Nur şəhərində ulu öndər Heydər Əliyevin 90 illik yubileyinə həsr olunmuş konfrans keçirilmişdir

Mingəçevir şəhərində açılışı yenicə gerçəkləşən möhtəşəm Heydər Əliyev Mərkəzi respublikanın elektrik enerjisi sistemini təmsil edən fəalların ixtiyarında idi. Ulu öndərin 90 illik yubileyini qeyd etməyə toplaşan energetiklər ilk öncə Heydər Əliyevin abidəsinin önünə tər qızılgüllər düzdülər.

Tədbirdə çıxış edən "Azərenerji" Açıq Səhmdar Cəmiyyətinin prezidenti Etibar Pirverdiyev konfransın keçirilməsi üçün bu məkanın təsadüfi seçilmədiyini bildirdi. Bu gün ölkəmizin enerji təhlükəsizliyində əvəzsiz rol oynayan, nəinki respublikanın, eyni zamanda, bütün Qafqazın enerji nəhənginə çevrilmiş Mingəçevirin tikilib-qurulması məhz Heydər Əliyevin adı ilə sıx bağlıdır.

Etibar Pirverdiyev çıxışında ulu öndər Heydər Əliyevin müdrikliyi, uzaqgörən siyasəti sayəsində respublikamızda elektrik enerjisi sisteminin dinamik inkişaf yolu keçdiyini dönə-dönə vurğulamışdır. Bu gün qürurla dilə gətirilən Azərbaycanın enerji təhlükəsizliyinin bünövrəsi məhz ötən əsrin 70-ci illərində xalqımızın ümummilli lideri Heydər Əliyev tərəfindən qoyulmuşdur. Natiq qeyd etmişdir ki, Heydər Əliyevin təşəbbüsü və bir çox ciddi maneləri dəf edən yenilməz iradəsi ilə Cənubi Qafqazın ən böyük istilik elektrik stansiyası olan Azərbaycan İES-in birinci enerji bloku 1981-ci il oktyabrın 20-də istifadəyə verilmişdir. Respublika Prezidenti Ilham Əliyevin sərəncamı ilə hər il oktyabrın 20-i "Energetik günü" kimi qeyd olunur.

Konfransda Milli Məclisin deputatı Aydın Mirzəzadə, Mingəçevir Şəhər İcra Hakimiyyətinin başçısı Niyazi Bayramov, "Azərenerji" Açıq Səhmdar Cəmiyyətinin vitse-prezidenti Marlen Əsgərov xalqımızın ümummilli lideri Heydər Əliyevin Azərbaycana rəhbərlik etdiyi illər ərzində respublikada elektrik enerjisi sistemində qazanılmış misilsiz nailiyyətlərdən danışmışlar. Natiqlər son illər respublikamızda həyata keçirilən məqsədyönlü tədbirlər sayəsində ölkəmizin enerji idxalından azad olunmasını, Azərbaycanın etibarlı enerji təhlükəzliyinin təmin edildiyini qürurla vurğulamışlar.

Konfrans iştirakçıları adından Azərbaycan Prezidenti İlham Əliyevə müraciət qəbul olunmuşdur.

Maraqlı tədbir "Azərbaycanın müstəqil elektrik enerjisi sisteminin yaradıcısı" filminin nümayişi ilə başa çatmışdır.

Lazım QULİYEV

Azərbaycan.-2013.- 30 aprel.- S.9.