Azərbaycan Yaponiya ilə seysmologiya sahəsində əməkdaşlığı genişləndirir

Azərbaycan Milli Elmlər Akademiyasında Yaponiyanın OYO-SHİNYEİ şirkətlərinin nümayəndələri ilə görüş keçirilib.

AMEA-nın vitse-prezidenti, akademik İsa Həbibbəyli Azərbaycanda Seysmoloji Xidmətin yaranma tarixi, keçdiyi mərhələlər barəsində qonaqlara ətraflı məlumat verərək xidmətin bu gün inkişaf mərhələsində olduğunu qeyd edib: "Ölkəmizdə seysmik stansiyaların yeni və ən müasir avadanlıqlarla təmin edilməsi üçün mühüm addımlar atılıb. Yaponiyanın zəlzələlərin öyrənilməsi sahəsində böyük təcrübəsi var. Bu təcrübənin öyrənilməsi baxımından bu sahədə hər iki ölkənin müvafiq təşkilatları arasında əməkdaşlıq vacibdir. Hesab edirəm ki, bu əməkdaşlıq həm Azərbaycan, həm də Yaponiya üçün faydalı olar".

Respublika Seysmoloji Xidmət Mərkəzi tərəfindən Azərbaycanın bütün ərazisində seysmoloji tədqiqatlar aparıldığını vurğulayan akademik İ.Həbibbəyli Naxçıvan Muxtar Respublikasında RSXM-in dörd seysmik stansiyasının fəaliyyət göstərdiyini qeyd edib.

OYO-SHİNYEİ şirkətinin prezidenti Toru Kajvara isə Bakıya ikinci dəfə səfər etdiyini və hər dəfə burada çox böyük inkişaf gördüyünü deyib: "Bir il əvvəl Azərbaycana gələnə qədər mən inanmazdım ki, Azərbaycanda seysmologiya bu qədər inkişaf edib. Ötən il səfərim zamanı Respublika Seysmoloji Xidmət Mərkəzinin Monitorinq Mərkəzində oldum. Burada demək olar ki, hər şey Yaponiya ilə eyni səviyyədədir. İstər istifadə olunan seysmik cihazlar və avadanlıqlar, istərsə də tədqiqatların səviyyəsi".

AMEA Respublika Seysmoloji Xidmət Mərkəzinin Baş direktoru, geologiya-mineralogiya elmləri doktoru Q.Yetirmişli isə Azərbaycan seysmologiyasının inkişafına hər zaman dövlət tərəfindən diqqət göstərildiyini vurğulayıb. RSXM tərəfindən seysmoloji tədqiqatların kompleks şəkildə aparıldığını bildirən baş direktor Azərbaycan və Yaponiyanın OYO şirkəti arasında əlaqələrin daha da inkişaf etdirilməsinin zəruriliyini söyləyib.

Görüşdə tərəflər arasında əlaqələrin genişləndirilməsi üçün anlaşma protokolunun imzalanması barədə ilkin razılıq əldə edilib.

Elçin CƏFƏROV

Azərbaycan. - 2013.- 27 avqust.- S. 7.