Açıq səma altında unikal muzey

Bu yerləri bir görən bir də baxmaq istəyir. Sanki əzəmətli bir muzeydir. Ölkədə hələlik yeganədir. Ağstafada açıq səma altında yaradılmış tarixi və müasir abidələr parkını deyirəm.

Şəhərin mərkəzində 2,5 hektar sahəni əhatə edir. Burada Azərbaycanın bütün tarixi və coğrafiyası ilə tanış olmaq mümkündür. Bu miniatür park ölkəmizi əhatə edən dağ silsilələrini, çay və gölləri, təbiət mənzərələrini əks etdirir. Ayrı-ayrı bölgələrdə xalqımızın tarixi keçmişini yaşadan tikililər, abidələr, qala divarları, türbələr və məscidlər, habelə müasir arxitektura nümunələri göz oxşayır. Parkın ətrafında uzunluğu 160 metr, eni 10 metr olmaqla Xəzər dənizinin təsviri yaradılmışdır. Ağstafada açıq səma altında yaradılmış bu memarlıq incisinin hər guşəsi diqqəti cəlb edir. Turizmin sürətlə inkişaf etdiyi indiki dövrdə bu nadir park, zənnimcə, hamının xoşuna gələcək. Bu park əcnəbi qonaqlara Azərbaycana, məktəbli və gənclərə isə öz keçmişlərinə, tarixlərinə canlı səyahət etmək imkanı verir. Buyurun, gəlin!

Pərviz QULİYEV,

Qarabağ müharibəsinin veteranı

Azərbaycan. - 2013.- 25 avqust.- S. 6.