Amerikanın «The Hour» qəzetində ABŞ-ın Azərbaycana və Ermənistana maliyyə yardımı göstərməsi haqqında məqalə dərc olunmuşdur

Konnektikut ştatında nəşr olunan "The Hour" qəzetində ABŞ-ın Azərbaycana və Ermənistana maliyyə yardımı göstərməsi haqqında məqalə dərc edilmişdir. ABŞ Azərbaycanlıları Şəbəkəsinin (USAN) üzvü Elşən Əliyevin müəllifi olduğu bu məqalədə aprelin 10-da elan edilmiş "maliyyə yardımı büdcəsinin layihəsinə şərti dəstək" ifadə olunur. Müəllif qeyd edir ki, ABŞ-ın region ölkələrinə maliyyə yardımı göstərməsi zamanı iki əsas məqam nəzərə alınmalıdır: 1) Azərbaycanın Ermənistan tərəfindən işğal olunmuş Dağlıq Qarabağ regionuna bilavasitə maliyyə yardımı göstərilməsinə yol vermək olmaz; 2) ABŞ-ın ən güclü hərbi müttəfiqi kimi Azərbaycan hərbi proqramlar üçün, o cümlədən Beynəlxalq hərbi təhsil və hazırlıq proqramı, Xarici dövlətlərə hərbi maliyyə yardımı göstərilməsi proqramı üçün Gürcüstana olduğu həcmdə maliyyə yardımı almalıdır.

E.Əliyev öz məqaləsində qanunvericiləri narkotik maddələrin tranziti, qanunsuz silah satışı üçün istifadə edilən Azərbaycanın işğal olunmuş Dağlıq Qarabağ regionuna maliyyə yardımı dilənən erməni lobbisinin məhdud maraqlarına uymamağa çağırmışdır. Hər hansı humanitar yardım üçün nəzərdə tutulmuş maliyyə yardımı Azərbaycanın legitim hökuməti vasitəsilə həyata keçirilməlidir. Daha sonra məqalədə deyilir ki, "ABŞ Bakı hökumətinə məhəl qoymadan işğal olunmuş Dağlıq Qarabağ regionuna birbaşa maliyyə yardımı göstərən yeganə ölkədir. Halbuki Abxaziya və Cənubi Osetiya (Gürcüstan), Dnestryanı bölgə (Moldova) və s. kimi separatçı qurumlara analoji yardım göstərilmir. Bundan başqa, Azərbaycanın işğal olunmuş regionuna yardım göstərilməsi ABŞ qanunlarına görə, xüsusən qanunverici orqanın palatalarının razılıq komitəsinin 2012-ci il tarixli məruzəsinin 7070-ci maddəsinə görə qanuna ziddir. Elşən Əliyevin məqaləsi region ölkələrinə göstərilən maliyyə yardımının qeyri-bərabərliyi və erməni lobbisinin mənafeyi barədə qanunvericilərin və ABŞ hökumətinin məlumatlandırılması üzrə ABŞ azərbaycanlıları şəbəkəsinin keçirdiyi kampaniya çərçivəsində dərc olunmuşdur.

Yusif BABANLI,

AzərTAc

Vaşinqton

Azərbaycan.-2013.- 16 aprel.- S.5.