Azərbaycan Respublikası Prezidentinin seçkilərində xüsusi seçki hesablarının açılması qaydaları haqqında TƏLİMAT

Razılaşdırılmışdır:

Azərbaycan Respublikası

Mərkəzi Bankının sədri

____________ E.S.RÜSTƏMOV

Azərbaycan Respublikası Mərkəzi Seçki

Komissiyasının 18 iyun 2013-cü il tarixli

6/38 saylı Qərarı ilə təsdiq edilmişdir.

Mərkəzi Seçki Komissiyasının sədri

______________ M.M.PƏNAHOV

Bu Təlimat Azərbaycan Respublikası Prezidentinin seçkilərində xüsusi seçki hesablarının açılması qaydalarını müəyyən etmək məqsədilə Azərbaycan Respublikası Seçki Məcəlləsinin (bundan sonra - Seçki Məcəlləsi) 94.1-ci maddəsinə əsasən hazırlanmışdır.

1. Ümumi müddəalar

1.1. Azərbaycan Respublikası Prezidentinin seçkilərində xüsusi seçki hesablarının açılması qaydaları Seçki Məcəlləsinin 91-ci, 190-cı maddələri, "Banklar haqqında" Azərbaycan Respublikasının Qanunu və bu Təlimatla tənzimlənir.

1.2. Prezidentliyə namizədin (bundan sonra - namizədin) seçki fondunun formalaşdırılması məqsədilə xüsusi seçki hesabı açılır.

1.3. Namizədin irəli sürülməsinə dair bildiriş və ya siyasi partiya, siyasi partiyaların blokunun buna dair qərarı Mərkəzi Seçki Komissiyasına təqdim edildikdən sonra, lakin namizədin qeydə alınması üçün tələb olunan sənədlərin komissiyaya təqdim edilməsi gününə azı 5 gün, o cümlədən namizədin qeydiyyatı üçün zəruri olan seçici imzalarının yığılmasına azı 24 saat qalmış xüsusi seçki hesabı açılmalıdır.

1.4. Namizədlərin yalnız bir xüsusi seçki hesabı ola bilər.

1.5. Xüsusi seçki hesabları yalnız Azərbaycan Respublikasının Beynəlxalq Bankında və onun filiallarında açılmalıdır.

2. Namizəd özü və ya seçicilərin təşəbbüs qrupu tərəfindən irəli sürüldükdə, xüsusi seçki hesabının açılması üçün tələb edilən sənədlər

2.1. Namizəd və ya onun səlahiyyətli nümayəndəsi aşağıdakı sənədləri müvafiq banka təqdim etməlidir:

2.1.1. xüsusi seçki hesabının açılması üçün ərizə;

2.1.2. xüsusi seçki hesabının açılması üçün müraciət edənin şəxsiyyətini təsdiq edən sənəd;

2.1.3. Seçki Məcəlləsinin 53.2-ci maddəsinə uyğun olaraq tərtib edilərək Mərkəzi Seçki Komissiyasına təqdim olunmuş bildirişin komissiya tərəfindən təsdiq edilmiş surəti;

2.1.4. Seçki Məcəlləsinin 53.3-cü maddəsinin tələbinə uyğun olaraq tərtib edilmiş və namizədliyi irəli sürülmüş şəxsin məhkumluğunun olub-olmaması, vətəndaşlıq vəziyyəti və başqa dövlətlər qarşısında öhdəliyinin olub-olmamasına dair məlumatlar, habelə prezident seçiləcəyi halda, həmin vəzifə ilə uzlaşmayan fəaliyyətinə xitam verəcəyi barədə öhdəliyi göstərilmiş ərizə;

2.1.5. namizədin səlahiyyətli nümayəndəsinin notariat qaydasında rəsmiləşdirilmiş vəkalətnaməsi (əgər səlahiyyətli nümayəndə təyin edilmişdirsə);

2.1.6. notariat qaydasında təsdiq edilmiş imza nümunəsi vərəqəsi (xüsusi seçki hesabı üzrə əməliyyat aparan şəxsin).

Qeyd: Təlimatın 2.1.4-cü bəndində göstərilən sənəd bank tələb etdikdə təqdim edilir.

3. Namizəd siyasi partiya tərəfindən irəli sürüldükdə, xüsusi seçki hesabının açılması üçün tələb edilən sənədlər

3.1. Xüsusi seçki hesabı açmaq səlahiyyəti verilmiş şəxs aşağıdakı sənədləri müvafiq banka təqdim edir:

3.1.1. xüsusi seçki hesabının açılması üçün ərizə;

3.1.2. siyasi partiyanın dövlət qeydiyyatına alınması haqqında sənədin (şəhadətnamənin) notariat qaydasında təsdiq edilmiş surəti;

3.1.3. siyasi partiyanın qüvvədə olan nizamnaməsinin notariat qaydasında təsdiq edilmiş surəti;

3.1.4. namizədin irəli sürülməsi barədə siyasi partiyanın qurultayının (konfransının, rəhbər orqanı iclasının) qərarı və müvafiq iclasın protokolu;

3.1.5. Seçki Məcəlləsinin 54.8-ci maddəsinin tələbinə uyğun olaraq tərtib edilmiş və namizədliyi irəli sürülmüş şəxsin məhkumluğunun olub-olmaması, vətəndaşlıq vəziyyəti və başqa dövlətlər qarşısında öhdəliyinin olub-olmamasına dair məlumatlar, habelə prezident seçiləcəyi halda, həmin vəzifə ilə uzlaşmayan fəaliyyətinə xitam verəcəyi barədə öhdəliyi göstərilmiş razılıq ərizəsi;

3.1.6. siyasi partiyanın maliyyə məsələləri üzrə səlahiyyətli nümayəndəsinin vəkalətnaməsi.

3.1.7. notariat qaydasında təsdiq edilmiş imza və möhür nümunələri vərəqəsi.

Qeyd: Təlimatın 3.1.3-cü, 3.1.5-ci bəndlərində göstərilən sənədlər və 3.1.4-cü bəndindəki iclas protokolu bank tələb etdikdə təqdim edilir.

4. Namizəd siyasi partiyalar bloku tərəfindən irəli sürüldükdə, xüsusi seçki hesabının açılması üçün tələb edilən sənədlər

4.1. Xüsusi seçki hesabı açmaq səlahiyyəti verilmiş şəxs aşağıdakı sənədləri müvafiq banka təqdim edir:

4.1.1. xüsusi seçki hesabının açılması üçün ərizə;

4.1.2. siyasi partiyalar blokuna daxil olan siyasi partiyaların qurultaylarının (konfranslarının, rəhbər orqanı iclasının) namizəd irəli sürmək barədə qərarları ilə birlikdə müvafiq iclasların protokolları;

4.1.3. siyasi partiyalar blokuna daxil olan siyasi partiyaların nümayəndələri iclasının (qurultayının, konfransının) siyasi partiyaların bloku adından namizəd irəli sürülməsi haqqında qərarı və müvafiq iclasın protokolu;

4.1.4. Seçki Məcəlləsinin 54.8-ci maddəsinin tələbinə uyğun olaraq tərtib edilmiş və namizədliyi irəli sürülmüş şəxsin məhkumluğu, vətəndaşlıq vəziyyəti, başqa dövlətlər qarşısında öhdəliyinin olub-olmamasına dair məlumatlar, habelə prezident seçiləcəyi halda, həmin vəzifə ilə uzlaşmayan fəaliyyətinə xitam verəcəyi barədə öhdəliyi göstərilmiş razılıq ərizəsi;

4.1.5. maliyyə məsələləri üzrə səlahiyyətli nümayəndənin notariat qaydasında və ya Azərbaycan Respublikası Mülki Məcəlləsinin müəyyən etdiyi qaydada təsdiq edilmiş vəkalətnaməsi.

4.1.6. notariat qaydasında təsdiq edilmiş imza nümunəsi vərəqəsi (xüsusi seçki hesabı üzrə əməliyyat aparan şəxsin).

Qeyd: Təlimatın 4.1.2-ci, 4.1.3-cü bəndlərində göstərilən iclas protokolları və 4.1.4-cü bəndindəki sənəd bank tələb etdikdə təqdim edilir.

5. Xüsusi seçki hesablarının açılması və seçki fondu vəsaitləri üzərində sərəncam verilməsi

5.1. Yuxarıda göstərilən sənədlər təqdim edildikdə, müvafiq bank namizədə dərhal, lakin 3 gündən artıq olmayan müddətdə xüsusi seçki hesabı açmalıdır. Bütün pul vəsaiti xüsusi seçki hesablarına manatla köçürülür.

5.2. Xüsusi seçki hesabının vəsaitləri üzərində sərəncam verilməsi namizədin özü, onun təyin etdiyi səlahiyyətli nümayəndə və yaxud namizədlə razılaşdırılmaqla onun namizədliyini irəli sürmüş siyasi partiya və ya siyasi partiyalar bloku tərəfindən təyin edilmiş maliyyə məsələləri üzrə səlahiyyətli nümayəndə tərəfindən həyata keçirilir.

6. Yekun müddəalar

6.1. Bu Təlimat qüvvəyə mindiyi gündən Mərkəzi Seçki Komissiyasının 4 iyul 2008-ci il tarixli 6/23-8 saylı qərarı ilə təsdiq edilmiş "Azərbaycan Respublikası Prezidentinin seçkilərində xüsusi seçki hesablarının açılması qaydaları haqqında" Təlimat qüvvədən düşmüş hesab edilir.

Azərbaycan. - 2013.- 4 avqust.- S. 4.