Ermənistan forpostu olduğu dövlətdən incik düşüb

İşğalçı ölkə Rusiya ilə Azərbaycanın münasibətlərindən ciddi narahatlıq duyur

Həyata keçirdiyi işğalçılıq siyasəti ilə özünü regional təcrid vəziyyətinə salan Ermənistanın yanlış xarici siyasəti bu ölkənin durumunu daha da ağırlaşdırır. Erməni politoloq Ruben Tovmasyan da bildirir ki, məhz yanlış xarici siyasət son dövrlərdə Rusiya ilə münasibətlərin gərgin məcraya yönəlməsinə səbəb olub. Onun sözlərinə görə, Ermənistanın Rusiyanın dəstəyindən məhrum olması ölkənin vəziyyətini xeyli pisləşdirəcək.

Hadisələrin gedişi isə Ermənistanla Rusiya arasında gərginliyin pik həddə çatdığını göstərir. Bu fonda "Rusiya, Ermənistandan rədd ol!" şüarları yenə bir neçə gündür ki, Ermənistanı bürüyüb. Ölkədə müşahihə olunan bahalaşmaya etiraz edən, əsasən də gənclərdən ibarət qrup problemin kökünü Rusiyanın Yerevana satdığı qazın qiymətini artırmasında axtarır. Etirazçılar hökumətdən tarifləri aşağı salmağı və Rusiya ilə dil tapmağı tələb edirlər.

Əslində, Rusiyanın Ermənistandan çıxmasını istəyən yalnız sadə təbəqə deyil. Ermənistanın rəsmi dairələrində də antikreml meyillərinin artdığı müşahidə olunur. Bu, xüsusilə Rusiya Prezidenti Vladimir Putinin Bakı səfərindən sonra daha da intensivləşib. Putinin üçüncü prezidentliyi dövründə ilk səfərini strateji müttəfiqi Ermənistana deyil, Azərbaycana etməsinə qısqanclıqla yanaşırlar. Son 3 ildə nə Rusiya Prezidentinin, nə də baş nazirinin Ermənistana səfər etdiyini xüsusi vurğulayan erməni mətbuatı diqqəti Moskvanın Bakı ilə münasibətlərini dərinləşdirməsinə yönəldir. Vladimir Putinin 2008-ci ildə Rusiya Prezidenti postunu tərk etdikdən sonra Ermənistana baş çəkmədiyini yazan ölkənin "Jamanak" qəzeti prezident Serj Sarkisyanın 2008-ci ildə Moskvaya yola düşərək prezident seçkilərində ona açıq şəkildə dəstək göstərdiyinə görə xüsusi minnətdarlıq etdiyini xatırladıb: "2010-cu ildə prezident Dmitri Medvedevin səfəri Ermənistana Rusiyanın yüksək vəzifəli şəxslərinin son səfəri oldu. Üç il keçdi, ancaq nə Rusiya Prezidenti, nə də baş nazir Ermənistana gəldi. Amma Rusiya Azərbaycanla münasibətlərini dərinləşdirmək üçün fəal çalışır".

"Jamanak" ehtimal edir ki, Putinin Bakıya səfəri Moskvanın həyata keçirdiyi prosesin bir mərhələsidir və bu baxımdan Bakı Putin üçün son stansiya olmaya bilər: "Danışıqlar dövr edir və Putin payızda Ermənistana gələ bilər. Payızda Ermənistanı fövqəladə bir hadisə gözləyir. Bu, Avropa İttifaqı Şərq Əməkdaşlığının noyabr ayında Vilnüs sammitində Aİ ilə assosiativ sazişin imzalanması olacaq. Çox güman ki, Putinin Ermənistana ehtimal olunan səfərində Yerevan qarşısında şərt qoyulacaq və prosesin qarşısının alınmasına çalışılacaq. Əgər noyabrın sonuna kimi Rusiya Prezidenti Ermənistana gələcəksə, o halda hesab etmək lazımdır ki, assosiativ sazişdən imtina təhlükəsi artır. Putin yalnız triumfator kimi Ermənistana gələcək və o halda Sarkisyanın assosiativ sazişdən imtina edəcəyinə əmin olacaq. Əminlik yoxdursa, bu səfər olmayacaq". "Jamanak" yazır ki, hər halda assosiativ sazişin imzalanması Rusiya Prezidentinin şəxsi məğlubiyyəti demək olacaq.

Azərbaycan və Rusiya arasında hərbi əlaqələrin inkişafı da Ermənistanı narahat edir. Ermənistan xarici işlər nazirinin müavini Şavarş Koçaryan bu xüsusda bildirir: "Əgər Rusiyadan Azərbaycana silah satışına "sadəcə biznes" kimi baxırlarsa, onda Ermənistanın Avropa Birliyi ilə assosiativ saziş bağlaması da biznes kimi qəbul edilməlidir". Şavarş Koçaryan daha sonra Rusiyaya sətiraltı sözlərlə ilişib və bu ölkə ilə yollarının ayrıla biləcəyini vurğulayıb: "Ermənistanın düşdüyü mürəkkəb geosiyasi durumu nəzərə alaraq ölkə hakimiyyəti xarici bazarlara, o cümlədən Avropaya çıxmaq üçün yollar axtarır". Şavarş Koçaryanın bu sözləri sosial media səhifələrində ermənilər tərəfindən böyük dəstək alıb. "Əhsən, Şavarş, axır ki, Rusiyanı yerində oturtdun".

Ermənistanın "The Armenian Mirror-Spectator" jurnalı isə yazır ki, Ermənistanın regionda Rusiyanın strateji müttəfiqi olmasına baxmayaraq, ilk səfərini Putin Ermənistana yox, Azərbaycana edib: "Baxmayaraq ki, Putin seçildikdən sonra Yerevan dəfələrlə onu dəvət edib. Rusiyanın nəhəng siyasi okeanında Ermənistan balaca balıqdır".

Bütün bunlar Ermənistanın Rusiyaya olan ümidlərinin tamam qırıldığını göstərir.

Elçin CƏFƏROV

Azərbaycan. - 2013.- 24 avqust.- S. 7.