«Azərbaycan Hava Yolları»nın kollektivi prezident seçkilərində dövlət başçısı İlham Əliyevin namizədliyini dəstəkləyəcəkdir

"Azərbaycan Hava Yolları" Qapalı Səhmdar Cəmiyyətində (QSC) geniş kollegiya iclası keçirilmişdir.

AzərTAc xəbər verir ki, "AZAL" QSC-nin prezidenti Cahangir Əsgərov iclasda çıxış edərək son 10 ildə milli aviasiyamızın inkişafı sahəsində görülmüş işlərdən danışmışdır. Bildirilmişdir ki, hava nəqliyyatının ümummilli lider Heydər Əliyev tərəfindən başlanmış əsaslı surətdə yenidən qurulması prosesini Azərbaycan Prezidenti İlham Əliyev uğurla davam etdirmişdir. Həqiqətən də son 10 il milli aviasiyanın sürətli inkişaf mərhələsi olmuşdur. Hava nəqliyyatının infrastrukturu yenilənmiş, yeni hava limanları, yeni marşrutlar açılmış, təyyarə parkı müasirləşdirilmişdir. 2004-cü ildə müasir standartlara uyğun Naxçıvan Beynəlxalq Hava Limanı, 2006-2011-ci illərdə bir-birinin ardınca Gəncə, Zaqatala, Lənkəran və Qəbələdə aeroportlar istifadəyə verilmişdir.

Heydər Əliyev Beynəlxalq Aeroportunda möhtəşəm "Baku Cargo Terminal"ı, "Holiday İnn" mehmanxanası (hazırda "Sheraton" adlanır) və beynəlxalq standartlara cavab verən 4000 metrlik yeni uçuş-enmə zolağı tikilib istifadəyə verilmişdir. MDB məkanında və Şərqi Avropada ilk dəfə olaraq beynəlxalq standartlara cavab verən "Boeing-757", "Boeing-767", "Airbus-319" və "Airbus-320" tipli təyyarələrin trenajor mərkəzi yaradılmışdır. Bununla yanaşı, Beynəlxalq Logistika Mərkəzi də açılmışdır.

Hazırda Heydər Əliyev Beynəlxalq Aeroportunda müasir standartlara uyğun yeni aerovağzal kompleksinin tikintisi sürətlə davam etdirilir. Kompleksin təməlini Azərbaycan Prezidenti İlham Əliyev qoymuşdur.

Son illər ərzində Azərbaycanın milli aviadaşıyıcısının təyyarə parkı 50-yə yaxın müasir tipli hava gəmisinin alınması ilə daha da zənginləşmişdir. Bütün bunlar son 10 ildə həyata keçirilmiş uğurlu islahatların bəhrələridir.

Hava nəqliyyatının daha da inkişaf etdirilməsi üçün kadr hazırlığı da diqqət mərkəzində saxlanılmışdır. Milli Aviasiya Akademiyası Beynəlxalq Mülki Aviasiya Təşkilatının Mülki Aviasiya sahəsində mütəxəssis hazırlayan ali təhsil müəssisələrinin reyestrinə daxil edilmiş, Azərbaycan Respublikası Təhsil Nazirliyi tərəfindən attestasiya və akkreditə olunmuş, Dövlət Mülki Aviasiya Administrasiyası və Dövlətlərarası Aviasiya Komitəsi tərəfindən sertifikatlaşdırılmışdır. Bunlar Milli Aviasiya Akademiyasına aviasiya mütəxəssislərinin hazırlanması üzrə tam hüquqlu ali təhsil müəssisəsi səlahiyyətini vermişdir.

"AZAL" QSC-nin prezidenti Cahangir Əsgərov demişdir ki, xalqımız 2003-cü ildə öz inkişaf yolunu seçmişdir. Bu yol ulu öndər Heydər Əliyev yoludur. Azərbaycanı bu yolla irəliyə Prezident İlham Əliyev aparır. Bu yolun gələcəyi daha işıqlıdır. Milli aviasiyamızın çoxmilli kollektivi oktyabrın 9-da keçiriləcək prezident seçkilərində İlham Əliyevin namizədliyini dəstəkləyəcəkdir. Çünki ölkəmizdə inkişafın Heydər Əliyev strategiyasının alternativi yoxdur.

Kollegiya iclasında çıxış edən digər natiqlər də qeyd etmişlər ki, Azərbaycanda ictimai-siyasi sabitliyin qorunub saxlanmasında, sosial-iqtisadi inkişafın təmin olunmasında və ölkəmizin dünyada layiqli yer tutmasında Prezident İlham Əliyevin böyük xidmətləri vardır. Məhz bu amilləri nəzərə alan ölkənin bütün mülki aviasiya işçiləri yekdilliklə növbəti seçkilərdə də dövlət başçısı İlham Əliyevə səs verəcəklər.

Azərbaycan. - 2013.- 8 avqust.- S. 4.