«Heç kim unudulmur, heç nə yaddan çıxmır» sənədli filminin təqdimatı olmuşdur

Beyləqan rayonunda xocavəndli məcburi köçkünlər üçün salınmış Xocavənd qəsəbəsində "Heç kim unudulmur, heç nə yaddan çıxmır" sənədli filminin təqdimatı olmuşdur.

AzərTAc xəbər verir ki, Xocavənd Rayon İcra Hakimiyyəti tərəfindən hazırlanan film Xocavənd istiqamətində döyüşlərdə igidlik göstərmiş və Vətənimizin bütövlüyü uğrunda şəhid olmuş Ağdaş rayonundan olan qəhrəman oğullarımızın xatirəsinə həsr edilmişdir.

Mərasimdə Xocavənd Rayon İcra Hakimiyyətinin başçısı Eyvaz Hüseynov, Qarabağ Müharibəsi Əlilləri, Veteranları və Şəhid Ailələri İctimai Birliyi Ağdaş rayon şöbəsinin sədri İsmayıl Xudiyev, Xocavənd batalyonunun sabiq komandiri Əbülfət Hüseynov və başqaları filmlə bağlı rəy və təkliflərini bildirmiş, təəssüratlarını bölüşmüşlər.

Xocavənd rayonunda doğma Qarabağımızın qədim tarixinin və zəngin mədəniyyətinin təbliği, Ermənistan-Azərbaycan, Dağlıq Qarabağ münaqişəsi ilə bağlı həqiqətlərin, xalqımızın başına gətirilən faciə və soyqırımılarının ölkə və dünya ictimaiyyətinə çatdırılması istiqamətində mütəmadi olaraq işlər aparılır, silsilə filmlər çəkilir. "Heç kim unudulmur, heç nə yaddan çıxmır" sənədli filmi də həmin silsilənin davamıdır.

Azərbaycan. - 2013.- 28 avqust.- S. 6.