Ulu öndərə ehtiramla

Cəmşid Naxçıvanski adına Hərbi Liseydə ümummilli lider Heydər Əliyevin anadan olmasının 90 illiyinə həsr edilmiş təntənəli mərasim keçirilmişdir. Mərasimə hərbi və ictimai xadimlər, hərbi liseyi bitirmiş yüksək rütbəli zabitlər dəvət edilmişdi. Tədbir 2003-cü ildə Heydər Əliyevin hərbi liseyə təqdim etdiyi bayrağın orkestrin müşayiəti ilə salona gətirilməsi ilə başladı.

General-mayor Mirzə Almasov giriş sözü ilə çıxış etdi. Ulu öndər Heydər Əliyevin Azərbaycan dövlətçiliyi tarixində müstəsna xidməti olduğunu xüsusi vurğulayan təhsil ocağının rəhbəri qeyd etdi ki, böyük rəhbərin C.Naxçıvanski adına Hərbi Liseyin açılması ilə həyata keçirməyə başladığı müdrik siyasəti Milli Ordumuzun formalaşmasına gətirib çıxarmışdır. Mərasimdə ümummilli liderin ordu quruculuğu, hərbi kadr hazırlığı, hərbi təhsilin müasir dünya standartlarına uyğunlaşdırılması istiqamətində aparılan siyasəti haqqında geniş danışıldı.

Sonra general M.Almasov təntənəli mərasimi aparmaq üçün sözü Heydər Əliyev irsinin araşdırıcısı, Müdafiə Nazirliyi Tərbiyə İşləri İdarəsinin zabiti, əməkdar incəsənət xadimi, polkovnik Abdulla Qurbaniyə verdi. A.Qurbani çıxış edərək hərbi liseyin yaradılmasında və uğurlu fəaliyyətində ulu öndər Heydər Əliyevin misilsiz xidmətlərindən söz açdı. Burada xüsusi vurğulandı ki, ordunun dövlət üçün nə qədər önəmli bir struktur olduğunu daim öncədən görən və layiqincə qiymətləndirən görkəmli dövlət xadimi əslində hələ sovet dönəmində - respublikamıza rəhbər vəzifəyə gətiriləndən iki il sonra, 1971-ci ildə böyük çətinlik və maneələri dəf edərək Azərbaycan gənclərinin Silahlı Qüvvələrdə daha geniş təmsil olunması üçün cəsarətli addımlar atdı, bu gün Cəmşid Naxçıvanski adına Hərbi Lisey kimi tanınan ixtisaslaşdırılmış orta hərbi məktəbin yaradılmasına nail oldu. Bu gün həmin məktəbin yetirmələri Azərbaycan Silahlı Qüvvələrinin kadr ehtiyatının əsasını təşkil edir.

Uzun müddət Sərhəd Qoşunlarına rəhbərlik etmiş, hazırda istefada olan general-mayor Abbasəli Novruzov isə çıxışında Azərbaycan müstəqilliyini bərpa etdikdən sonrakı ilk illərdə ölkədə yaranmış ağır vəziyyət barədə geniş məlumat verdi, sərhədlərimizin qorunması ilə bağlı ortaya çıxan problemləri xatırlatdı və onların aradan qaldırılması üçün ulu öndər Heydər Əliyevin həyata keçirdiyi tədbirlərdən danışdı. Ehtiyatda olan polkovnik Cəlil Xəlilov ümummilli liderin Azərbaycan dövlətçiliyinin möhkəmləndirilməsi naminə çoxşaxəli fəaliyyətindən söhbət açdı.

Prezident təqaüdçüsü Ömər Ağayev ümummilli liderin şəxsiyyət kimi ayrı-ayrı xarakterik cəhətlərindən söz açdı, onunla bağlı xatirələrindən danışdı.

Mərasimin rəsmi hissəsi başa çatdıqdan sonra qonaqlar C.Naxçıvanski adına Hərbi Liseyin muzeyində ümummilli liderlə bağlı hazırlanmış ekspozisiyaya baxdılar. Silahlı Qüvvələrin mahnı və rəqs ansambllarının yaradıcı heyəti mərasim iştirakçıları qarşısında maraqlı konsert proqramı ilə çıxış etdi.

Azərbaycan.-2013.- 28 aprel.- S.8.