İlk təəssüratın yarandığı məkan

Goranboy hər sahədə inkişaf edir, abadlaşır, ölkənin müxtəlif bölgələri ilə əlaqələri genişlənir. Möcuzəli Naftalanın, səfalı Ağcakəndin, qartallar məskəni Tap kəndinin də yolu buradan keçir. Bu yerlər ilin hər çağında qonaqlı-qaralı olur. Turistlərin də sayı aybaay, ilbəil artır. Ona görə də müasir quruluşlu vağzal binasının inşası ilə hamı maraqlanır. Az qalıb, bu gün-sabah istifadəyə veriləcək. Bununla da yaxın-uzaq ellərə uzanan avtomarşrutların sayı artacaq, gediş-gəliş asanlaşacaq.

Hər hansı bölgə barədə ilkin təəssürat yolda yaranır, vağzalda formalaşır. Avtovağzal hər bir bölgənin qapısıdır. Ona görə də goranboylular bu orijinal vağzal kompleksinin yaraşıqlı, rahat və baxımlı olmasına xüsusi fikir verirlər. İnşaaat işləri demək olar ki, başa çatıb. Hazırda vağzalın geniş sahəsində təmizlik və abadlıq işləri aparılır. Avtomobillərə dayanacaq yerləri, sürücülər üçün istirahət guşələri yaradılır.

Bu yeni, yaraşıqlı avtovağzal binası son vaxtlarda goranboylulara ən gözəl tövhələrdən biridir. Regionların sosial-iqtisadi inkişafı Dövlət Proqramının icrası çərçivəsində rayonda bu cür dəyərli işlər çox görülmüşdür. Əhalini narahat edən problemlərin həlli və infrastruktur layihələrin yerinə yetirilməsi sahəsində bir sıra mühüm tədbirlər həyata keçirilmiş, o cümlədən təhsil, mədəniyyət, idman və digər sosialyönümlü obyektlər istifadəyə verilmişdir.

Bu günlərdə 6 aylığın yekunları və cari ilin vəzifələri müzakirə olunarkən bu barədə geniş söhbət getdi. Əvvəlcə RİH-in başçısı Nizaməddin Quliyevin məruzəsi dinlənildi. Sonra ayrı-ayrı idarə və müəssisələrin nümayəndələri görülən işlər barədə məlumat verdilər. Yekdilliklə qeyd edildi ki, regionların sosial-iqtisadi inkişafı Dövlət Proqramı uğurla yerinə yetirilir. Təkcə cari ilin 6 ayı ərzində rayon üzrə 118 milyon manatlıq məhsul istehsal edilmişdir.

Ən önəmli cəhət budur ki, son vaxtlar rayonda abadlıq və quruculuq işlərinə xüsusi fikir verilir. Goranboy əsl tikinti meydanına bənzəyir. Hesabat dövründə 49 milyon manatlıq inşaat işləri görülmüşdür ki, bu da ötən ilin müvafiq dövründəkinə nisbətən 2 dəfə çoxdur. Şəhərin mərkəzində küçələr genişləndirilir, səkilər düzəldilir, işıq sistemi təzələnir, istinad divarları çəkilir. Gəncə, Goran və Qızılhacılı səmtindən şəhərə gələn giriş yolları başdan-başa yenidən qurulur.

Qaz İstismarı Sahəsi, Su-Kanal İdarəsi, Paylayıcı Elelktrik Şəbəkəsi üçün müasir quruluşlu binalar tikilib. Rayonda beton zavodu və heyvandarlıq kompleksi, eləcə də şəhid ailələri və Qarabağ əlilləri üçün altımərtəbəli 54 mənzilli bina inşa olunur, səhiyyə və mədəni maarif ocaqlarında əsaslı təmir işləri aparılır. Bunlardan əlavə, Aşağı Ağcakənd qəsəbəsinin ərazisində Qala kompleksi inşa edilir. Bu yaxınlarda isə Faxralı kəndində 480 yerlik məktəb binası istifadəyə verilib. Ən əsası budur ki, Murovdağdan Goran torpağına içməli su xətti çəkilib. Ballıqayada 2 su təmizləyici qurğu, Safgül kəndində isə 3 su anbarı tikilib. Şəhər daxilində 109,6 kilometr paylayıcı xətlərin, habelə 81,7 kilometr kanalizasiya sisteminin çəkilişi başa çatıb.

Tap və Tapqaraqoyunlu kəndləri Goran torpağının ən ağrılı yerləridir. Bu kəndlər sərhəd bölgəsində, namərd qonşularla təmas xəttində yerləşir. Bu yerlərin mərd sakinləri gecə-gündüz düşmənlə üz-üzədir. Amma dövlət onları tək qoymur. İndiyəcən atəşlərə məruz qalmış 63 ev dövlətin hesabına yenidən tikilmiş, 28 ev əsaslı təmir olunmuş, əhalinin təhlükəsizliyi üçün 792 metr uzunluğunda, 4 metr hündürlüyündə mühafizə divarı tikilmişdir. Əlavə olaraq 500 metr mühafizə xəttinin inşasına başlanılıb. Murov-Goranboy magistralı su xəttindən kəndə su çəkilmiş, həyətlərdə bulaqlar inşa olunur.

Bu günlər yeni avtovağzal binasının istifadəyə verilməsi gözlənilir. Goranboylular deyirlər ki, təzə vağzaldan gül-çiçəklə bəzədilən birinci avtobus sərhəd bölgəsindəki Tapqaraqoyunlu kəndinə yola düşəcək. Qoy namərd düşmənlər bilsinlər ki, Azərbaycan inkişaf edir, gücü-qüvvəti günü-gündən artır. Bu gün-sabah işğal altındakı torpaqlar da azad olunacaq, Goranboy vağzalından başlanan ünvanların sayı artacaq.

Əhməd İSAYEV

Azərbaycan. - 2013.- 20 avqust.- S. 5.