Dövlət dəstəyi səmərəli fəaliyyətə daha yaxşı şərait yaradır

Ölkəmizdə sahibkarlığın inkişafına ayrılan vəsait, kredit və subsidiyalar, həmçinin digər güzəştlər sahibkarların gələcək uğurlarını şərtləndirməklə yanaşı, bu işə həvəs və bağlılığı daha da artırır.

Regionlarda dövlətin maliyyə dəstəyindən əlavə, sahibkarlığın inkişafı üçün yaradılan şərait, işgüzar mühitin formalaşması da mühüm əhəmiyyət kəsb edir. Zaqatala Rayon İcra Hakimiyyətinin başçısı Mübariz Əhmədzadə söhbət zamanı bildirdi ki, sahibkarlıq fəaliyyətində məqsəd təkcə gəlir əldə etmək, mənfəət qazanmaq olmamalıdır, sahibkar milli mənafeni, xalqa və Vətənə xidməti işinin prioritet istiqaməti hesab etməlidir. Belə olan halda sahibkar üçün daha geniş perspektivlər və imkanlar yaranır.

Zaqatalada üç sahibkarla - Abdurəhman Soltanov, Telman Həsrətov və Gülüzar Məmmədova ilə tanış olduq, işləri, fəaliyyətləri ilə maraqlandıq. Hər üçü zəhmətin nə olduğunu yaxşı bilən, öz sahibkarlıq fəaliyyətləri ilə Zaqatalaya, zaqatalalılara yararlı olmağa çalışan insanlardır.

Abdurəhman Soltanov 1960-cı ildə rayonun Suvagil kəndində doğulub. 1982-ci ildə Gəncə Dövlət Pedaqoji İnstitutunun riyaziyyat fakültəsini bitirib. Qardaşlarının kənd təsərrüfatı işlərinə bağlılıqları, evlərində zəhmətin, torpaqda çalışmağın nə olduğunu yaxşı bilmələri Abdurəhmanın da həyatında, əmək fəaliyyətində dönüş yaradıb - 1999-cu ildən qoyunçuluqla məşğul olmağa başlayıb. Vaxtilə kolxozda birlikdə çalışdıqları 5-6 nəfərlə yığışıb qoyunçuluq üzrə kəndli-fermer təsərrüfatı yaradıblar. Kolxoz ləğv olunanda paylarına 380 baş davar düşüb. Hazırda isə 3100 başdan ibarət sürüləri var.

A.Soltanov işini və zəhməti sevən, söhbətcil insandır. Deyir ki, qoyunçuluq çətin olsa da, maraqlıdır, həm də xeyir-bərəkəti, mənfəəti olan sahədir. Hacınohur adlanan ərazidə qışlaqları var, yayda isə Zaqatala dağlarına qalxırlar. Təsərrüfatlarında 9 nəfər çalışır. Satış üçün əti bazarlara çıxarırlar, südü yalnız pendir halında satır, yunu Zaqataladan əlavə, Bakıya, Sumqayıta göndərirlər. Ancaq dediyinə görə, ət satışından gələn gəlir digər sahələri üstələyir.

Maraqlıdır ki, bu il son 30 ildə birinci dəfə qoyunlar yunu qırxılmamış dağlara qalxmalı olublar. Havaların kəskin dəyişməsi lazımi işi vaxtında görməyə imkan verməyib. Az qala yazla yay üst-üstə düşüb.

Dövlətin yüksək dəstəyindən, rayonda onlar üçün yaradılan şəraitdən razılıq edən A.Soltanov dedi ki, qoyunçuluqla məşğul olan fermerlər müəyyən miqdarda arpa da əkə bilərlər. Dövlət qayğısı olmasa, qoyunları qışdan çıxarmaq çox çətin olar. Normal fəaliyyət üçün ölkədəki əmin-amanlığı yüksək qiymətləndirən Abdurəhman gələcəkdə təsərrüfatı genişləndirmək, əti, südü, yunu ilkin emal edib satmaq fikrindədir.

Telman Həsrətov keçmiş hərbçidir. Torpağa bağlılığı onu kənd təsərrüfatı sahəsinə gətirib. Zabit kimi ehtiyata buraxılandan sonra taxıl toxumçuluğu ilə məşğul olmağa başlayıb. Hərbçilikdən gələn dəqiqliyi, işə çevik münasibəti, eləcə də sadəliyi və səmimiliyi, işgüzarlığı ilə böyük hörmət qazanıb. Bunun nəticəsidir ki, müəyyən bir çətinliklə bağlı hansısa qapını döysə, heç vaxt ümidsiz qayıtmır.

T.Həsrətov 2013-cü ilin məhsulu üçün 295 hektar sahədə toxumluq buğda, 56 hektar sahədə arpa əkib. Səpin üçün Rusiyadan gətirilmiş "Krasnodar-99", "Tanya", "Nota" və Azərbaycanın "Aran", "Şəki-1" sortlarından istifadə edir. Ümumilikdə 600 hektara yaxın taxıl əkən Telman 20 hektar sahədə qarğıdalı da becərib. Taxılın hər hektardan orta məhsuldarlığı 25 sentnerdən yuxarı olub. Qarğıdalı isə 40 hektardan sentner gözlənilir.

Ötənilki zəlzələ zamanı T.Həsrətovun həm evinə, həm də taxıl anbarlarına ziyan dəymişdi. Dövlət tərəfindən yeni ev tikilərək təhvil verilib, anbarların təmirinə tikinti materialları ilə kömək göstərilib. 500 və 1000 tonluq anbarlar təsərrüfat üçün çox əhəmiyyətlidir.

Telman mövsümə uyğun 30 nəfərlə çiyin-çiyinə çalışır. İlyas Bəkirov, Fikrət Məmmədov, İdris Səfərov, İdris Əlixanov, İlham Bəkirov işgüzarlıqları ilə seçilirlər. Bütün kollektiv çalışır ki, ilbəil uğurları artırsınlar. Bunun nəticəsidir ki, satış üçün 1000 tona yaxın yüksək kondisiyalı toxum tədarük görüblər. Əsas məqsədləri gələn ilin əkin sahələrini 1000 hektara çatdırmaq və əkin zamanı növbəlilik prinsipinə ciddi əməl etməkdir. Məhsuldarlığa, keyfiyyətə təsir edən amillərdən biri də məhz budur.

Fermer Gülüzar Məmmədova "Maqov" özəl toxumçuluq təsərrüfatını 2010-cu ildə yaradıb. Təsərrüfatda 15 nəfərə yaxın işçi çalışır. Əkin traktoru, kombayn, toxumtəmizləyən və digər texnikalar imkan verir ki, ehtiyac üçün kiminsə qapısını döyməsinlər. 500 tonluq tutumu olan anbar da hələlik yetərli sayılır.

2012-ci ilin göstəriciləri ilə maraqlandıq. Öyrəndik ki, 114 hektar buğda sahəsindən 200 ton məhsul götürülüb. Bu məhsuldan 117 ton II reproduksiyalı toxum alıblar. 2013-cü ilin məhsulu üçün isə 174 hektar - əvvəlki ildəkindən 60 hektar çox taxıl əkilib. Onun da 42 hektarı arpa, qalanı buğdadır. Müəyyən iqlim çətinliklərinə, əlverişsiz hava şəraitinə baxmayaraq, 350 ton məhsul götürüblər - 270 ton buğda, 80 ton arpa. Bu məhsuldan isə ümumilikdə 300 ton toxum alacaqları gözlənilir.

G.Məmmədova bildirdi ki, biçindən sonra yay şumuna hazırlıq görürlər. Gülüzar xanım onu da əlavə etdi ki, oğlu Şamil Moskvada kənd təsərrüfatı üzrə ali təhsil alır, ikinci kursdadır. O, qayıdıb gələndən sonra təsərrüfat işlərinə yəqin ki, köməyi çox dəyəcək.

Dövlət dəstəyindən G.Məmmədova ürəklə danışdı, razılığını bildirib dedi ki, bu qayğıya görə fəaliyyətlərini daha da genişləndirməyi düşünürlər.

Bəli, dövlətin və Prezident İlham Əliyevin sahibkarlara, kənd təsərrüfatı məhsulları istehsalçılarına diqqəti və qayğısı insanları daha da ruhlandırır, torpaq və zəhmət adamlarının qarşısında geniş perspektivlər açır. Zaqatalada görüşdüyümüz fermerlər söhbət əsnasında onu da vurğuladılar ki, qarşıdan gələn prezident seçkilərində yenə İlham Əliyevə səs verəcəklər:

- Çünki həm özümüzün, həm də ölkəmizin daha uğurlu gələcəyi üçün başqa seçim ola bilməz.

T.NƏZƏRLİ

Azərbaycan. - 2013.- 4 avqust.- S. 5.