Daxili işlər orqanlarına xidmətə yeni qəbul edilmiş gənc polis əməkdaşlarının sıra baxışı keçirilmişdir

Avqustun 20-də Azərbaycan Respublikasının daxili işlər naziri, general-polkovnik Ramil Usubovun iştirakı ilə Daxili İşlər Nazirliyinin Arif Heydərov adına sıravi və kiçik rəis heyəti hazırlayan məktəbində daxili işlər orqanlarına xidmətə yeni qəbul edilmiş gənc polis əməkdaşlarının sıra baxışı keçirilmişdir.

Daxili İşlər Nazirliyinin mətbuat xidmətindən AzərTAc-a bildirmişlər ki, tədbiri açan Ramil Usubov xalqımızın ümummilli lideri Heydər Əliyevin Azərbaycan gəncliyinə olan böyük diqqət və qayğısının onun siyasi kursunun layiqli davamçısı - Azərbaycan Prezidenti, Silahlı Qüvvələrin Ali Baş Komandanı İlham Əliyev tərəfindən bu gün uğurla davam etdirildiyini vurğulamışdır. Qeyd edilmişdir ki, ulu öndər tərəfindən imzalanmış "Dövlət gənclər siyasəti haqqında" fərmandan, "Gənclər siyasəti haqqında" Azərbaycan Respublikasının Qanunundan və eləcə də Prezident İlham Əliyev tərəfindən təsdiq edilmiş "Azərbaycan gəncliyi 2011-2015-ci illərdə" dövlət proqramından irəli gələn vəzifələr daxili işlər orqanlarında da uğurla həyata keçirilir. Bunun məntiqi nəticəsidir ki, hazırda respublikanın daxili işlər orqanlarında xidmət edən şəxsi heyətin 40 faizini, o cümlədən sıravi kiçik rəis heyətinin 51 faizini gənclərimiz təşkil edir.

Nazir demişdir ki, sıravi və kiçik rəis heyəti vəzifələrində çalışan əməkdaşların vəzifədə irəli çəkilməsi, ümumilikdə gənclərə lazımi diqqət və qayğının göstərilməsi ölkə rəhbərliyinin böyük önəm verdiyi əsas məsələlərdəndir. Həmin ali diqqət və yüksək etimadın əyani təzahürüdür ki, təkcə bu ilin ötən dövrü ərzində 1084 gənc polis sıralarına qəbul edilərək işlə təmin edilmişdir. Bu gün isə daxili işlər orqanlarında xidmətə yeni qəbul olunan 487 gənc polis kimi şərəfli və məsuliyyətli bir dövlət qulluğunda fəaliyyətə məhz peşə hazırlığı kursu keçdikdən sonra başlayacaqdır.

"Gənc əməkdaşlara çətin və şərəfli olan polis peşəsinin sirlərinin öyrədilməsi, peşəkar və bacarıqlı polis əməkdaşı formalaşdırmaq kimi bu təhsil ocağının üzərinə də böyük məsuliyyət düşür" - deyən nazir qeyd etmişdir ki, məktəbin maddi-texniki bazası daha da yaxşılaşdırılmış, gənc əməkdaşlar üçün beynəlxalq standartlara uyğun lazımi şəraitin yaradılması təmin olunmuşdur.

Çıxışının sonunda polis sıralarına yeni qəbul edilmiş əməkdaşlara tələb və tövsiyələrini çatdıran nazir Ramil Usubov, həmçinin onlara Vətənə məhəbbət, dövlətçiliyə sədaqətlə xidmət etməyi və Azərbaycan Respublikası Prezidentinin daxili işlər orqanlarının qarşısında qoyduğu yüksək tələblərə uyğun fəaliyyət göstərmələrini, vətəndaşlarımızın həyatının, sağlamlığının, qanuni mənafelərinin, hüquq və azadlıqlarının qorunması, cinayətkarlıqla qətiyyətli mübarizə və ictimai təhlükəsizliyin nümunəvi təmin olunması kimi çətin və şərəfli vəzifələrin yerinə yetirilməsində uğurlar arzulamışdır.

Daxili işlər orqanlarında xidmətə yeni qəbul olunan gənc əməkdaşlar adından çıxış edən polis kiçik serjantı Səid Əliyev onlara göstərilən böyük etimada görə Daxili İşlər Nazirliyinin rəhbərliyinə minnətdarlığını bildirmişdir. O, Vətənə, dövlətə və anda sadiq qalacaqlarına, gənclərə göstərilən dövlət qayğısını, ali diqqəti nümunəvi xidmətləri ilə doğruldacaqlarına söz vermişdir. Qeyd edilmişdir ki, Azərbaycan polisi Prezident İlham Əliyevin yürütdüyü uğurlu daxili və xarici siyasəti dəstəkləyir, Ali Baş Komandanın bütün əmr və tapşırıqlarını layiqincə yerinə yetirməyə hər an hazırdır.

Azərbaycan. - 2013.- 21 avqust.- S. 4.