu.
O hadisədən
sonra bütün taleyim dəyişdi. Sanki həyat
yollarında qarşımda yaşıl işıq yandı.
İnstitutu bitirib
aspiranturada təhsilimi davam etdirdim, namizədlik,
sonra doktorluq dissertasiyaları müdafiə etdim, elmlər
doktoru, professor elmi adı aldım, institutda dekan müavini,
dekan, kafedra müdiri, prorektor vəzifələrinə irəli
çəkildim...
Ancaq həyat düşündüyümüz qədər
də sadə deyilmiş, onun gözlənilməz enişləri-yoxuşları
varmış.
Təəssüf
ki, 1985-ci ildən sonra məkrli Mixail Qorbaçovun
apardığı "yenidənqurma"
siyasəti və onun yerlərdəki dalğası bir
çoxları kimi, mənim də həyat yolumun
qarşısını müvəqqəti olaraq kəsdi. Heydər Əliyev Moskvada Kreml tərəfindən təqiblərə
məruz qalanda Ə.Vəzirov, A.Mütəllibov, sonra isə
AXC-Müsavat liderləri kimi təsadüfi, naşı və
kölə xislətli adamlar da Bakıda onun tərəfdarlarını
təqib etməyə başladılar. Heydər
Əliyevin qayğı göstərdiyi, irəli çəkdiyi
bütün kadrlar, ona rəğbət bəsləyənlər
işdən çıxarılırdı. O cümlədən,
mən də prorektor vəzifəsindən kənarlaşdırıldım.
M.Qorbaçovun qısqanclığı o dərəcəyə
çatmışdı ki, hətta Moskvada SSRİ Nazirlər
Soveti aparatında bilavasitə Heydər Əliyevin rəhbərliyi
altında çalışan rus millətindən olan sədaqətli
işçilər də vəzifədən
uzaqlaşdırılırdı. Təsəvvür edin, heç bir
vəzifə sahibi olmayan İlham Heydər oğlu Əliyev də
müəllim kimi
çalışdığı Moskva Beynəlxalq Münasibətlər
İnstitutunda təzyiqlərlə üzləşərək
ikrah doğuran şərait ucbatından institutu tərk etməli
olmuşdu.
Bəli, bunlar da yaxın keçmişimizin heç vaxt
unudulmayacaq acı reallığıdır.
"Azərbaycan adlı
müstəqil dövlətin varlığı bizim ən
böyük tarixi sərvətimizdir."
Heydər Əliyev
Müstəqilliyin ilk illərində yaranan gərgin,
mürəkkəb vəziyyətdə xalq yenidən xilaskar
oğluna, görkəmli dövlət xadimi, müdrik Heydər
Əliyevə üz tutub təkidlə onu respublika rəhbərliyinə
dəvət etdi. Haqq nazilsə də, üzülmədi.
Heydər Əliyev yenidən hakimiyyətə
qayıtdı və Azərbaycan dövlətini, Azərbaycan
xalqını, Azərbaycan ölkəsini uçurumdan xilas
etdi.
Bəzən Heydər Əliyevin fəaliyyətini
qardaş Türkiyənin böyük dövlət xadimi
Mustafa Kamal Atatürkün fəaliyyəti ilə müqayisə
edirlər. Heydər Əliyev özü də türk
dünyasının bu dahi oğluna yüksək qiymət
verirdi. O, Atatürkün xidmətlərindən
danışarkən demişdir ki, Türkiyə Cümhuriyyəti
məhz Atatürkün mübarizəsinin, cəsarətinin nəticəsində
yaranmışdır. Eynilə müstəqil Azərbaycan
dövlətinin qurulması, qorunması və möhkəmləndirilməsi
də Heydər Əliyevin mübarizəsinin, böyük cəsarətinin,
qətiyyətli iradəsinin nəticəsi idi. Azərbaycan
Respublikası Milli Məclisinin 1993-cü il
15 iyun tarixli iclasındakı çıxışında Heydər
Əliyev bütün dünyaya bəyan etdi: "Azərbaycan
Respublikası, bundan sonra onun başına nə gəlirsə-gəlsin,
müstəqilliyini itirməyəcək, yenidən heç
bir dövlətin tərkibinə daxil olmayacaq, heç bir
başqa dövlətin əsarəti altına düşməyəcəkdir".
Ulu öndərin yenidən hakimiyyətə
qayıdışı üçün bütün qeyrətli
vətənpərvər ziyalılar kimi, biz də o zaman
çalışdığım Azərbaycan İnşaat
Mühəndisləri İnstitutunda müəyyən aksiyalar
keçirirdik.
Mən institutda Heydər Əliyevin
yaratdığı Yeni Azərbaycan Partiyasının ilk
özək qrupunu təşkil edib oraya yeni üzvlər cəlb
edirdim. Bu cür siyasi fəaliyyətlə
yaxından məşğul olmağım məni yenidən
ulu öndərlə görüşdürdü.
O, Yeni Azərbaycan
Partiyasının yaradılmasında, onun genişlənməsində
iştirak edən, ən çətin anlarda irticadan qorxub
çəkinmədən ulu öndərin müdafiəsinə
qalxan insanlara xüsusi hörmət bəsləyir, həssaslıqla
yanaşır, müasir dövrdə yeni kadr
potensialının formalaşdırılmasında onlara
üstünlük verirdi. Partiya fəalları ilə
yaxından tanış olarkən gələcəkdə
dövlət işində çalışa biləcək
kadrlarla dərindən
maraqlanır, hamını, hər kəsi diqqətlə
öyrənirdi. Və 1997-ci ildə mən
möhtərəm Heydər Əliyevin dəvəti ilə
onun qəbulunda oldum.
Tələbəlik
illərində olduğu kimi, yenə o böyük insanın sonsuz
xeyirxahlığını, qayğıkeşliyini
öz üzərimdə hiss etdim. Biz
görüşəndə bir daha onun fenomenal yaddaşına
heyrət etdim. Tələbə vaxtı mənim deputat seçkisinə
necə qatılmağımla bağlı bütün təfərrüatlar
yadında idi və ən əsası, mənim bütün tərcümeyi-halımı
əzbər bilirdi. Söhbət zamanı
sonrakı illərdə nələr baş verdiyi ilə
maraqlandı. Mən bütün
olanları ətraflı danışdım, elmi-pedaqoji fəaliyyətimdən,
ictimai həyat yolumdakı eniş və yoxuşlar barədə
məlumat verdim. O, mənim artıq elmlər doktoru,
professor, Beynəlxalq Mühəndislər Akademiyasının
akademiki olduğumu eşidəndə bir anlıq fikrə
getdi, gözlərində sevinc yarandı, gülümsəyərək
dedi: "Bax, bu mənim
üçün ən böyük hədiyyədir. Vaxtilə qayğı göstərdiyim tələbə-gənclər
yetişdirdiyim körpə fidanlar idi. İndi o kövrək
fidanların qollu-budaqlı iri ağaclara çevrildiyini
gördükdə çox fərəhlənirəm..."
Beləliklə,
həmin il ulu öndər yenidən mənə
etimad göstərib Azərbaycan Respublikasının Dövlət
Sənayedə İşlərin Təhlükəsiz
Görülməsinə və Dağ-Mədən Nəzarəti
Komitəsinin sədri vəzifəsinə təyin etdi. Bu vəzifədə mən onun etimadını
doğrultmaq üçün var qüvvəmlə
çalışır, rəhbərin qarşıya
qoyduğu bütün tapşırıqları yüksək
səviyyədə yerinə yetirmək üçün
bütün kollektivi səfərbər edirdim.
Təxminən
iki il sonra, 1999-cu il iyulun 10-da Heydər Əliyev
məni yanına çağırdı. Komitədə
işlərin gedişi ilə maraqlandı, neçə
müddətdir orada çalışdığımı
soruşdu. Və söhbət əsnasında dedi ki,
artıq dövlət qulluğunda kifayət qədər təcrübə
toplamısan. Odur ki, mən indi səni
partiyanın namizədi kimi daha məsul sahəyə, Nazirlər
Kabinetinə işə göndərirəm. Sən həm də NK aparatında partiyanın yerli
strukturunu qurub möhkəmləndirməlisən.
Beləliklə, ulu öndər bu dəfə mənə
daha böyük etimad göstərərək Azərbaycan
Respublikası Baş nazirinin müavini vəzifəsinə təyin
etdi.
Mən
vaxtilə institutda tələbə olarkən Ali Sovetin
deputatı kimi, sonra Dövlət Sənayedə İşlərin
Təhlükəsiz Görülməsinə və Dağ-Mədən
Nəzarəti Komitəsinin sədri vəzifəsində
işləyərkən onun etimadını doğrultmaq
üçün necə əzmlə
çalışırdımsa, Nazirlər Kabinetində
də eynilə, hələ daha artıq həvəs və əzmlə
işləməyə başladım. Ulu öndərin
verdiyi bütün tapşırıqları layiqincə icra
etmək üçün var qüvvəmlə səy göstərirdim.
Tezliklə NK-da YAP-ın ilk təşkilatını
qurub üzvlərinin sayını yüz nəfərədək
artıra bildim.
Aradan yenə
iki il keçəndən sonra Heydər Əliyev
bir gün məni yanına çağırdı. Yenə hökumətdə kurasiyam üzrə
işlərin gedişi ilə, öhdəmə düşən
vəzifələrlə, tapşırıqların icrası
ilə, həmçinin ilk partiya təşkilatındakı
ümumi vəziyyətlə maraqlandı. Sonra
yenə NK-da neçə müddətdir
çalışdığımı soruşdu
(düşünürəm, hətta əlli illik tarixə
malik hadisələrin hər nüansını incəliyinə
qədər dəqiqliklə yadında saxlayan fenomenal
yaddaş sahibi hər dəfə bu sualı mənə
yalnız sınaq məqsədilə verirdi). Cavabımdan sonra ulu öndər ötən müddət
ərzində mənim fəaliyyətimi daim nəzərində
saxladığını deyərək əlavə etdi ki, daha
NK-da lazımi təcrübəyə yiyələnmisən,
indi mən səni Baş nazirin birinci müavini vəzifəsinə
təyin edirəm. Get eyni qayda ilə işləməkdə
davam et.
Artıq
on ildir ki, mən hər gün o tarixi binaya gedib, ulu öndərin
tələbə vaxtı ilk dəfə məni qəbul etdiyi
o işıqlı, geniş kabinetdə mənə etibar etdiyi
yüksək dövlət vəzifəsini icra edirəm...
"Bizim hamımızın
bir Vətəni var - bu, Azərbaycandır. Hamımız bir torpaqda yaşayırıq - bu, Azərbaycan
torpağıdır. Azərbaycan
torpağının hər guşəsi hər birimiz
üçün müqəddəs yerdir."
Heydər Əliyev
Heydər
Əliyev ikinci dəfə Azərbaycanda rəhbərliyə
qayıtdıqdan sonra daha artıq əzmlə, çox
böyük gərginliklə on il gecə-gündüz
dincəlmədən çalışdı. Titanik zəhmət
hesabına Azərbaycanı ermənilərin "xaç
atası" Mixail Qorbaçovun sürüklədiyi xaos
girdabından xilas etdi, ölkəni səfalətdən,
dağıntılardan qurtardı, dövləti qoruyub
saxladı, ölkədə sabitlik yaratdı və Sovetlər
dönəmindən miras qalmış qanlı Qarabağ
müharibəsində zəruri atəşkəs elan olundu.
Ulu
öndər Heydər Əliyevin rəhbərliyi altında
uzun illər işləmiş bir adam kimi mən
həmişə o dahi insanın qeyri-adi xarakteri, zamanı
qabaqlayan geniş erudisiyası qarşısında heyran
qalmışam. Respublikadakı
saysız-hesabsız idarə və təşkilatların fəaliyyətini
əlaqələndirməklə onları ümumi bir strateji məqsədə
doğru yönəltmək, hər birinin vəzifəsini
müəyyənləşdirmək, xalqın və ölkənin
mənafeyinə tabe etdirmək fövqəladə qabiliyyət
tələb edən xüsusiyyətlərdir. Heydər Əliyevin simasında biz xalqına və vətəninə
sonsuz məhəbbət bəsləyən böyük vətəndaşı,
fitri istedad sahibini görürdük. Onunla işləmək
həm hədsiz
zövq verirdi, həm xoşbəxt anlar yaşadırdı, həm
də böyük məsuliyyət idi. O, hər bir spesifik sahənin
idarə olunmasında böyük səriştəlilik və
əsl ixtiraçılıq istedadı göstərirdi. Bu nadir şəxsiyyət hər bir işə son dərəcə
ciddi yanaşmaqla irəli sürülən təklifləri,
mülahizələri diqqətlə öyrənir, ətraflı
müzakirədən sonra ən optimal variant üzərində
dayanıb icrasına qərar verirdi.
Qısa
müddət ərzində müstəqil Azərbaycanın
sürətli inkişafı üçün ən optimal iqtisadi və siyasi model yaradan ulu
öndər respublikamızı MDB-də yenə öncül
yerlərə çıxartdıqdan sonra, onu müasir təfəkkürlü,
dünyadakı mürəkkəb prosesləri dərindən
təhlil edərək düzgün qərarlar çıxara
bilən etibarlı əllərə təhvil verdi.
Bu gün
ulu öndərin "Özü qədər
inandığı" möhtərəm Prezident İlham Əliyev
onun başladığı quruculuq işlərini uğurla
davam etdirir, Heydər Əliyevin iqtisadi-siyasi-mədəni
inkişaf modelinə yaradıcı yanaşmaqla onu daha da təkmilləşdirir,
müasir Azərbaycanı yeni, daha yüksək inkişaf mərhələsinə
doğru aparır.
"Əmin ola
bilərsiniz ki, Azərbaycanın sükanı etibarlı əllərdədir.
Biz Azərbaycanı demokratiya yolu ilə
ardıcıl surətdə irəliyə aparacağıq,
ölkəmizin müstəqilliyini göz bəbəyimiz kimi
qoruyacağıq, Azərbaycanın müstəqilliyini daimi edəcəyik."
Heydər Əliyev
Artıq
22 ildir ki, Azərbaycan Respublikası dünya birliyinin layiqli üzvü
kimi müstəqil yaşayır, inkişaf edir. Bu dövlətin qurucusu və qoruyucusu dahi Heydər Əliyev
həqiqətən də, son bir neçə əsrdə Azərbaycan
xalqının yetirdiyi ən parlaq şəxsiyyət və
qüdrətli dövlət xadimi olaraq ölkənin həyatında,
tarixində dərin izlər qoyub. Məlum olduğu kimi,
Heydər Əliyev hələ imperiya daxilində
yaşadığımız illərdə o məhdud imkanlar
şəraitində var qüvvəsi ilə Azərbaycanın
gələcək müstəqil inkişafı, tərəqqisi,
firavanlığı naminə əzmlə
çalışıb, bugünkü müstəqil Azərbaycanın
iqtisadi modelinin bünövrəsini hazırlayıb. Bu model, azad bazar iqtisadiyyatı prinsipləri əsasında
qarşılıqlı faydalı əməkdaşlıq yolu
ilə dünya birliyinə inteqrasiya olunan və milli maraqlar
naminə öz təbii sərvətlərindən səmərəli
istifadə edən müstəqil Azərbaycanın sürətli
inkişaf konsepsiyasına əsaslanır. Bu
gün məhz ümummilli liderin yaratdığı həmin
strateji xətt üzrə yüksələn müasir Azərbaycan
hətta iqtisadi artım tempinə görə dünyada ən islahatçı ölkə kimi
tanınır. Xüsusən, neft və qeyri-neft bölmələrinin
ahəngdar inkişaf etdirilməsi diversifikasiyalı
iqtisadiyyatın dinamik yüksəlişini təmin edən
amildir.
Uzaqgörən
müdrik şəxsiyyət Heydər Əliyevin vaxtilə
işləyib hazırladığı stabil inkişaf konsepsiyası
bütün sahələrdə - iqtisadi, sosial, humanitar, xarici
siyasətdə və s. özünü doğrultmaqla, Azərbaycanın
dövlət müstəqilliyinin daimi, dönməz və əbədi
xarakter almasına möhkəm zəmin yaradır.
"...Mən ona özüm qədər
inanıram. İnanıram ki, o bizim
başladığımız işləri axıra
çatdıra biləcəkdir."
Heydər Əliyev
Bu gün
bütün dünyada yaşayan 50 milyonluq Azərbaycan
xalqı fəxr edir ki, zamanın ən çətin sınaqları
qarşısında onun Heydər Əliyev kimi dahi oğlu,
qüdrətli sərkərdəsi və müdrik rəhbəri
olub. Əlbəttə, xalqımız ulu öndərin
əbədiyyətə qovuşaraq bizi tərk etməsini
ürək ağrısı ilə qarşıladı, bundan
çox böyük sarsıntı keçirib onun sevgisini, əziz
xatirəsini əbədilik qəlbinə
köçürdü. O bizim böyük
arxa-dayağımız, inam, güvənc yerimiz idi. Onsuz çox çətindir.
Ancaq nə
qədər çətin olsa da, eyni zamanda, bizim
üçün, bütün xalqımız üçün
bir təsəllidir ki, ulu öndəri onun özünün də
böyük inam bəslədiyi istedadlı, qabiliyyətli,
müasir təfəkkürlü gənc lider - möhtərəm
İlham Heydər oğlu Əliyev layiqincə əvəz
edir. Onun başladığı quruculuq işlərini layiqli
varisi böyük bilik,
bacarıq, inam və səriştə ilə,
ümummilli liderin arzularına, tövsiyələrinə
uyğun şəkildə irəliyə
aparır. Tam əminliklə deyə bilərik
ki, Azərbaycan xalqı hələ uzun illər Prezident
İlham Əliyevin rəhbərliyi altında qarşıda
çox zirvələr fəth edəcək, çox
taleyüklü qələbələrə imza atacaqdır.
Hər dəfə dönüb arxaya, keçdiyim həyat
yoluna baxanda qəlbimdə bir qürur hissi oyanır. Fəxr edirəm ki, bu yolu ən
Böyük Azərbaycanlı ilə, ümummilli liderimiz Heydər
Əliyevlə birgə
keçmişəm, onun idarəçilik məktəbindən
dərs almış, öyrənmiş, yanında təcrübə
toplamış və məhz bu səbəbdən də həyatda
inamla addımlaya bilmişəm.
Bu, mənim taleyimdir, bu, mənim həyatımdır. Həyatımın bu
uğurunu lazımınca dərk edir, qiymətləndirir və
özümü xoşbəxt taleli insan hesab edirəm.
Yazını dünya durduqca daim Azərbaycanla birgə
var olacaq Heydər Əliyevin bir müdrik kəlamı ilə
bitirmək istəyirəm. O deyirdi: "Həyatın mənası
insanın çox və yaxud az yaşamasından ibarət
deyil. Onun əsas mənası bu həyatda
öz yerini tutmaq, mövqeyini müəyyən etmək, ləyaqət
göstərmək və başqaları üçün
nümunə olmaqdır."
Yaqub EYYUBOV,
Azərbaycan Respublikası Baş
nazirinin birinci müavini
Azərbaycan.-
2013.- 10 aprel.- S. 3.