Azərbaycan mətbuatı
heç vaxt bugünkü qədər dövlətin diqqət
və qayğısı ilə əhatə olunmayıb
"Azərbaycanda söz azadlığı maksimum dərəcədə təmin edilir. Bu, belə də olmalıdır. Çünki biz müasir dövlət qururuq, biz inkişaf etmiş ölkəyə çevrilməliyik və belə olan halda bütün meyarlar Azərbaycanda yüksək səviyyədə olmalıdır". Bu fikirləri Azərbaycan Prezidenti İlham Əliyev "Jurnalistlərin dostu" mükafatının təqdimolunma mərasimindəki çıxışında səsləndirdi.
Media nümayəndələri ilə dövlət
başçısı arasında baş tutan səmimi
görüşdə Azərbaycan jurnalistikasının
mövcud durumu və gələcək perspektivlər
müzakirə mövzusu oldu. Dövlət
başçısı jurnalistlərə tövsiyə və
təkliflər verməklə yanaşı, onların fikirlərini
də dinləyib əlavə tapşırıqlar verdi. Ona
görə bu görüşü nəinki Azərbaycanda azad
mətbuatın, eyni zamanda, azad cəmiyyətin
inkişafına mühüm töhfə kimi dəyərləndirmək
olar. Çünki bu gün həqiqətən də ölkəmizdə
söz, ifadə və mətbuat azadlığı, internetdən
istifadə mütəşəkkilliyi tam şəkildə təmin
edilir. Dövlət başçısının həm
qanunvericilik səviyyəsində, həm də maddi-texniki
bazanın təkmilləşdirilməsi baxımından
medianın tərəqqisinə tarixi hadisə sayılacaq
töhfələr verir. Əslində dövlət
başçısı layiq görüldüyü
mükafatı belə geniş müzakirələr
keçirmədən, başqa bir formatda da ala bilərdi. Amma
Prezident bununla əsası medianın böyük
qayğıkeşi, mətbuatın missiyasını və
funksiyasını dərindən başa düşən, onu
lazımınca qiymətləndirməyi bacaran ulu öndər
Heydər Əliyev tərəfindən qoyulmuş azad media
siyasətinin davamçısı olduğunu bir daha göstərdi.
Azərbaycan jurnalistlərinin özünə dost seçdikləri
Prezident İlham Əliyev həmin
görüşdə media-hakimiyyət müstəvisində
yeni münasibətlərin konturlarını cızdı, mətbuatın
problemlərinin dialoq, müzakirə yolu ilə ölkə
daxilində həlli yollarını göstərdi. Dövlət
başçısının medianı yüksək dəyərləndirməsi
səbəbsiz deyil. Kütləvi informasiya vasitələrinə
dövlət dəstəyinin əsas məqsədi müstəqil,
peşəkar, rəqabətədavamlı, eyni zamanda milli
şüur və vətənpərvərlik prinsiplərinə
dönmədən əməl edən media resurslarının
formalaşdırılmasıdır.
Əminliklə
söyləmək olar ki, bu gün ölkədə xeyli sayda
müstəqil mətbu orqan və informasiya agentliklərinin,
elektron KİV-lərin, jurnalist
təşkilatlarının azad fəaliyyət göstərməsi
üçün hər cür demokratik şərait var. Heç
bir mətbu orqanlarına qarşı qərəz və
ayrı-seçkilik yoxdur. Cəmiyyətin güzgüsü
kimi dəyərləndirilən mətbuatın da əsas
prinsipləri obyektivlik, qərəzsizlik, vətənpərvərlik
olmalıdır. Bu üç amilin vəhdəti fonunda daha
dolğun, ölkənin bu günü və gələcəyi
üçün daha önəmli məsələlərin
müzakirəsinə və həllinə xidmət edən
yazılar ortaya çıxa bilər. Bunun üçün
bütün şərait yaradılıb. Azərbaycan mətbuatı
heç vaxt bugünkü qədər dövlətin diqqət
və qayğısı ilə əhatə olunmayıb. Son 10
il ərzində yaradılan şərait nəticəsində
ölkənin kütləvi informasiya vasitələri öz
çevrələrini genişləndirib, şaxələnərək
media qruplara çevriliblər.
Son on ildəki inkişaf nəticəsində
Azərbaycan kütləvi informasiya vasitələri
dünyanın media nəhəngləri ilə istər keyfiyyət,
istərsə də operativlik baxımından rəqabətə
davamlı vəziyyətə gəlib. Ölkədə ənənəvi
mətbuatla yanaşı, yeni media formalaşıb və
onların fəaliyyəti kifayət qədər peşəkarlaşıb.
Azərbaycanın birinci şəxsinin öz mediası ilə, cəmiyyəti ilə məsləhətləşməsi, dəstək istəməsi çox təqdirəlayiq haldır. Artıq Azərbaycanda medianın himayədarı qismində cəmiyyət və konkret oxucu kütləsindən daha çox, dövlətin özü çıxış edir. Dövlət başçısı sözügedən görüşdə bu məsələyə xüsusi olaraq toxunub: "Biz hamımız Azərbaycan vətəndaşlarıyıq. Hamımızın bir Vətəni vardır - Azərbaycan. Hamımız vətənpərvərik, Vətənimizi sevirik. Ola bilər ki, ölkəmizin inkişafı ilə bağlı müxtəlif fikirlərimiz olsun. Kimsə kimisə istəməyə bilər. Bu da təbiidir. Ancaq biz əsas amallar ətrafında daim bir yerdə olmalıyıq. Bugünkü görüş hesab edirəm ki, onu göstərir. Media məsələlərinin, digər məsələlərin həlli ilə bağlı Azərbaycanda heç bir ayrı-seçkilik yoxdur, ola bilməz".
Qeyd edək ki, bu gün Azərbaycan
mediasının inkişafı fonunda Prezident İlham
Əliyevin rəhbərliyilə ölkəmizdə demokratikləşmə
prosesi sürətlə davam edir. Bu prosesin yüksək nəticələr
verməsi üçün dövlət
başçısı bütün imkanları səfərbər
edib. Xüsusilə də medianın problemlərinin aradan
qaldırılmasına diqqət yetirən Prezident İlham
Əliyev bundan sonra da bu sahədə
çatışmazlıqları aradan qaldıracaq,
ümumilikdə, media sektorunun inkişafı üçün
dövlətin dəstəyini daha da artıracaq. Görünən
odur ki, Azərbaycanda demokratik cəmiyyət quruculuğu
uğurla davam edir. Elə dövlət başçısı
mükafatın təqdim edilməsi mərasimində də Azərbaycanın
ayrı-ayrı sahələr üzrə qazandığı
uğurlara diqqəti yönəldərək diqqətə
çatdırdı ki, mətbuat bu reallıqları ictimaiyyətə
çatdırmaqda böyük rola malikdir. Təbii ki,
informasiya bolluğu təmin edilərsə, bu halda istər
ölkə, istərsə də beynəlxalq ictimaiyyət bəzi
dairələrin apardığı yalan təbliğata uymaz. Mətbuat
nümayəndələri həqiqətlərin təbliğində
fəal mövqe tutaraq bu işə öz dəstəklərini
göstərmiş olarlar. İqtisadi tərəqqi,
güclü sosial siyasət, xalq-iqtidar birliyi, beynəlxalq dəstək
Azərbaycanın dövlət müstəqilliyinin möhkəmliyini,
sarsılmazlığını təsdiqləyir. Bu uğura
yol açan əsas amil isə dövlətimizin
düşünülmüş və məqsədyönlü
siyasətidir. Azərbaycanın hər sahədə müstəqil
siyasəti uğurlarımızın
davamlılığını təmin edir.
Rəşad
BAXŞƏLİYEV
Azərbaycan.- 2013.- 1
dekabr.- S.6.