Prezident İlham Əliyev indi heç vaxt
olmadığı qədər güclüdür
ABŞ Dövlət
Departamentinin son hesabatı ənənəvi olaraq
subyektiv, qərəzli və təhrifedicidir
Artıq 20 ildən çoxdur ki, müxalifət düşərgəsi ictimaiyyətlə canlı və hərtərəfli münasibətlərin qurulması əvəzinə populist metodlara üstünlük verir. Seçkilərdən seçkilərə müvəqqəti manevr imkanları olsa da, son nəticədə bu, yenə də onların nüfuzunu aşağı salır və xalqın ümumilikdə müxalifətçiliyə etibarını azaldır.
Müxalifət özünə
"antielektorat" formalaşdırır
Müxalifətin real qüvvəyə çevrilməsinə əngəl olan digər səbəb - siyasi məkanda oyunçuların yanlış mövqelər seçməsidir. Aşkar görünür ki, müxalifət öz siyasətini konkret ideoloji prinsiplərinə görə deyil, iqtidarın siyasətinə münasibət əsasında qurur. Bunun nəticəsində siyasi mübarizənin məzmunu təhrif edilir. Xaricdən antiazərbaycançı mənbələrin buyruqları üzərindən Azərbaycan hakimiyyətinə qarşı müqaviməti necə təşkil etmək üçün baş sındırmaq puç və faydasız işə çevrilir.
Müxalifət sözlər və real işlər arasındakı uçurumdan çıxmağı bacarmır. Ümumiyyətlə isə "ənənəvi müxalifətin yenidən formalaşmasına, yenidən təşkilatlanmasına" ümid yeri qalmır. 20 ildən çoxdur ki, müxalifət iqtidara gəlmək istəyr, xalq isə iqtidara səs verir. Bu illərdə etiraz aksiyalarının mənası da, daxili dinamika da itib. "Sistemsiz, statuslu "qlamur" müxalifətçilər" isə "inqilab, siyasət və demokratiya oyunu" oynamaqdan bezmir.
Düşünmək olar ki, müxalifət məhz buna görə sağlam rəqabət istəmir. Çünki hesab edilir ki, hətta cüzi partiyadaxili demokratiya, fikir mübadiləsi bu "müxalifətçiliyi, demokratiyaya monopoliya"nı dağıda bilər.
Müxalifət ilk baxışda mühüm şeylər haqda danışır: azadlıq, demokratiya, büdcə, pensiya və s. Müxalifətin "İnternet-qeybət"də işltirak edənlərinin sıraları da iqtidardan qat-qat çoxdur. Lakin on illər davam edən uğursuzluğun səbəbi ortadadır: sözlər və real işlər başqa-başqa şeylərdir!
2013-cü ildə də müxalifətin real siyasi rəqib olmayacağı bəllidir!
Müsavat və AXCP-nin demokratik prinsiplərə riayət etməsi, liderlərin, şəxsiyyətlərin rolu, daha doğrusu, iddiaları, ümumiyyətlə, ayrıca təhlil edilməli mövzudur. Burada heç bir partiyadaxili rəqabətdən söhbət getmir. Belə partiyaların özlərini deyil, iqtidarı və xalqı "demokratiyaya çağırması" isə ən azı gülüncdür. Halbuki onların ən çox örnək kimi istinad etdikləri ABŞ-da, Fransada, Almaniya və İngiltərədə partiya liderləri gərgin partiyadaxili praymerizlər və rəqabət şəraitində seçilir. "Azadıq" şüarının inhisara alınması isə hələ onun mahiyyətinə əməl etmək deyil! "Hansı ölkədə "Azadlıq" radiosu və onun prezidentləri" yoxdursa, orada azadlıq və demokratiya yoxdur" - kimi bəsit düşünənlər var. Demokratiyanın meyarı yalnız, sadəcə, "siyasi azadlıq" şüarları deyil. Sosial rifah, iqtisadi yüksəliş, təhsil, səhiyyə - bunlar daha vacib məsələlərdir.
Beləliklə,
dəyişməyən müxalifət, təbii olaraq,
özünə elektorat deyil, "antielektorat"
formalaşdırır. Müxalifət iqtidara gəlməyin
qanuni-hüquqi strategiya və taktikasına malik deyilsə,
iqtidar da onun əvəzinə bu düşərgəni
yaratmaq səlahiyyətində deyil. Klassik ikipartiyalı
demokratiya ölkələrində bu, normal vəziyyət hesab
olunsa da, Azərbaycanda müxalifət mütləq maksimalizm
mövqeyini tutur və iqtidarı devirmək istəyir.
İqtidar öz opponentlərindən tam 20 il öndədir
Onillərlə
oturub heç nəyə cavabdeh olmadan, heç bir əziyyət
çəkmədən, xalq üçün heç nə
etmədən 20 illik "statuslu müxalifətçiliyin"
bəhrəsini görürlər. Yeni və gənc
nəsil müxalifətçilərin yetişməsi onlara
birmənalı olaraq sərf etmir.
Sözdə 20 ildir demokratiya, azadlıq, insan
hüquqlarının şüar edilməsini, işdə isə
bunun tamamlə əksini görürük. Bunun üçün hər
il başa bəla olan "vahid namizəd"
dilemmasına, liderlərin səlahiyyətinə, proqram və
nizamnamələrə, keçirilən qurultaylara baxmaq,
partiyadaxili demokratiyaya nəzər salmaq kifayətdir.
Bundan fərqli
olaraq, iqtidarın konkret, təfərrüatlı və
perspektivlərə hesablanmış milli proqram və layihələri,
konkret nəticələri var. İqtidar 20 il
əvvəlki zamanın, siyasi keçmişin
şüarlarında ilişib qalmayıb.
Sərbəst toplaşmalar və aksiyalar demokratiyanın
mühüm elementləri olduğu kimi, iqtidara alternativ olmaq
istəyən qüvvələrin intellekt səviyyəsi və
partiyadaxili demokratik prinsiplərə əməl etməsi də
vacibdir. Bu sahədə
iqtidar öz opponentlərindən tam 20 il
öndədir. Onlardan kimsə "Azərbaycan-2020: gələcəyə
baxış" İnkişaf Konsepsiyasına bənzər nəyi
isə hazırlayıbmı və bütün cəmiyyətin
müzakirəsinə təqdim edibmi? Cəmiyyətin
mühakiməsinə partiyadaxili innovasiyalara dair hər
hansı sənəd verilibmi? Təbii ki, yox,
çünki müxalifət nə desə - "mütləq
həqiqətdir" və müzakirəyə ehtiyacı
yoxdur! Bu gün dünyada və cəmiyyətimizdə
novasiyalara, dəyişikliklərə ehtiyac var və
onları iqtidar təqdim edir, xalq isə bunları təqdir
edir.
Nədənsə qanuni yollarla deyil, iqtidarı devirmək,
kütləvi iğtişaşlara, vətəndaş itaətsizliyinə
çağırmaq, antiazərbaycançı şəbəkə
ilə danışıqlar aparmaqla iqtidara gəlmək
üstün tutulur.
Müxalifət getdikcə totalitar təriqətə
çevrilir, öz davamçılarından liderlərinə,
sözsüz, itaət tələb edir. Hərə
öz liderini yeganə, əvəzolunmaz hesab edir. Artıq bu yanaşmanın "dəfn edilməsi"
zamanın işidir.
Bu gün
Azərbaycan vətəndaşı kiminsə yalnız iqtidar əleyhinə
çıxış etdiyinə görə onun ardınca getmək
fikrində və səviyyəsində deyil! Xalq artıq son 10
ildə dərk edib ki, Prezident İlham Əliyevi hədəfə
alanlar - Azərbaycanı hədəfə alanlardır! Onlar ideallıqdan uzaqdırlar, eyni zamanda, 90-cı
illərin fəlakətlərinin heç zaman təkrarlanmasına
yol verməyəcəklərinə də əmindirlər.
Müxalifət partiyalarının siyasi brendinin köhnəlməsi,
ritorik resursun tükənməsi, ictimai rəyin ənənəvi
manipulyasiya siyasətinin süqutu və yenilənmə zərurəti
göz önündədir. İctimai rəydə
nüfuzdan məhrum olan, yeniləşə bilməyən
müxalifət "öz-özü ilə şahmat
oynamaq" kimi ssenarini icra etmək məcbiriyyətindədir
və özü də bilmədən ehtiyatsızlıq
üzündən seytnot vəziyyətinə
düşmüşdür.
Azərbaycan
iqtidarının seçkilərdə uğurunu təmin edəcək
vasitələr
2013-cü il Azərbaycanın
inkişaf etmiş ölkəyə çevrilməsinin
reallaşmasına başlandığı ilk il olacaq və
tarixdə məhz bu adla qalacaq. İlin ən
böyük hadisəsi, bütün ölkələrdə və
bütün seçkilərdə olduğu kimi, xalqın
etimad göstərdiyi liderin seçilməsi olacaq. Bu
birmənalıdır! Liderin kimliyi barədə
saysız-hesabsız ssenarilər irəli sürülə bilər.
Lakin sonda xalqın seçimi hər şeyi həll edəcək!
Siyasi gündəmdə gedən müzakirələr bu
dəfə də "xalq öz səsini kimə verəcək"
sualına cavab axtarışlarından ibarət olmayaraq, yenə
də ictimai rəyə hərənin öz istədiyini bəyan
etmək yönündə gedir. Elə isə əsas sualları səsləndirmək
lazım gəlir: xalq səsini indiyə qədər kimə
verib? Onun seçiminin dəyişməsinə
təsir edə biləcək hər hansı amillər
mövcuddurmu? Növbəti 5 ilin yeni hədəflərin
qət edildiyi tarix olacağına əminlik yaradan hansı
amilləri yada salmaq olar?
Prezident seçkiləri hər bir ölkənin həyatında
ən mühüm hesab edilən siyasi proseslərdəndir. Bununla belə,
2013-cü ilə yalnız "siyasi hərarətin
artdığı mövsüm" kimi baxmaq dövlətimizi
gözləyən nəhəng dəyişikliklərin mahiyyətinin
natamam ifadəsi demək olardı.
O qədər
də uzaq olmayan müstəqillik tariximizə boylansaq görərik
ki, 1993-cü ildən, eləcə də 2003-cü ildən
başlayan tarixlər Azərbaycan dövlətçiliyinin
möhtəşəm səhifələrinin
yazılmasının başlanğıcı olmuşdur. Deməli,
2013-cü il də belə olacaq! Təbii olaraq, 20 ildən çox yaşanan müstəqilik
tarixi və demokratik dövlətçilik təcrübəsi
həmin gözləntilərin 2013-cü ildən etibarən
daha sürətlə reallaşdırılacağını təmin
edəcək.
Son on ilin ən başlıca yekunlarından biri -
Prezident İlham Əliyevin malik olduğu fundamental resursun -
xalqın etimadının artmasıdır.
2013-cü ilin ən yaddaqalan tarixi hadisəsi - xalqın
növbəti dəfə öz seçimini etməsi
olacaqdır.
Bu gün
- 2013-cü ildə Prezident İlham Əliyev heç vaxt
olmadığı qədər güclüdür! Xalqa verdiyi
sözlərin real nəticələri ilə! 10 il heç nə ilə müqayisə edilə
bilməyən şəxsi siyasi liderlik təcrübəsi ilə!
İrəli sürülən milli layihələrin ən
kiçik bəndinə qədər həyata keçirməsi
ilə! 10 ilin uğurlarının "islahatlar və
quruculuq" resursunun tam mənzərəsi ilə!
2008-ci il və sonrakı dövr qlobal maliyyə
böhranının hər bir dövlətin və siyasi liderlərin
strategiyasını sınaqdan çıxardığı illər
oldu. Azərbaycan bu sınaqdan üzüağ
çıxan nadir dövlətlərdən idi. Beləliklə də dövlət
başçısının siyasəti "ən doğru
siyasət" adını qazandı.
Son on ildə
reallaşan islahatlar siyasəti - demaqogiya və ritorikadan uzaq,
addımbaaddım həyata keçirilən siyasi
strategiyadır! Onun çəkisi o dərəcədə
böyükdür ki, inkarçı və qərəzli niyyətlərə
ciddi baxmaq üçün heç bir ümid yeri qoymur! Vətəndaş 20 ildir dəyişməyən partiya
proqramlarındakı qeyri-real duruma deyil, əhatəsindəki
reallığa baxır.
Azərbaycan əvvəlki iki onillikdə olduğundan
daha çox müstəqildir. Demokratik
inkişafın keyfiyyət mərhələsinə keçid
alınması üçün zəruri olan fundamental iqtisadi,
sosial, texnoloji resurslar təmin edilmişdir.
MİLLİ BREND: Müasir,
inkişaf edən güclü Azərbaycan dövləti
Prezident İlham Əliyevə xalqın dəstəyini
artıran əsas amillərdən biri də paradoksal olsa da, məhz
müxalifətdir. Bu, politologiyada "alternativsizlik"
resursu" adlanan qanunauyğunluqdur. Mənası
o deməkdir ki, bir tərəfdə müxalifətçi
qüvvələrin nüfuzunun düşməsi, təbii və
məntiqi olaraq iqtidarın siyasi çəkisinin artmasına
səbəb olur.
*
2013-cü ildən etibarən Azərbaycan inkişaf etmiş
ölkələrin səviyyəsinə catmağı hədəfə
alıb. Bu isə o deməkdir ki, siyasi sistemin
modernləşməsi, həmin ölkələrin
standartlarına uyğunlaşması prioritet kimi müəyyən
edilmişdir.
* Son illərin
mənzərəsi göstərir ki, Azərbaycan öz
müstəqil tarixini yaradıb, iqtisadiyyatda keçid
dövrünü qət edib. Ən böyük
nailiyyətlərdən biri də odur ki, Azərbaycan vətəndaşının
baxış istiqaməti dəyişdi, "keçmişdən
gələcəyə doğru" istiqamətləndi. İnsanların həyat strategiyasının zaman
üfüqü dəyişdi. Bu gün vətəndaş
öz həyat strategiyasını artıq neçə illər
əvvəlcədən planlaşdıra bilir, halbuki on il əvvəl bu, hələ mümkün
deyildi. Keçid, sınaq, eksperiment və s. kimi obyektiv sosial
praktikalardan, fors-major davranış modellərindən daimi və
gələcəyə hesablanmış fəaliyyətə
köklənmək həlledici sosial prosesə çevrildi. Fasiləsiz gözləntilər, inqilab və
böhranın nə zaman bitəcəyinə dair, bəlkə
yenidən xaosa yuvarlanmaq qorxuları vətəndaşı
tamamilə tərk etdi. Cəmiyyət bu
güzəranının, həyat axarının artıq həmişəlik
və davamlı olacağına əmin oldu. Bu, çox böyük qələbədir. Bu
gün artıq vətəndaş demokratik cəmiyyətdə
hakimiyyətin qolları və səviyyələrini ayırd
edə bilir və onun etirazları bəzi müxalifətçi
qüvvələrin arzu etdiyi kimi "bütövlükdə
hakimiyyətə" qarşı deyil, konkret problemi həll
etməli olan konkret quruma, məsul şəxsə və s.
yönəlir. Öz hüquqlarını sivil
formada təmin etmək vərdişləri formalaşıb.
* Bu illərdə
ölkədə həqiqətən də gerçək
müstəqil düşüncəyə malik gənclik
yetişib. Təşəbbüskar və kreativ gənclik ona
tələb və ehtiyac olduğunu görür və hiss
edir. Bunun səbəbi, ilk növbədə,
dövlətin həyata keçirdiyi siyasətdir. Həyat daha sabit olub, fəlakət ssenarilərinin
yaratdığı ovqat yox olub. Onu cidd-cəhdlə
müxtəlif vasitələrlə (müxalifətyönlü
KİV-lərdə və s.) canlandırmaq istəyənlər
isə məğlubiyyətə düçardır. İntellekt və savadına, təşəbbüskarlığına
görə həyatda özünüreallaşdıra bilənlər
cəmiyyətdə artıq bütöv bir təbəqə
təşkil edirlər. Onlar özlərinə
ehtiyac olmasının fərqindədirlər. Təhsil, peşəkarlıq, nikbinlik və yeniləşmə
arasında bağlılıq hər gün daha çox dərk
edilir.
* Dövlət
idarəçiliyində yüksək intellekt və peşəkarlığa
malik texnokratlar nəslinin çəkisinin artması - bu
elitanın təkamül yolu ilə transformasiyasıdır. Hakimiyyətin keyfiyyətinin dəyişməsi deməkdir.
"Elektron dövlət"in
formalaşması şaquli və üfüqi
fraqmentasiyanın aradan qaldırılmasına, korrupsiyanın
qarşısının alınmasına və bürokratik əngəllərin
dəf edilməsi ilə məmur-vətəndaş münasibətlərinin
ahəngini təmin etməyə hesablanmışdır.
* Son illərin
fundamental nailiyyətlərindən biri daxili bazar hesabına
sürətlə artan milli qeyri-neft sektorudur. Azərbaycanın
inkişaf etməkdə olan ölkələrin sırasına
qoşulmaq iddiasını ən çox doğruldan da məhz
bu sahənin artımıdır. Dünya təcrübəsindən
bəllidir ki, məhz bu sahə, iri biznesdən fərqli olaraq
"orta sinfə" daha yaxın olması baxımından
mühüm olan ideoloji dəyər əhəmiyyətinə
malikdir. .
* Cəmiyyətdə
inkişafın labüd müşayiətçisi kimi,
müsbət dinamikanın templərinin daha da
artırılması gözləntiləri mövcuddur. Siyasi elmdə bu fenomen "Tokvil effekti" kimi məlumdur.
Yəni, əksər hallarda xalqın yeni tələbləri,
onun rifahı siyasi sabitliyin artması fonunda irəli
sürülür. Bu onunla
bağlıdır ki, ictimai gözləntilərin
artımı, ictimai imkanların artımını şərti
olaraq həmişə üstələyir. Lakin son on ilin təcrübəsi göstərdi ki,
Azərbaycan xalqının lideri İlham Əliyevin rəhbərliyi
ilə həyata keçirilən siyasət bütün
gözləntilərdən öndədir.
Beləliklə,
2013-cü ildə də xalqın seçiminin dəyişməyəcəyi
və uğurlar gətirəcəyi artıq tam təsdiqini
tapmış formul kimi görünür! Qət etmək istədiyimiz
hədəflər isə "Azərbaycan-2020: gələcəyə
baxış" İnkişaf Konsepsiyasından aşkar bəllidir.
Əgər brend anlayışını tətbiq etmək olarsa "Müasir,
inkişaf edən güclü Azərbaycan dövləti"
qurmaq - milli brenddir! Siyasi islahatların sürətlənməsini
son 10 ilin qələbələri və uğurlarının məntiqi
davamı diktə edir. İqtisadi yüksəliş
diktə edir ki, biz siyasi sistemin modernləşməsinin də
yüksələn xətlə getməsini təmin edək.
Avropa
İttifaqı tərəfindən maliyyələşdirilən
layihə çərçivəsində "Avropa
Qonşuluğu Barometri"nin ölkəmizdə
keçirdiyi sorğu nəticəsində məlum olub ki,
respondentlərin 65 faizi öz həyatından razıdır,
69 faizi iqtisadiyyatın vəziyyətini yaxşı sayır,
60 faiz ölkədəki demokratikləşmə prosesinin nəticələrindən
razıdır, ən əsası isə 92 faiz öz hökumətinə
inanır. Yəni, bu gün Prezident İlham Əliyevə
etimadın göstəricisi 92 faiz təşkil edir!
Özü də bu sorğunu yerli sosial mərkəzlər
yox, məhz Avropa İttifaqının maliyyələşdirdiyi
xarici təsisat keçirib!
Siyasi
liderin arxasında xalq dayanır! Nə qədər ki, xalq
etimad göstərir, istənilən qüvvə ilə
mübarizənin nəticəsi məlumdur!
Bu
baxımdan, siyası lider kimi cənab İlham Əliyevin
heç bir rəqibi yoxdur!
Rəbiyyət ASLANOVA,
Milli Məclisin İnsan
hüquqları komitəsinin
sədri, fəlsəfə elmləri doktoru
Azərbaycan.-2013.- 28 aprel.- S.4.