Heydər Əliyev Fondunun dəstəyi ilə IV muğam televiziya müsabiqəsi başlamışdır

 

Heydər Əliyev Fondunun dəstəyi və Azərbaycan Mədəniyyət Fondunun layihəsi əsasında IV muğam televiziya müsabiqəsi başlamışdır.

AzərTAc xəbər verir ki, müsabiqənin ilk günü maraqlı ifalarla yadda qalmışdır. Əvvəlcə seçim turları nəticəsində Beynəlxalq Muğam Mərkəzində çıxış etmək hüququ qazanan 21 gəncdən 11-i tamaşaçılara təqdim olunmuşdur. Sonra "Muğam" instrumental ansamblının müşayiəti ilə xanəndələr öz məharətlərini göstərmişlər.

Bu gənclər müxtəlif rayon və şəhərlərdə aparılan dinləmələrdə yaşıdlarından seçilən istedad sahibləridirlər. Ümumilikdə 500-dən çox gəncin iştirak etdiyi birinci turdan növbəti mərhələyə 48 xanəndə vəsiqə almış, onlardan isə 21-i Bakı səhnəsində ifa etmək hüququ qazanmışdır. Artıq bir ənənəyə çevrilən və dördüncü dəfədir ki, keçirilən muğam televiziya müsabiqəsinin münsiflər heyəti də həmişə olduğu kimi peşəkarlardan ibarətdir.

Maraqlı ifalarla yadda qalan müsabiqənin birinci günündə gənc xanəndələrin ifasında "Sona bülbüllər", "Küçələrə su səpmişəm", "Şuşanın dağları" və digər xalq mahnıları, eləcə də təsniflər tamaşaçılara təqdim olunmuşdur.

Dördüncü muğam televiziya müsabiqəsi həftədə iki dəfə - çərşənbə axşamı və cümə axşamı sənətsevərlərin görüşünə gələcəkdir. Müsabiqənin bütün konsertləri Azərbaycan Televiziyası ilə canlı yayımlanacaqdır.

 

Azərbaycan. - 2013.- 8 avqust.- S. 11.