Bakıda «MDB müsəlmanları sülh və stabil inkişaf tərəfdarıdırlar» mövzusunda beynəlxalq elmi-praktiki konfrans keçirilmişdir

Aprelin 16-da Bakıda Qafqaz Müsəlmanları İdarəsinin (QMİ) sədri şeyxülislam Allahşükür Paşazadənin sədri olduğu MDB Müsəlmanları Məşvərət Şurasının "MDB müsəlmanları sülh və sabit inkişaf tərəfdarıdırlar" mövzusunda beynəlxalq elmi-praktik konfrans keçirilmişdir.

AzərTAc xəbər verir ki, MDB Müsəlmanları Məşvərət Şurasının konfransında dövlət və hökumət nümayəndələri, Tacikistanın, Ukraynanın, Qırğızıstanın, Serbiyanın, Moldovanın, Belarusun, Baltikyanı ölkələrin və Rusiya Federasiyasının subyektlərinin - Çeçenistan, Dağıstan, Tatarıstan və s. yerlərdən olan müsəlman liderlər iştirak etmişlər.

"Qurani-Kərim"dən ayələrin oxunması ilə açılan tədbirdə çıxış edən Qafqaz Müsəlmanları İdarəsinin və MDB Müsəlmanları Məşvərət Şurasının sədri şeyxülislam Allahşükür Paşazadə Müstəqil Dövlətlər Birliyinin müsəlman liderlərini Bakıda salamlayaraq konfransın işinə xeyir-dua vermişdir.

Konfransın Bakıda keçirilməsinin əhəmiyyətini diqqətə çatdıran A.Paşazadə bu mövzunun müsəlmanlar üçün daim aktuallığını saxladığını və vacib olduğunu vurğulamışdır. Allahşükür Paşazadə bildirmişdir ki, Azərbaycanda dini icmaların fəaliyyəti dövlət tərəfindən ən yüksək formada dəstəklənir. O qeyd etmişdir ki, Azərbaycan Prezidenti İlham Əliyevin xalqın milli-mənəvi dəyərlərinə, dini irsinə ehtiramı sayəsində ölkədəki bütün dini icmaların fəaliyyəti yüksək formada dəstəklənir: "Dövlət ilə din arasında həmrəylik olarsa, bir çox təhlükələrin, o cümlədən terrorizmin və ekstremizmin də qarşısının alınmasında göstərilən səylər uğurla nəticələnər, təhlükələrin qarşısı alınar. Ölkədə din ilə dövlət arasında münasibətlərin yüksək səviyyədə olması cəmiyyətdə mənəvi sabitlik deməkdir".

Şeyxülislam MDB Müsəlmanları Məşvərət Şurası MDB məkanında bütün münaqişələrin tezliklə həll olunmasını istədiyini və konfliktlərin sülh yolu ilə həll olunmasına tərəfdar olduğunu qeyd etmişdir. Ermənistan-Azərbaycan, Dağlıq Qarabağ münaqişəsinin tezliklə həll olunmasının vacibliyini vurğulayan A.Paşazadə demişdir: " Biz tələb edirik ki, erməni işğalçıları tərəfindən başlanan Ermənistan-Azərbaycan, Dağlıq Qarabağ problemi beynəlxalq konvensiyanın tələb, beynəlxalq təşkilatların qəbul etdiyi qətnamələrdə də göstərildiyi kimi, ədalətli formada həll olunsun və Azərbaycan torpaqları geri qaytarılsın".

Sonra tədbir iştirakçılarına Azərbaycanda dini-mənəvi dəyərlərdən bəhs edən film təqdim edilmişdir.

Azərbaycan Respublikası Prezidenti Administrasiyasının İctimai-siyasi məsələlər şöbəsinin müdiri Əli Həsənov dövlət başçısı İlham Əliyevin konfrans iştirakçılarına təbrik məktubunu oxumuşdur (Təbrikin mətni qəzetin bugünkü nömrəsində dərc olunur).

Rusiya Federasiyasının Prezidenti Vladimir Putinin də konfrans iştirakçılarına təbrik məktubu oxunmuşdur. Məktubu Rusiyanın Azərbaycandakı səfiri Vladimir Doroxin səsləndirmişdir.

Konfransda həmçinin Qırğız Respublikasının Prezidenti Almazbek Atambayevin, Moskva və bütün Rusiyanın Patriarxı Kirillin, Moskva şəhərinin meri Sergey Sobyaninin, MDB İcraiyyə Komitəsinin sədri - icraçı katib Sergey Lebedevin və başqalarının konfrans iştirakçılarına təbrik məktubları oxunmuşdur.

Konfransda çıxış edən Dini Qurumlarla İş üzrə Dövlət Komitəsinin (DQİDK) sədri Elşad İskəndərov şeyxülislam Allahşükür Paşazadənin MDB Müsəlmanları Məşvərət Şurasının növbəti dəfə sədri seçilməsini Azərbaycan müsəlmanlarına verilən yüksək dəyər kimi qiymətləndirmişdir. Tədbirin əhəmiyyətindən danışan Elşad İskəndərov ölkəmizdə dövlət-din münasibətləri, həmçinin Azərbaycandakı dini tolerantlıq barədə konfrans iştirakçılarına məlumat vermişdir.

Komitə sədri bildirmişdir ki, Azərbaycanda dövlət-din münasibətləri dünyəvilik prinsipləri ilə tənzimlənir. Din və hökumət qurumları bir-birilərindən ayrı olduqlarına baxmayaraq, dini və dünyəvi dəyərlərin inkişafına hökumət qurumlarının yaxından dəstəyi vardır. O qeyd etmişdir ki, bu, öz ifadəsini ən gözəl şəkildə Azərbaycan xalqının ümummilli lideri Heydər Əliyevin dediyi "Bizim dövlətimiz dünyəvi dövlətdir. Ancaq biz dindən ayrı deyilik" kəlamında tapmışdır.

E.İskəndərov bildirmişdir ki, Azərbaycan dövləti dini dəyərlərin qorunmasına xüsusi diqqət yetirir. Dini dəyərlər xalqımızın mənəvi irsi hesab edilir. Komitə sədri qeyd etmişdir ki, bu istiqamətdə bütün müvafiq qurumların xətti ilə işlər aparılır. Ulu öndərimizin dediyi "dinimiz xalqımızın milli-mənəvi sərvətidir" kəlmələri aparılan bu strateji xəttin nəzəri-praktiki əsasını təşkil edir. E.İskəndərov vurğulamışdır ki, sovet dövründə dağıdılmış dini abidələrin yenidən tikilməsi, bərpası işi sürətlə aparılır. Bildirilmişdir ki, dövlət qurumları dini icmaların problemlərinin həlli üçün ciddi işlər görür ki, bu da Azərbaycanda dünyəviliyin əsas təzahürlərindən biridir. Azərbaycanda fəaliyyət göstərən əsas dini icmaların rəhbərlərinin ali dövlət tədbirlərində yaxından iştirakı, Prezident İlham Əliyevin təşəbbüsü ilə dini icmalara maliyyə yardımı göstərilməsi bunun əyani təsdiqidir.

Tədbirdə çıxış edən Ukraynanın müftisi Ə.Təmim, Qırğız Respublikası Dini İşlər üzrə Dövlət Komissiyasının rəhbəri A.Jumabayev, Qazaxıstanın Dini İşlər Agentliyi sədrinin müavini Q.Şoykin, Tacikistanın müftisi S.Əbdülqədirzadə, Serbiyanın baş müftisi M.Yusufspahiç və başqaları konfransın əhəmiyyətindən danışmış, Azərbaycandakı tolerantlığı yüksək qiymətləndirmişlər. Çıxış edənlər dini həmrəyliyin, sülhün vacibliyindən danışmış, islamda radikalizmi, ekstremizmi pisləmiş, bununla birgə mübarizə aparmağın vacibliyini diqqətə çatdırmışlar.

Konfransda bildirilmişdir ki, MDB Müsəlmanları Məşvərət Şurası dövlətlər tərəfindən dinlərarası dialoqa verilən önəmi dəstəkləyir və öz fəaliyyətində dini mərkəzlərlə, həmçinin beynəlxalq cəmiyyətlərlə əlaqələrin genişlənməsinə səy göstərir.

Sonda konfrans iştirakçıları dinlər, konfessiyalar və sivilizasiyalar arasında dialoqa, multikulturalizm və tolerantlıq ənənələrinə xüsusi əhəmiyyət verən Azərbaycan dövlətinin rolunu yüksək qiymətləndirmiş, tədbirin keçirilməsində yaradılan şəraitə görə minnətdarlıqlarını bildirmişlər.

İştirakçılar həmçinin konfransa diqqət və mənəvi dəstək nümayiş etdirmiş MDB, Baltikyanı, Avropa ölkələrinin, Türkiyə və İranın dövlət başçılarına, dini liderlərinə və ictimai xadimlərinə öz təşəkkürlərini bildirmişlər. Konfransın sonunda yekun sənədi qəbul edilmişdir.

Azərbaycan.-2013.- 17 aprel.- S.7.