Ümummilli liderin yubileyinə həsr olunan olimpiada keçirilmişdir

Azərbaycan Dövlət İqtisad Universitetində (AzDİU) ölkədə fəaliyyət göstərən 16 ali məktəbin 230-dək tələbə və magistrantının iştirak etdiyi "Vergilər" mövzusunda 7-ci olimpiada keçirilmişdir. Olimpiada ümummilli lider Heydər Əliyevin anadan olmasının 90 illik yubileyinə həsr olunmuşdur.

İştirakçılar əvvəlcə AzDİU-nun foyesində ümummilli lider Heydər Əliyevin büstü önünə gül dəstələri qoymuş, Azərbaycan xalqı və dövləti qarşısında tarixi xidmətləri olan ulu öndərin əziz xatirəsini bir dəqiqəlik sükutla yad etmişlər.

Tədbiri giriş sözü ilə açan Azərbaycan Dövlət İqtisad Universitetinin prorektoru Damət Bağırov olimpiada iştirakçılarını salamlamış, hər il ənənəvi olaraq Bakıdan və respublikanın müxtəlif bölgələrindən çoxlu sayda tələbə və magistrantın bu olimpiadaya qatıldığını bildirmişdir. Vergilər nazirinin müşaviri Ələkbər Məmmədov isə çıxışında ulu öndərin əsasını qoyduğu və Prezident cənab İlham Əliyevin rəhbərliyi altında həyata keçirilən iqtisadi islahatların ölkəmizi regionda və dünyada aparıcı dövlətlər səviyyəsinə çatdırdığını demişdir. Qeyd olunmuşdur ki, bu gün vergi xidməti əməkdaşları ulu öndər Heydər Əliyevin müəyyənləşdirdiyi dövlətçilik konsepsiyasına sadiq qalaraq suverenliyimizin möhkəmlənməsi və ölkəmizin hərtərəfli tərəqqisi yolunda bütün zəruri tədbirləri görürlər. Artıq 7-ci ildir ki, ali məktəb tələbələri və magistrantları böyük həvəslə bu olimpiadada iştirak edirlər. Həmin tələbələrin bir çoxu sonradan vergi orqanlarına işə qəbul zamanı yüksək nəticələr göstərir və Vergilər Nazirliyində müvafiq vəzifələr tuturlar.

Test üsulu ilə təşkil olunmuş olimpiada zamanı iştirakçılar 2 saat ərzində Vergilər Nazirliyinin Tədris Mərkəzində müvafiq test bazası əsasında hazırlanan sualları kompyuter vasitəsilə onlayn rejimdə cavablandırmışlar. Hər bir tələbə üçün fərdi sual bazası tərtib olunmuşdur. Nəticələr iştirakçı ali məktəblərin təmsilçilərindən ibarət münsiflər heyətinin iştirakı ilə Tədris Mərkəzinin mütəxəssislərinin nəzarəti altında xüsusi kompyuter proqramları vasitəsilə qiymətləndirilmişdir.

Tələbələr arasında birinci yerə Validə Hacızadə (AzDİU), ikinci yerə Nicat Əliyev (Azərbaycan Universiteti), üçüncü yerə Ayaz Museyibov (AzDİU) çıxmışlar. AzDİU-nun müəllimi Yaşar Kərbəliyevə isə tələbəsi ən yüksək nəticə göstərdiyinə görə xüsusi mükafat verilmişdir. Magistrantlar arasında yerlər belə bölünmüşdür: birinci yer Rüfət Hüseynov, ikinci yer Asif Hüseynov, üçüncü yer Sübhan Orucov. Mükafata layiq görülənlərin hamısı AzDİU-nun magistrantlarıdır. Adıçəkilən universitetin müəllimi Ramiz Məhərrəmov da magistrantı birinci yer tutduğu üçün xüsusi mükafat almışdır.

Azərbaycan.-2013.- 27 aprel.- S.12.