Quam adasının ABŞ Konqresindəki nümayəndəsi 20 Yanvar və Xocalı faciələri ilə bağlı bəyanat vermişdir

ABŞ Konqresində Quam adasını təmsil edən nümayəndə Madelein Bordallo 20 Yanvar və Xocalı faciələri ilə bağlı bəyanatla çıxış etmişdir.

M.Bordallo 20 Yanvar hadisələrinin xalqımızın azadlıq mübarizəsini daha da gücləndirdiyini və nəhayət, bu proseslərin müstəqil Azərbaycan dövlətinin yaranması ilə nəticələndiyini bildirmişdir. O, bu gün dinamik inkişaf edən Azərbaycan ərazisində heç bir xarici hərbi birləşmənin olmadığını xüsusi vurğulamışdır.

Xocalı faciəsinə toxunan M.Bordallo Azərbaycanın Dağlıq Qarabağ regionunda baş verən bu faciənin Ermənistan-Azərbaycan münaqişəsində etnik azərbaycanlıların məruz qaldığı ən böyük qırğın kimi səciyyələndirmişdir. Eyni zamanda, o, Azərbaycanın dünyanın mühüm strateji əhəmiyyətli bölgəsində ABŞ-ın güclü tərəfdaşı olduğunu bildirmişdir.

Yusif BABANLI,

AzərTAc

Vaşinqton

AzərbaycaN.-2013.- 28 aprel.- S.9.