Vergilər naziri Fazil Məmmədov Şirvanda vətəndaşları qəbul etmişdir

Dövlət başçısının tapşırıq və tövsiyələrinə uyğun olaraq, mərkəzi icra hakimiyyəti orqanlarının rəhbərləri bölgələrdə vətəndaşlarla görüşərək onların problemlərinin həllinə kömək göstərməkdə davam edirlər. Növbəti belə qəbul Şirvan şəhərində vergilər naziri Fazil Məmmədov tərəfindən keçirilmişdir.

Şirvan, Hacıqabul, Salyan, Neftçala, Sabirabad, Saatlı, Göyçay, Kürdəmir və Ucar rayonlarından olan 70-dən çox vətəndaş iqtisadiyyatın müxtəlif sahələri üzrə vergi dərəcələrini azaltmaqla stimullaşdırıcı tədbirlər barədə, vergi orqanlarına işə qəbul, vergi inzibatçılığı, vergi borclarının azaldılması, POS-terminalların quraşdırılması, nəzarət kassa aparatlarının tətbiqi, kiçik sahibkarlığa güzəştli kreditlərin verilməsi və onları narahat edən digər məsələlərlə bağlı nazirə müraciət etmişlər.

Qaldırılan problemlərin əksəriyyəti yerindəcə həll olunmuş, digərlərinin araşdırılması və lazımi tədbirlər görülməsi barədə müvafiq tapşırıqlar verilmişdir.

Qəbula gələn vətəndaşlar onlar üçün yaradılmış bu imkandan razı qaldıqlarını bildirmişlər.

Azərbaycan. - 2013.- 24 avqust.- S. 2.