Azərbaycan Respublikasının Nazirlər Kabineti qərar

№ 205 Bakı şəhəri, 7 avqust 2013-cü il

Azərbaycan Respublikası Nazirlər Kabinetinin 2011-ci il 24 noyabr tarixli 191 nömrəli qərarı ilə təsdiq edilmiş "Mərkəzi icra hakimiyyəti orqanları tərəfindən konkret sahələr üzrə elektron xidmətlər göstərilməsi Qaydaları"nda dəyişikliklər edilməsi haqqında

"Elektron hökumət" portalı haqqında Əsasnamə"nin təsdiq edilməsi və elektron xidmətlərin genişləndirilməsi ilə bağlı tədbirlər barədə" Azərbaycan Respublikası Prezidentinin 2013-cü il 5 fevral tarixli 813 nömrəli Fərmanının 2.5-ci bəndinin icrasını təmin etmək məqsədi ilə Azərbaycan Respublikasının Nazirlər Kabineti qərara alır:

1. Azərbaycan Respublikası Nazirlər Kabinetinin 2011-ci il 24 noyabr tarixli 191 nömrəli qərarı (Azərbaycan Respublikasının Qanunvericilik Toplusu, 2011, № 11, maddə 1072, № 12, maddə 1247; 2012, № 1, maddə 40, № 3, maddə 256, № 10, maddə 1016, № 11, maddə 1207; 2013, № 6, maddələr 745, 757; Azərbaycan Respublikası Nazirlər Kabinetinin 2013-cü il 5 iyul tarixli 170 nömrəli qərarı) ilə təsdiq edilmiş "Mərkəzi icra hakimiyyəti orqanları tərəfindən konkret sahələr üzrə elektron xidmətlər göstərilməsi Qaydaları"nda aşağıdakı dəyişikliklər edilsin:

1.1. 2.1.8-ci yarımbənd aşağıdakı redaksiyada verilsin:

"2.1.8 "Elektron hökumət" portalı - dövlət orqanlarının elektron xidmətlərinin mərkəzləşdirilmiş qaydada təqdim olunmasına, istifadəçilərin onlardan istifadəsinə, dövlət orqanlarının portala qoşulmuş informasiya sistemləri və ehtiyatlarından (məlumat bazaları, məlumat-axtarış sistemləri, reyestrlər və digər informasiya resursları) müvafiq sənədlər barədə qanunla müəyyən edilmiş qaydada informasiya əldə edilməsinə xidmət edən internet informasiya ehtiyatı;";

1.2. aşağıdakı məzmunda 6.2.3-1-ci yarımbənd əlavə edilsin:

"6.2.3-1. elektron xidmətlərin, informasiya sistemlərinin və ehtiyatlarının "Elektron hökumət" portalına qoşulmasının təmin edilməsi üçün Azərbaycan Respublikası Prezidentinin 2012-ci il 5 fevral tarixli 813 nömrəli Fərmanı ilə təsdiq edilmiş "Elektron hökumət" portalı haqqında Əsasnamə"yə uyğun tədbirlər görmək;";

1.3. 11.4-cü bənd aşağıdakı redaksiyada verilsin:

"11.4. "Elektron hökumət" portalının fəaliyyətinin təşkili Azərbaycan Respublikasının Rabitə və İnformasiya Texnologiyaları Nazirliyi, təhlükəsizliyinin təmin edilməsi həmin nazirliklə birgə Azərbaycan Respublikası Xüsusi Dövlət Mühafizə Xidmətinin Xüsusi Rabitə və İnformasiya Təhlükəsizliyi Dövlət Agentliyi tərəfindən həyata keçirilir.".

Artur RASİ-ZADƏ,

Azərbaycan Respublikasının Baş naziri

Azərbaycan. - 2013.- 25 avqust.- S. 2.