Əli ƏHMƏDOV: Dünya İqtisadi Forumunun Azərbaycanda keçirilməsi beynəlxalq birliyin ölkəmizin iqtisadi inkişafını etiraf etməsi kimi qiymətləndirilə bilər

Dünya İqtisadi Forumunun (Davos Forumu) Azərbaycanda keçirilməsi beynəlxalq birliyin ölkəmizin iqtisadi inkişafını etiraf etməsi kimi qiymətləndirilə bilər.

AzərTAc xəbər verir ki, bu sözləri jurnalistlərə müsahibəsində Yeni Azərbaycan Partiyası sədrinin müavini-icra katibi, Milli Məclisin deputatı Əli Əhmədov bu forumun ölkəmiz üçün əhəmiyyətindən danışarkən bildirmişdir.

Əli Əhmədov demişdir: "Hesab edirəm ki, Azərbaycanın iqtisadiyyatında, iqtisadi inkişafı sahəsində çox əhəmiyyətli nailiyyətlər əldə edilməsəydi, Azərbaycanın timsalında iqtisadi inkişaf və tərəqqi mövzusunda diskussiyalar aparılması üçün kifayət qədər əsaslar olmasaydı, Davos Forumunun Bakıda keçirilməsi üçün də qərar qəbul edilməzdi. Belə bir qərarın qəbul edilməsi hər şeydən əvvəl Azərbaycanın iqtisadi inkişafının və ölkəmizin inkişaf modelinin etiraf olunması kimi qiymətləndirilir".

Ə.Əhmədov vurğulamışdır ki, digər tərəfdən, Davos Forumunun Bakıda keçirilməsi bütövlükdə Azərbaycanın inkişafının, iqtisadiyyatının, onun yüksəlişinin dünya birliyinə bir daha iqtisadçıların və iqtisadi qurumların baxışları kontekstində təqdim edilməsi demək idi. Həqiqətən də Azərbaycanın dünyaya deyə biləcəyi çox şeylər vardır. Sürətli iqtisadi inkişaf, Azərbaycanın özünəməxsus iqtisadi modelinin ayrı-ayrı aspektləri, insanların rifahının yaxşılaşdırılması ilə əlaqədar həyata keçirilən tədbirlər və bütövlükdə Azərbaycanın həm regional, həm də dünya iqtisadiyyatı baxımından mövqeləri göstərilə bilər. Bütün bunların hamısı Davos Forumunun Azərbaycanda keçirilməsi kontekstində ölkəmizin yenidən dünyaya açılması və dünyaya təqdim edilməsi demək idi.

Yeni Azərbaycan Partiyası sədrinin müavini diqqətə çatdırmışdır ki, forum iqtisadi inkişaf perspektivləri baxımından da aparılan müzakirələr kontekstində böyük əhəmiyyət kəsb edir. Əlbəttə, dünya iqtisadiyyatı bütövlükdə sürətlə inkişaf etməkdədir və bu tərəqqinin yeni yolları axtarılmaqdadır. Həmçinin də Azərbaycan iqtisadiyyatı sürətlə inkişaf edən bir ölkə kimi dünya iqtisadi birliyinə daha yaxından inteqrasiya etmək və dünyanın iqtisadi inkişaf templərinə uyğun şəkildə öz iqtisadiyyatını inkişaf etdirmək vəzifələrini və hədəflərini qarşıya məqsəd qoymuşdur. Bu vəzifələrin ardıcıl surətdə həyata keçirilməsi, dünya iqtisadi birliyində öz mövqelərini daha da möhkəmləndirmək nöqteyi-nəzərindən Davos Forumunun Bakıda keçirilən iclaslarında aparılan müzakirələr böyük əhəmiyyət kəsb edirdi. Təbii ki, bu müzakirələr Azərbaycanın iqtisadi nöqteyi-nəzərindən gələcək inkişafına daha geniş perspektivdə və geniş bir bucaq altında baxmağa imkanlar yaradacaqdır. Digər tərəfdən, burada ayrı-ayrı tanınmış iqtisadçıların və menecerlərin səsləndirdikləri fikirlər də Azərbaycanın regional iqtisadi inkişafı baxımından gələcək perspektivləri ilə bağlı böyük əhəmiyyət kəsb edir.

Ə.Əhmədov daha sonra demişdir: "Hesab edirəm ki, bu, Azərbaycanın müasir iqtisadi həyatında əhəmiyyətli hadisədir. Bu bir daha onu göstərir ki, Azərbaycan dünya birliyində artıq özünü təsdiq etmiş, tanıtmış, ayrı-ayrı önəmli toplantıların keçirilməsinə ev sahibliyi etmək imkanında, qüdrətində olduğunu sübuta yetirən bir ölkədir. Şübhəsiz, bu, çox əhəmiyyətlidir. Azərbaycan dövlətinin gücünün, qüdrətinin, inkişaf perspektivlərinin ifadələrindən, təzahürlərindən biridir".

Azərbaycan.- 2013.- 11 aprel.- S. 6.