Ağdamlı gənclər qarşıdan gələn prezident seçkilərində dövlət başçısı İlham Əliyevi dəstəkləyəcəklər

Ağdam rayonunun Quzanlı qəsəbəsində qarşıdan gələn prezident seçkiləri və 12 avqust - Beynəlxalq Gənclər Gününə həsr olunmuş tədbir keçirilmişdir.

AzərTAc xəbər verir ki, tədbir Yeni Azərbaycan Partiyası (YAP) rayon təşkilatının və rayon gənclər və idman idarəsinin birgə təşkilatçılığı ilə keçirilmişdir.

YAP rayon təşkilatının sədri İsgəndər Quliyev, gənclər və idman idarəsinin rəisi Elnur Əhmədov tədbir iştirakçılarını qarşıdan gələn əlamətdar gün münasibətilə təbrik etmiş, həmin günün tarixi və əhəmiyyətindən, qarşıdan gələn prezident seçkilərindən danışmışlar.

Bildirilmişdir ki, Beynəlxalq Gənclər Günü 1998-ci il avqustun 8-dən 12-dək Lissabonda gənclərlə iş üzrə nazirlərin iştirakı ilə keçirilən beynəlxalq konfransda elan olunmuşdur. Həmin vaxtdan hər il avqustun 12-nin dünyada Gənclər günü kimi qeyd olunması qərara alınmışdır.

Vurğulanmışdır ki, Prezident İlham Əliyevin rəhbərliyi altında ölkəmizdə həyata keçirilən məqsədyönlü siyasətin nəticəsi olaraq müasir Azərbaycan gəncliyi yeni inkişaf mərhələsinə qədəm qoymuşdur. Ölkəmizdə gənclərin hərtərəfli inkişafı, onların dövlət quruculuğuna cəlb edilmələri, ictimai-siyasi fəallıqlarının artırılması üçün əlverişli şərait və möhkəm hüquqi baza yaradılmışdır.

Son 10 ildə ölkə həyatının bütün sahələrində əldə olunan uğurları qeyd edən natiqlər bildirmişlər ki, xalqımız növbəti beş ildə də Prezident İlham Əliyevi dövlət başçısı kimi görmək istəyir.

Mərasimdə iştirak edən gənclər ölkədə bütün sahələrdə gedən inkişafdan, aparılan gənclər siyasətindən məmnunluqlarını, qarşıdan gələn prezident seçkilərində ümummilli lider Heydər Əliyevin layiqli davamçısı dövlət başçısı İlham Əliyevi dəstəkləyəcəklərini bildirmişlər.

Sonda gənclər və idman idarəsi tərəfindən rayonun ictimai-siyasi həyatında fərqlənən bir qrup gəncə fəxri fərman və hədiyyələr verilmişdir.

Azərbaycan. - 2013.- 4 avqust.- S. 1.