Azərbaycan nümayəndə heyəti NESCWA-nın beynəlxalq konfransında

Əl-Küveyt şəhərində BMT-nin Qərbi Asiya İctimai və İqtisadi Komissiyası (UNESCWA) ilə Küveytin Qadın Məsələləri üzrə Dövlət Komitəsinin təşkilatçılığı ilə Beynəlxalq konfrans keçirilmişdir.

UNESCWA Komissiyasının Qadın Məsələləri üzrə 6-cı beynəlxalq konfransının işində Azərbaycan Respublikasının Ailə, Qadın və Uşaq Problemləri üzrə Dövlət Komitəsinin (AQUPDK) sədri Hicran Hüseynovanın rəhbərlik etdiyi nümayəndə heyəti müşahidəçi statusunda iştirak etmişdir. Komitənin mətbuat xidmətindən AzərTAc-a bildirmişlər ki, səfər çərçivəsində Hicran Hüseynovanın Küveytli həmkarı Şeyxə Lətifə Əl-Fəhd Əl-Səlim Əl-Sabah ilə görüşü olmuşdur.

Küveytin Qadın Məsələləri üzrə Dövlət Komitəsinin sədri Şeyxə Lətifə Əl-Sabah Azərbaycana səfəri və ölkəmizin birinci xanımı Mehriban Əliyeva ilə görüşü haqqında söz açaraq bu ziyarətin onun yaddaşında silinməz iz buraxdığını, xalqımıza böyük ehtiram və məhəbbət bəslədiyini vurğulamışdır.

İki ölkənin müvafiq qurumları arasında səmimi dostluq münasibətlərinin mövcud olduğunu vurğulayan Şeyxə Lətifə Əl-Sabah bundan sonra da əlaqələrin inkişaf etdirilməsinin vacibliyini bildirmişdir.

H.Hüseynova AQUPDK-nın Küveytin müvafiq qurumu ilə əməkdaşlığın inkişafına böyük önəm verdiyini qeyd etmişdir.

Sonra iki qurum arasında əməkdaşlıq perspektivləri ətrafında fikir mübadiləsi aparılmışdır.

AQUPDK-nın sədri son vaxtlar ölkəmizdə ailə, qadın və uşaq məsələlərinin həlli yollarında tətbiq olunan uğurlu mexanizmlər və dövlətimizin bu sahədəki təcrübəsi barədə konfrans iştirakçılarına ətraflı məlumat vermişdir.

Elə həmin gün Hicran Hüseynova Küveytin əmək və ictimai məsələlər üzrə naziri xanım Tikra Ər-Rəşidi, ölkənin tanınmış xeyriyyəçisi və nüfuzlu ictimai xadimi, Küveyt Əlillər Cəmiyyətinin sədri Şeyxə Əl-Sabah ilə görüşmüşdür.

Konfrans çərçivəsində Hicran Hüseynovanın Mərakeş, Sudan, Tunis, Fələstin, Misir nümayəndə heyətlərinin üzvləri ilə ikitərəfli görüşləri olmuşdur.

Azərbaycan nümayəndə heyətinin Küveytə səfəri yerli KİV tərəfindən geniş işıqlandırılmışdır. H.Hüseynova Küveytin nüfuzlu və çoxtirajlı "Əl-Ray" qəzetinə və "KTV-2" ingilisdilli televiziya kanalına eksklüziv müsahibələr vermişdir.

Azərbaycan.-2013.- 12 dekabr.- S.15.