ASAIF-ın ənənəvi yay forumları gənclərin şəbəkələşməsi üçün mühüm vasitədir

Xaricdə Təhsil Alan və Məzun Olmuş Gənclərin Beynəlxalq Forumunun (ASAIF) ənənəvi yay forumları gənclərin şəbəkələşməsi üçün mühüm vasitədir.

Bu sözləri ASAIF-ın avqustun 30-da Bakıda "Bizim forum, bizim seçim, bizim Azərbaycan" devizi altında keçirilən XI Yay Forumunda iştirak edən "İrəli" İctimai Birliyin (İB) sədri Rauf Mərdiyev AzərTAc-a müsahibəsində demişdir.

Rauf Mərdiyev bildirmişdir ki, tədbirə 600-ə yaxın azərbaycanlı gənc toplaşmışdır. Onların hamısı xaricdə təhsil almış və hazırda təhsilini davam etdirən gənclərdir. Bu gənclərin böyük əksəriyyəti gələcəkdə Azərbaycanda təcrübəli və ixtisaslı kadrlar kimi çox mühüm vəzifələrdə çalışacaqlar. Bu baxımdan onların şəbəkələşməsi və birləşməsi çox müsbət haldır.

Rauf Mərdiyev vurğulamışdır ki, bu tədbirin müsbət cəhətlərindən biri odur ki, forum ailə mühiti yaradır, hər kəsi bir araya gətirir, eyni zamanda, burada iştirak edən gənclər öz üzərlərində dövlətin qayğısını, diqqətini, etimadını hiss edirlər. Gənclərimizin onları maraqlandıran məsələləri və sualları rəsmilərlə birgə müzakirə edə bilmələri çox mühüm amildir.

R.Mərdiyev qeyd etmişdir ki, XI Yay Forumunun açılış mərasimində "İrəli" İctimai Birliyin (İB) və ASAIF-ın birgə reallaşdırdıqları "İnsan resursları təlimi"nin iştirakçılarına sertifikatlar təqdim olunmuşdur. Bu hadisə hər iki təşkilatın birgə keçirdiyi uğurlu layihələrdəndir. Ümid edirik ki, belə layihələr bundan sonra da davamlı olacaqdır.

Azərbaycan. - 2013.- 31 avqust.- S. 8.