«Nizami» Kino Mərkəzində Azərbaycan kinomarafonuna daxil olan filmlərin təqdimatı keçirilmişdir

Xəbər verdiyimiz kimi, "YARAT!" Müasir İncəsənət Məkanının "İNDİ" layihəsi çərçivəsində martın 30-31-də 7-ci Azərbaycan kinomarafonu keçirilmişdir.

AzərTAc xəbər verir ki, "Nizami" Kino Mərkəzində 7-ci Azərbaycan kinomarafonuna daxil olan filmlərin təqdimatı keçirilmişdir.

"İNDİ" müxtəlif incəsənət sahələrinin əməkdaşlığı üçün nəzərdə tutulan və "YARAT!" Müasir İncəsənət Məkanı tərəfindən həyata keçirilən bir layihədir. Layihə öz sıralarına rəssamları, musiqiçiləri, ədəbiyyatşünasları və kinematoqrafçıları cəlb etməyə çalışır.

Tədbirdə Azərbaycan kinomarafonunun iştirakçıları tərəfindən 36 saat ərzində çəkilmiş 7 qısametrajlı film təqdim edilmişdir. Bəzi filmlər "Cinemasports/Azerbaijan" səhifəsində əvvəlcədən paylaşılmışdır. Eyni zamanda, tamaşaçılar üçün sürpriz olan, müəlliflər və təşkilatçılardan başqa heç kimin görmədiyi bir layihə də təqdimata daxil edilmişdir.

Təqdim olunan işlər haqqında xüsusi dəvət olunmuş kulturoloq, Avropa mədəniyyət parlamentinin üzvü Cahangir Səlimxanov, rejissor, "Yuğ" Dövlət Teatrının direktoru Tərlan Rəsulov, ssenarist və dramaturq Ramiz Fətəliyev, rejissor-dokumentalist Nonna Müzəffərova, ssenarist və prodüser İradə Bağırzadənin daxil olduqları münsiflər heyətinin üzvləri fikirlərini bildirmişlər. Adətən kinomarafon təşkilatçıları iştirakçını qiymətləndirmir və təltif etmirlər. Kinomarafonun qalibi və məğlubu olmur. Amma münsiflərin ixtiyarı var ki, ayrı-ayrı işləri xüsusi mükafatlarla təltif etsinlər.

Layihə "Bank Technique"in sponsorluğu ilə həyata keçirilmişdir.

"Bank Technique" uzun müddətdir ki, Azərbaycan incəsənətinin gənc nümayəndələrinin həyatında yaxından iştirak edir.

Azərbaycan.-2013.- 13 aprel.- S.11.