Böyük mədəniyyətin möhtəşəm ifadəsi

 

Azərbaycanın bənzərsiz gözəlliklərə malik Qəbələ  rayonu ildən-ilə möhtəşəm beynəlxalq tədbirlərə daha məhəbbətlə qucaq açır. Bu tədbirlərin yüksək səviyyədə keçirilməsi üçün rayonun hər cür imkanı və potensialı var. Tədbirlərdə iştirak edən qonaqlar Qəbələnin sürətli inkişafına, gözəlliyinə və müasirliyinə heyranlıqlarını böyük səmimiyyətlə bildirirlər.

Təsadüfi deyildir ki, MDB-nin üzv dövlətlərinin humanitar sahə üzrə Əməkdaşlıq Şurasının və təşkilata üzv Dövlətlərarası Fondunun 2012-ci il oktyabrın 15-dən 17-dək  Aşqabadda keçirilmiş birgə iclasında məhz Qəbələnin MDB-nin mədəniyyət paytaxtı elan olunması çox təbii qarşılandı.

2013-cü il iyunun 29-da Qəbələdə "MDB-nin mədəniyyət paytaxtları-2013" dövlətlərarası proqramının təntənəli açılış mərasimi keçirildi və Qəbələnin 2013-cü ildə MDB-nin mədəniyyət paytaxtı seçilməsi ilə bağlı sertifikat rayon icra hakimiyyətinin başçısı Səbuhi Abdullayevə təqdim edildi. Şübhəsiz, bu, Qəbələ və qəbələlilər, eləcə də bütün ölkəmiz üçün çox qürurvericidir. Bu qürur dolu duyğuların, "paytaxt" təəssüratının təsiri azalmamış Qəbələdə daha möhtəşəm bir tədbir - Qəbələ V Beynəlxalq Musiqi Festivalı başladı. Heydər Əliyev Fondunun təşkilatçılığı ilə beşinci ildir ki, keçirilən bu musiqi festivalı hər dəfə əsl incəsənət bayramına çevrilir. Əgər birinci festivala dünyanın 16 ölkəsindən - ABŞ-dan, Fransadan, Rusiyadan, Çindən, Xorvatiyadan və digər ölkələrdən musiqili qonaqlar qatılmışdırsa, beşinci festivalda 30-dan çox ölkədən tanınmış sənətçilər iştirak edirdi. Bu, festivalın səviyyəsi ilə yanaşı, yüksək təşkilatçılıq işi ilə də şərtlənir. Bu baxımdan musiqi festivalının təşkilatçısı olan Heydər Əliyev Fondunun zəhməti yüksək qiymətləndirilməlidir.

İyulun 24-də keçirilən açılış mərasimində də Heydər Əliyev Fondunun prezidenti, UNESCO-nunİSESCO-nun xoşməramlı səfiri, Milli Məclisin deputatı Mehriban xanım Əliyevanın iştirakçılara ünvanladığı təbrik məktubu oxundu. Ölkənin birinci xanımı məktubda incəsənət bayramı iştirakçılarını salamlamış, festivalın işinə uğurlar arzulamış, UNESCO-nun xoşməramlı səfiri kimi dünya mədəniyyəti xəzinəsini olduqca dəyərli əsərlərlə zənginləşdirmiş, Azərbaycan xalqının mədəni irsinin dünyada təbliğ olunmasına, dünya mədəniyyət nümunələrinin ölkəmizdə tanıdılmasına xidmət edən, xalqlararası mədəni-mənəvi inteqrasiyanın səmərəliliyini artıran layihələri daim dəstəkləyəcəyini vurğulamışdır: "Nüfuzu ildən-ilə artmaqda olan Qəbələ Beynəlxalq Musiqi Festivalının keçirilməsi ənənəvi xarakter almışdır. Bu gün Qəbələnin adı beynəlxalq təbirlərin təşkil olunduğu şəhərlərin adları ilə bir sırada yer alır. Dünyanın bir çox ölkəsindən çoxsaylı musiqiçilərin iştirak etdiyi bu dostluqmusiqi bayramı mədəni irsimizin zəngin ənənələrinin qorunub saxlanması ilə yanaşı, müxtəlif ölkələri təmsil edən musiqiçilərə ünsiyyət və əməkdaşlıq üçün əlverişli şərait yaradaraq mədəniyyətlərarası dialoqun möhkəmləndirilməsinə öz töhfəsini verir.

İnanıram ki, Azərbaycan və dünya bəstəkarlarının əsərləri səslənəcək builki festival, füsunkar təbiətin və valehedici musiqinin gözəl vəhdəti hər birimizdə xoş təəssüratlar yaradacaqdır. Festivalda iştirak edən hər kəsə tükənməz nailiyyətlər arzulayıram".

Onu da qeyd etmək lazımdır ki, festivalın proqramına dünya və Azərbaycan bəstəkarlarının əsərləri salınmış, gənc ifaçılar, dünya şöhrətli musiqiçilər eyni səhnəni paylaşmışlar. Tamaşaçılar tərəfindən klassikkamera musiqisi, Azərbaycan muğamları böyük maraqla qarşılanmışdır.

Hər musiqi axşamının özünəməxsus tamaşaçı auditoriyasının toplaşması baxımlılığı və marağı artırır, ifaçı-dinləyici ünsiyyətini daha yaxın edirdi. Pyotr Çaykovskinin, Qara Qarayevin, Fikrət Əmirovun, V.Motsartın, D.Şostakoviçin, E.Qriqin və digər dünyaca ünlü bəstəkarların əsərlərinin yaratdığı təəssürat, sözsüz ki, uzun müddət yaddaşların bəzəyi olacaq. Dünya şöhrətli ifaçıları canlı dinləmək isə əlbəttə, tamaşaçılara böyük zövq verirdi.

Festival günlərində bütün Qəbələ, ətraf rayonlar bu böyük incəsənət bayramı ilə nəfəs alırdı.

Festivalın keçirilməsində, Azərbaycan mədəniyyətinin inkişafında və dünya miqyasında təbliğində Heydər Əliyev Fondunun prezidenti, UNESCO və İSESCO-nun xoşməramlı səfiri, Milli Məclisin deputatı Mehriban xanım Əliyevanın əvəzsiz işlər gördüyünü xüsusi vurğulayan Azərbaycan Ağsaqqallar Şurasının sədri, Milli Məclisin deputatı Fəttah Heydərovun jurnalistlərə müsahibəsindən: "Bu günlərdə müxtəlif tədbirlərdə iştirak etmək üçün Azərbaycana gələn qonaqlar da Qəbələdə musiqi festivalının keçirildiyini hiss edirlər. Bu festival həm də böyük maarifçilik missiyası daşıyır. Dünyanın hər yerindən  Qəbələnin səsi gəlir, bu gözəl diyarda isə dünya musiqisi səsləndirilir. Bu festival Azərbaycan xalqının yüksək mədəniyyətə sahib olduğunu bir daha təsdiqləyir. Hər il olduğu kimi, builki festival günlərində də Qəbələdən əlavə, Bakı, Gəncə, Oğuz, Ağdaş, İsmayıllı, Şəki, Göyçay və Mingəçevirdən müəllimlər, musiqiçilər, həkimlər, ziyalılar, gənclər konsertlərə gəlir və Azərbaycan bəstəkarlarının simfonik əsərlərini, dünya musiqi incilərini heyranlıqla dinləyirlər. Qəbələ festivalı xarici qonaqlara Azərbaycan mədəniyyətini təqdim etməklə yanaşı, çoxsaylı yerli musiqisevərləri dünya bəstəkarlarının klassik əsərləri və məşhur musiqiçilərlə yaxından tanış edir".

Qeyd edək ki, Qəbələ V Beynəlxalq Musiqi Festivalında yubileylərə həsr olunmuş konsert proqramları ilə yeni bir ənənənin də əsası qoyuldu. Belə ki, dahi italyan bəstəkarı Cüzeppe Verdinin iki yüzillik yubileyinin Qəbələ səhnəsində qeyd edilməsi də çox əlamətdardır.

Festivalın bədii rəhbərlərindən olan, Ü.Hacıbəyli adına Bakı Musiqi Akademiyasının rektoru, xalq artisti Fərhad Bədəlbəyli qeyd etdi ki, belə ənənələr və digər yeniliklər sonrakı illərdə də davam etdiriləcək. F.Bədəlbəyli bu möhtəşəm musiqi bayramının bənzərsiz dəst-xəttinin olduğunu da xüsusi vurğuladı.

Festivalın digər bədii rəhbəri, dünya şöhrətli violençel ifaçısı, "Yeni Rusiya" Dövlət Simfonik Orkestrinin dirijoru Dmitri Yablonski isə Heydər Əliyev Fondunun təşəbbüsü ilə keçirilən bu layihəni dünyada mədəniyyətin inkişafına böyük töhfə adlandırıb.

Məşhur italiyalı vokalçı Karmela Korrado Karuzonu paytaxtdan xeyli uzaq bir yerdə bu qədər insanın klassik musiqiyə yüksək səviyyədə maraq göstərməsi təəccübləndirib və heyran edib. Heyranlıqlarını gizlədə bilməyənlər sırasında İstanbul Milli Opera Teatrının solisti Burçin Savigne, Yerusəlim Simfonik Orkestrinin üzvü, konsertmeyster Janna Qandelman, Kubanın "Santiaguero" caz qrupunun üzvləri İnosensia Heredia, Fernando Devoir və digərlərinin də adını çəkmək olar.

Qəbələ festivalında yaxından tanış və dost olan musiqiçilər bildirdilər ki, bu tanışlıq və dostluq işgüzar yaradıcılıq əlaqələrinə, yeni axtarışlara və yeni əsərlərin dünyaya gəlməsinə zəmin yaradacaq.

Budəfəki festivalda həm də "Gəl ey səhər", "Azərbaycan" kimi öz bəstələrini və "Ay dilbər", "Xumar oldum" xalq mahnılarını ifa etməklə tamaşaçıların sürəkli alqışlarını qazanan Azərbaycanın Rusiyadakı fövqəladə və səlahiyyətli səfiri, xalq artisti Polad Bülbüloğlu Heydər Əliyev Fondunun təşkilatçılığını yüksək qiymətləndirməklə yanaşı, xüsusi vurğuladı ki, bu möhtəşəm musiqi tədbirinin sorağı dünyanın hər yerinə yayılır və ölkəmizi bir daha tanıdır: "Bu gün Azərbaycanın regionlarında gündən-günə vüsət alan sürətli inkişaf Prezident İlham Əliyevin ulu öndər Heydər Əliyevin müəyyənləşdirdiyi strategiyanı uğurla davam etdirməsini bir daha göstərir. Gələn qonaqlar Qəbələ ilə tanışlıq zamanı ölkəmizin necə sürətlə inkişaf etdiyininşahidi olurlar".

Qəbələli ağsaqqal Şirin Şirinovun da deməyə sözü çox idi: "Bu gözəl musiqi bayramı hər birimizin qəlbində iftixar hissi doğurur. Fəxr edirik ki, gələn qonaqlar gedəndə bu yerlərdən məhəbbətlə, bir də qayıtmaq arzusu ilə ayrılırlar".

Bəli, iyulun 24-dən avqustun 6-dək davam edən Qəbələ V Beynəlxalq Musiqi Festivalı hər kəsin - musiqiçinin də, tamaşaçının da qəlbində unudulmaz xatirəyə çevrilməkdədir. Gələnlər Azərbaycanı, onun musiqisini, insanlarını, təbiətini, dağlarını bir daha tanıdılar, bir daha sevdilər və bir daha könül dolu xoş xatirələrlə getdilər.

 

 

Telman NƏZƏRLİ

 

Azərbaycan. - 2013.- 13 avqust.- S. 11.