Azərbaycanın iş adamları beynəlxalq tədbirlərə dəvət olunmuşlar

Sentyabrın 26-dan 29-dək Rusiyanın Soçi şəhərində XII "Soçi-2013" beynəlxalq investisiya forumu keçiriləcək.

Forum çərçivəsində "dəyirmi masa"ların, təqdimatların və ikitərəfli görüşlərin keçirilməsi nəzərdə tutulur. Azərbaycanda İxracın və İnvestisiyaların Təşviqi Fondundan (AzPROMO) bildirmişlər ki, ölkəmizin sahibkarları və iş adamları da tədbirə dəvət olunmuşlar.

Sentyabrın 16-dan 18-dək isə Polşanın Katovitsa şəhərində Regional İqtisadi Palatanın təşkilatçılığı ilə kiçik və orta sahibkarların III Avropa Konqresi keçiriləcək.

Polşanın Bakıdakı səfirliyindən AzərTAc-a bildirmişlər ki, bu tədbirə Azərbaycan da dəvət edilmişdir. Builki görüşün əsas mövzusu "Kiçik və orta sahibkarlar sektoru şirkətlərinin regional, ölkə və beynəlxalq səviyyədə əməkdaşlığı" olacaq.

Əvvəlki iki konqresdə biznes, elm və siyasi sahəni təmsil edən həm yerli, həm də xarici ölkələrdən 6 mindən çox nümayəndə iştirak etmişdir.

3 gün davam edəcək konqresin işində Polşa və xarici ölkə ekspertlərinin iştirakı, çıxış və müzakirələrin keçirilməsi planlaşdırılır. Tədbir Polşanın Prezidenti Bronislav Komorovski, Avropa Komissiyasının sədri Xose Manuel Barozzo, həmçinin Avropa Parlamentinin sədri Martin Şultsun fəxri himayəsi altında keçiriləcək.

Azərbaycan. - 2013.- 14 avqust.- S. 6.