Heydər Əliyev Fondu tərəfindən hazırlanmış bir sıra kitablar Cənubi Afrika Milli Kitabxanasına hədiyyə olunmuşdur

Azərbaycanın Cənubi Afrikadakı səfiri Elxan Poluxov Pretoriya şəhərindəki bu ölkənin Milli Kitabxanasının rəhbəri, Milli Kitabxanalar Konfransının sədri Con Kvale Tsebe ilə görüşmüşdür.

Səfirlikdən AzərTAc-a verilən məlumata görə, E.Poluxov həmsöhbətinə Azərbaycanda sürətlə gedən inkişaf prosesi, dövlət tərəfindən təhsilə, elmin inkişafına göstərilən diqqət, respublikamızda fəaliyyət göstərən kitabxanalar barədə ətraflı məlumat vermişdir.

Azərbaycanda yeni nəşrlərin çıxmasında Heydər Əliyev Fondunun xüsusi rolunu vurğulayan səfir fond tərəfindən hazırlanmış bir sıra kitabları Cənubi Afrika Milli Kitabxanasına hədiyyə etmişdir.

Görüşdə Ermənistan-Azərbaycan, Dağlıq Qarabağ münaqişəsi və onun ağır nəticələri barədə fikir mübadiləsi aparılmışdır.

E.Poluxov iki ölkənin milli kitabxanaları arasında əlaqələrin inkişafının əhəmiyyətini vurğulamışdır. Bu cür əlaqələrin qurulmasında maraqlı olduğunu deyən C.Tsebe bildirmişdir ki, ölkələrimiz barədə məlumatların kitabxanalarda yerləşdirilməsi üçün bütün lazımi addımları atmağa hazırdır.

Sonda Azərbaycan diplomatı kitabxana ilə tanış olmuşdur. Məlumat verilmişdir ki, Cənubi Afrika Milli Kitabxanası Afrika qitəsində ən böyük və zəngin kitabxanalardan biridir.

Azərbaycan.- 2013.- 11 aprel.- S. 5.