ATƏT-in Demokratik Təsisatlar və İnsan Haqları Bürosunun seçkiləri müşahidə missiyasının üzvləri Mərkəzi Seçki Komissiyasında olmuşlar

Avqustun 29-da ATƏT-in Demokratik Təsisatlar və İnsan Haqları Bürosunun (DTİHB) seçkiləri müşahidə missiyasının rəhbəri Tana de Zulueta və missiyanın üzvləri Mərkəzi Seçki Komissiyasında (MSK) olmuşlar.

MSK-dan AzərTAc-a bildirmişlər ki, komissiyanın sədri Məzahir Pənahov görüşdə müşahidə missiyasını Azərbaycanda görməkdən məmnunluq duyduğunu bildirmiş və seçkilərin nəticələrinin qiymətləndirilməsi baxımından müşahidəçilərin fəaliyyətinə xüsusi əhəmiyyət verdiyini söyləmişdir.

Tana de Zulueta səmimi qəbula görə təşəkkürünü bildirmiş və qeyd etmişdir ki, həm seçkiqabağı vəziyyətin, həm də səsvermə gününün müşahidəsini aparacaqlar. O, oktyabrın 9-na təyin edilmiş Azərbaycan Respublikası Prezidentinin seçkilərinə hazırlıqla bağlı görülən işlər barədə MSK sədrinin ətraflı məlumat verməsini xahiş etmiş, komissiyanın maarifləndirmə proqramı, Azərbaycanda müşahidəçiliyin prinsipləri və digər məsələlər barədə suallar vermişdir. M.Pənahov seçkilərin hazırlanıb keçirilməsi ilə bağlı komissiyanın fəaliyyəti, həyata keçirdiyi tədbirlər barədə ətraflı məlumat vermiş, qonaqların suallarını cavablandırmışdır.

Azərbaycan. - 2013.- 30 avqust.- S. 6.