Abituriyentlərin BANM-ə marağı rekord həddə çatıb

ARDNŞ-nin Bakı Ali Neft Məktəbinə (BANM) qəbul kampaniyasının göstəriciləri bu təhsil ocağının test imtahanlarında yüksək bal toplamış abituriyentlərin diqqət mərkəzində olduğunu bir daha sübut etdi.

BANM-in qəbul elan etdiyi ixtisaslar üzrə minimal keçid balları müvafiq olaraq neft-qaz mühəndisliyi ixtisası üzrə dövlət sifarişli yerlərə 648, ödənişli yerlərə 637, proseslərin avtomatlaşdırılması mühəndisliyi ixtisası üzrə 650, kimya mühəndisliyi ixtisası üzrə 634 bal olub. İxtisaslar üzrə orta ballar uyğun olaraq 661, 669 və 646, ümumiyyətlə, ali məktəb üzrə 656 bal təşkil edib. Keçən il isə bu rəqəm 631 bal idi.

Ali məktəbə qəbul olanların 50 faizi 650-dən çox bal toplamış abituriyentlərdir. Onlardan 48-i Azərbaycan, 12-si rus bölməsində təhsil alanlardır.

Neft-qaz mühəndisliyi ixtisası üzrə maksimal göstərici 685, proseslərin avtomatlaşdırılması mühəndisliyi ixtisası üzrə 690, kimya mühəndisliyi ixtisası üzrə isə 695 bal olub.

I qrup ixtisasları üzrə qəbulda test imtahanlarında ən yüksək, yəni, 695 bal toplamış iki abituriyentdən biri- Sevinc Qafarlı BANM-i seçib və kimya mühəndisliyi ixtisasına qəbul edilib.

Bu göstəricilər ölkəmizdə həyata keçirilən neft strategiyasının perspektivlərinə olan inamı, istedadlı gənclərin mühəndislik ixtisaslarına marağını əks etdirir. Bunlar eyni zamanda, ARDNŞ-nin reallaşdırdığı layihələrin perspektivləri və BANM-in cəmiyyətdə nüfuzunun ildən-ilə artması ilə bağlıdır.

Azərbaycan. - 2013.- 25 avqust.- S. 2.