YAP nümayəndə heyəti Kambocanın Baş naziri, Kamboca Xalq Partiyasının lideri Xun Sen ilə görüşmüşdür

Yeni Azərbaycan Partiyasının (YAP) icra katibinin müavini, Milli Məclisin deputatı Mübariz Qurbanlı və beynəlxalq əlaqələr şöbəsinin müdiri Asəf Hacıyevin daxil olduğu nümayəndə heyəti Kamboca Xalq Partiyasının (KXP) dəvəti ilə bu ölkədə səfərdədir.

AzərTAc xəbər verir ki, səfər proqramına uyğun olaraq, YAP nümayəndə heyəti Kambocanın Baş naziri, KXP-nin lideri Xun Sen ilə görüşmüşdür. Görüşdə YAP ilə KXP arasındakı əməkdaşlığın fəaliyyətinin istiqamətləri və bütövlükdə ikitərəfli əlaqələrin perspektivləri müzakirə edilmişdir. YAP nümayəndə heyəti, eyni zamanda, KXP-nin iqamətgahında olmuş, partiyanın baş katibi Say Çum və digər məsul şəxslərlə görüşlər keçirmişlər.

Kambocanın Baş nazirinin müavini, KXP-nin aparıcı şəxslərindən biri olan Sok An ilə görüşdə Asiya Siyasi Partiyalarının Beynəlxalq Konfransı (İCAPP) çərçivəsində perspektiv planlar müzakirə olunmuşdur.

YAP nümayəndə heyətinin Kambocaya səfəri davam edir.

Azərbaycan.-2013.- 30 aprel.- S.3.